Ang Pulang Tigdani nga May Sadyang Awit

Ikaw ba sukad gipukaw sa usa ka pulang tigdani pinaagi sa sadyang awit? Kon nagapuyo ka sa Amerika del Norte, kana basin ang malipayon nimong pagmata gikan sa pagkatulog tungod sa usa sa labing bantog nga mga siloy o songbirds​—ang cardinal​—nagagama sa iyang salag nianang bahina sa kalibotan. Ang laking cardinal mangangkon sa iyang teritoryo pinaagi sa tin-awng pagtihol. Ug siya mahimong malahutayon ug hanas nga mag-aawit! “Ang usa ka laking cardinal nahitala ingong may 28 ka awit nga gilangkoban sa lainlaing mga kombinasyon sa mga silaba,” matud sa The International Wildlife Encyclopedia.

Kining matahom nga langgam maoy mga 20 sentimetros sa gitas-on, nga sinapotan sa dan-ag pulang mga balhibo uban sa iladong itom nga “babero” palibot sa iyang sungo. Ugaling, ang baye sinapotan sa sapot nga pus-ad brawon nga balhibo. Siya sakop sa usa sa diyutay rang espisye kansang mga baye makaawit.

Bisan kon diin ka magpuyo, sa sunod panahong makabati ka sa makapaikting honi sa usa ka siloy, pasalamati ang imong langitnong Maglalalang tungod sa iyang talagsaong kaalam ug katakos. Ang mga siloy o songbirds maoy usa sa iyang mga gasa sa kolor ug kasadya.​—Salmo 148:7-10.