Unsay Nagakahitabo sa Kalibotan sa mga Dula?

Sinulat sa koresponsal sa Pagmata! sa Italya

ANG mga taho sa kaatbang nga panid nagabatbat ba sa kinaulahiang rebolusyon sa usa ka nasod sa Latin Amerika o sa lain nga atake sa terorista sa usa ka dapit sa yuta sa Uropa? Dili, kini sila ug ang ubang susamang mga taho maoy, sumala sa usa ka Italyanhong pamantalaan, “ordinaryo kaayo sa usa ka adlaw sa dula.”

Ang mga dula ug kabangisan daw nagakuyog karong mga adlawa. Pananglitan, daghan ang mahinumdom pa sa gabii sa Mayo 29, 1985, sa dihang 39 ka tawo namatay ug 200 nasamdan sa mga panghitabo taliwala sa mga dumadayeg una sa kataposan sa European Champions’ Cup nga mga kampeyonato sa sakir.

Bisan pa niana, ang mga hitabo sa kabangisan nga gipahinabo sa mga entrante ug mga tumatan-aw dili ra limitado sa usa ka dula, sama sa sakir, apan sila mosilaob sa tanang matang sa mga dula—besbol, boksing, hockey.

Ang panultihon, “Makadaog ang labing hawod nga lalaki” ug, “Labing hinungdanon ang pag-apil kay sa pagdaog,” nangapuo na diha sa kalibotan sa mga dula. Nganong ang mga magdudula ug mga tumatan-aw mopahungaw sa ilang daotang mga kinaiya, sa dimapugngang pagkaagresibo, diha sa maindigong mga bangga sa dula? Unsay nagapaluyo sa kabangisan diha sa mga dula? Ug unsa ka grabe ang suliran?