Walay Kuwarta Alang sa mga Buta

Otsenta porsiento sa mga buta sa kalibotan nagapuyo sa nagkaugmad nga kanasoran. Ang kinadaghanan anaa sa Southeast Asia. Didto, usa sa matag 25 ka tawo maoy buta o halap, nagtaho ang WHO (World Health Organization). Unsa ang pangunang mga hinungdan? Kakulang sa sustansiya ug mga impeksiyon gumikan sa dili-maayong panghinlo.

Sumala sa Olandes nga magasing Internationale Samenwerking, ang WHO nag-angkon nga sa duha ka libong milyon dolyar U.S. sa usa ka tuig, kini makahimog epektibong kampanya batok sa pagkabuta diha sa nagkaugmad nga kanasoran. Bisan pag kining kantidara menos sa gigasto sa mga gobyerno sa kalibotan alang sa mga katuyoang militar sa usa ka adlaw, ang WHO nagpahayag nga kini dili makabaton sa gikinahanglang salapi.

Busa, kay kulang ang salapi, ang mahimo lamang niini karon mao ang pagsulay sa pagsanta sa pagkabuta pinaagi sa pag-apod-apod sa mga kapsulang bitamina A ngadto sa mga bata. Duolag 400,000 ka bata sa India, Indonesia, Bangladesh, ug sa Pilipinas may sakit sa mata tungod sa kakulang sa bitamina A. Apan ang WHO nagtagnang masulob-on nga, sa gikusgon karon, ang kalibotan magbatog 84 milyong buta ug halap nga mga tawo sa pagkatuig 2000.