Gikan sa Among mga Magbabasa

Mga Negosyante sa Kamatayon Pagkadakong binuang ang paghatag ug usa ka milyong dolyar matag tuig alang sa mga armas, samtang ginapasagdan ang 14 milyones ka kabataan nga mangamatay gikan sa mga epekto sa kagutom! (Hunyo 8, 1989) Ang Pagmata! nakahimog maayong buhat sa pagladlad sa mingilngig nga mga krimen sa mga negosyante ug mga armas, samtang nagapakita kon sa unsang paagi pagasugdan sa Maglalalang sa dili madugay ang bag-ong kalibotan diin ang pakigdait ug kasegurohan ang mohari.

C. G. P., Pederal nga Republika sa Alemanya

Luwas nga mga Pagkaon Gibasa ko uban sa kaikag ang artikulong “Himoa ang Imong Pagkaon nga Luwas” diha sa Hunyo 22, 1989, nga Pagmata! Mga usa ka tuig ug tunga sa miagi, mibiyahe kami sa usa ka langyaw nga nasod. Nakurat ako sa pagkahibalo nga ilang hugasan ang ilang mga plato sa mainit, sabonong tubig apan wala gayod banlawi ang mga bula sa sabon sa wala pa trapohi ang mga plato. Sanglit ang inyong artikulo wala man maghisgot ug pagbanlaw, nagpasabot ba kini nga wala kamo maghunahuna nga kini kinahanglan?

S. B., Tinipong Bansa

Ang pagbanlaw sa sabonong mga plato maoy usa ka importanteng lakang sa kahindik, ug among giapresyar ang imong paghisgot niini.—ED.

Katingalahan nga pagkadaghan sa mga tawo nga nagbilin ug pagkaon diha sa temperatura sa lawak sulod sa daghang oras o dili mohimog yanong mga paagi sama sa paghugas sa ilang mga kamot sa dili pa magluto. Ako nakaanha sa inyong hedkuwarter sa New York, ug ako nakadayeg gayod sa ilang pagkahinlo kaayo. Kaming tanan angay mosunod niana nga sumbanan sa among mga panimalay.

M. B., Tinipong Bansa

Matahom nga mga Pasundayag sa Panganod Dili pa dugay, ang akong kuwatro-anyos nga anak nga babaye nangutana nako kon diin gikan ang dalogdog ug kilat. Gitubag ko siya apan wala makatagbaw sa iyang pagkamausisaon. Midangop ako sa mga libro sa siyensiya apan nakakita nga ang mga pagpatin-aw teknikal ra kaayo. Ang inyong artikulo (Mayo 22, 1989) nakatubag sa mga pangutana sa usa ka tin-aw ug masabtang paagi. Ug pagkadako sa epekto ang nahatag niadtong mga larawana sa akong mga anak! Sa daghang adlaw human niadto, ang ilang ginaestoryahan magabii maoy bahin sa ‘dalogdog ug kilat.’

P. G., Pederal nga Republika sa Alemanya

Genetikanhong Rebolusyon Nagtuon ako ug horticulture ug bag-o pa lang nakadawat sa akong sertipiko sa pagkateknisyan. Ang ulohan sa akong eksamin maoy “Genetikanhon nga Maniobra.” Handurawa lang ang akong kakurat sa pagkasunod adlaw sa dihang akong nabasa ang inyong artikulo (Hulyo 22, 1989) bahin sa mismong ulohan. Ang impormasyong inyong gihatag tin-aw ug nunot sa panahon.

A. L., Pransiya

Tabako Maayo kaayong paagi ang inyong pagpatin-aw sa mga kapeligrohan sa pagtabako. (Hulyo 8, 1989) Ako hinabako, ug ako walay nakitang daotan sa maong batasan. Unsa may daotan sa pagtabako sa responsableng paagi? Sama sa gisulat ni apostol Pablo, ‘Gusto kong buhaton ang usa ka butang apan dili makapugong sa pagbuhat ug lain.’ Ang yanong pagpunting sa Kasulatan bahin niini nga isyuha, sa pagtuo ko, dili igo.

S. S., Pederal nga Republika sa Alemanya

Ang medikal nga pagdukiduki klarong nagpakita nga walay “responsable” nga paagi sa pagtabako. Ug ang batasan sa dayag dili maayo alang sa kadaghanan sa mga dili-tigtabako nga mapugos sa paghingos sa makahilo nga mga aso. Busa ang artikulo naghatag ug Kasulatanhon nga hunahuna sa maong butang ug realistiko, praktikal nga mga paagi sa pagtabang sa mga tigtabako sa pagsumpo sa pagkagiyan sa nikotena. Kon sabton sa konteksto, ang mga pulong ni apostol Pablo nga gihisgotan sa ibabaw nagpakita nga uban sa balaan nga tabang, ang usa ‘makagawas’ gikan sa kalapasan. (Roma 7:21-25)—ED.

Nasodnong mga Parke Nalingaw kaayo ako sa pagbasa sa artikulong “Kon Unsaon sa Pagkalingaw sa Inyong Nasodnong mga Parke.” (Hunyo 22, 1989) Akong nasabtan nga ang mga dalan-dalan sa nasodnong mga parke maoy alang sa atong kahilwasan. Moabot ra ang adlaw, nga makahimo na kita sa pag-adto sa bisan asa nga walay kahadlok tungod kay ang atong Dakong Maglalalang nagsaad sa paghimo sa yuta nga luwas ug matahom nga paraiso.

M. L., Tinipong Bansa