Kon Unsaon Pagtapos sa Daghang Buluhaton sa Menos nga Panahon

‘Diin ba mopaingon ang panahon?’ Unsa ka subsob nga nasakpan mo ang imong kaugalingon nga nangutana niana? Kon ikaw sama sa kadaghanang tawo, lagmit ikaw nangutana niana sa mas daghang beses kay sa buot mong mahinumdoman.

Ang mosunod nagahatag sa mga sugyot gikan sa punto de vista sa usa ka babaye, apan sanglit ang mga babaye ug mga lalaki may samang gidaghanon sa panahon kada semana, ang pangutana, ‘Sa unsang paagi labaw kong mapahimuslan ang akong panahon?’ maoy pangutana nga buot matubag sa mga lalaki ug mga babaye.

Tinoa ang mga Palabihon

Sanglit ang tanang kalihokan sa kinabuhi nagakinahanglag panahon, may pila ka butang nga kinaiyanhong pagaunahon kay sa uban. Pananglitan, sa matugnaw nga buntag, walay butang nga tingali mas magustohan sa usa ka inahan kay sa pagpabilin ug dugaydugay sa iyang mainit-init nga katre. Apan ang orasan nagapasidaan nga oras na sa paghikayg pamahaw ug pagpagikan sa iyang bana ngadto sa trabaho ug sa mga bata ngadto sa eskuylahan.

Kinahanglang matino usab ang mga palabihon aron ang inyong panimalay moobra sa tukmang paagi. Adunay panahon sa pagpamalit sa pagkaon ug panahon sa pagluto niana; panahon sa paglimpiyo sa balay ug panahon sa pagpanglaba; panahon sa pagrelaks ug panahon sa pagtuon; panahon sa pagbantay sa homwork ug mga buluhaton sa mga bata​—ug ang listahan nagapadayon ug nagapadayon.

Ikaw ba nagatrabaho sa gawas sa panimalay? Kon mao, tungod sa dugang mga buluhaton nga humanon, ang panahon mahimong labi pang bililhon. Ikaw dili makausik niana, ni ikaw kanunay makaoktaba sa mga butang alang sa laing adlaw. Kana ang hinungdang daghang babaye nagaila nga ang usa ka eskedyul bug-os nga kinahanglanon aron matapos ang ilang buluhaton.

“Kon walay inadlaw nga eskedyul,” matud ni Josephine, inahan sa unom ka bata nga nag-edad gikan sa 2 ngadto 15 anyos, “Dili ko gayod malampos ang akong mga tumong alang sa matag adlaw.” Si Sandra, kinsa tulo ug anak, nagatrabaho sa gawas sa balay 25 ka oras sa usa ka semana, ug siya nagauyon: “Aw, kon wala pa akoy eskedyul, sa akong hunahuna ako mabuang.”

Dugang pa, ang imong mga palabihon pihong gitino sa bili nga imong gibutang sa panahon mismo. Kana mao alang kang Lola. Siya dili lamang may bana nga atimanon kondili nagadeboto usab gikan sa 90 ngadto 100 oras kada bulan sa iyang edukasyonal nga buluhaton sa Bibliya. Siya miingon: “Ang panahon hinungdanon kaayo alang kanako. Gibati ko nga matarong lamang nga dili magpahulat sa mga tawo. Ug sa dihang kadtong tingali dili kaayo estrikto makakita nga gipabilhan ko pag-ayo ang panahon, lagmit labaw pa nilang tahoron ang akong panahon.”

Organisaha ang mga Buluhaton

Nganong ang pila ka babaye daw dili gayod makahuman sa ilang trabaho? O nganong ang pipila kanunay nagareklamo bahin sa kakulang sa panahon? Mahimo kahang ang usa ka hinungdan mao nga sila napakyas sa pag-organisar sa ilang buluhaton? Sa nangaging mga kaliwatan kinahanglan sa mga babaye ang usa ka tibuok adlaw sa pagpanglaba ug sa ikaduhang adlaw sa pagpamalantsa, samtang sila inadlaw nga maniyangge ug magluto. Ugaling, sa kadaghanang nasod karong adlawa ang usa ka babaye makalimpiyo sa balay, makalaba ug makapauga sa mga sinina, ug makaluto nga dungan kon siya organisado. Ang modernong mga kasangkapan nagpahigawas sa daghang babaye aron motrabaho sa gawas sa balay ug sa gihapon nagaatiman sa mga panginahanglan sa pamilya.

Apan komosta ang panahong gigugol sa gawas sa balay? Ang dakong bahin niana, gawas sa panahong aktuwal nga gigugol sa pagtrabaho, magugol sa pagbiyahe ngadto-nganhi sa trabaho, paghulat sa mga opisina sa mga doktor ug mga dentista ug sa ubang dapit. Mapahimuslan mo ba ang maong panahon? Ikaw ba naganiting, nagagantsilyo, nagatusoktusok sa pagburda, o nagaburda? Ikaeskedyul mo ba ang pila sa maong mga kahibalo sa maong mga panahon ug mga lugar? Daghang babaye nagabasa, nagagamag mga listahan sa palaliton, o nagasulat. Ngani, sa sunod panahong molingkod ka sa pagtan-awg TV, nganong dili magtahitahi o magagamag mga butang alang sa pamilya? Basin mas moangay pa sila niini kay sa mga pinalit sa tindahan, ug ikaw may dayag nga pamatuod nga wala mag-usik ug panahon!

Hinuon, adunay laing bahin ang ulohan. Ang usa angay molikay sa pagkahimong mapig-oton kaayo aron sulayan pagpahimulos ang matag gutlo. Ikaw mahimong ulipon sa panahon, ug kana mohikaw kanimo sa kalipay. Adunay mga panahon nga ang usa gustong molingkod nga mahilomon ug mamalandong bahin sa nahimo sa usa. Ang maong mga gutlo tinuod nga bililhon!

Ikapadapat ang samang prinsipyo kon bahin sa pagdaginot sa kuwarta. Gikinahanglan ang katimbang. Basin ikaw molibot sa lungsod aron makadaginot ug pila ka sentabos, nga mogasto lamang ug mas dakong panahon ug gasolina sa pagbuhat niana. Hinuon, kon ikaw estriktong nagabadyet, importante ang pagdaginot. Busa tingali ang pagpamalit sa usa ka sentrong tindahan basin makatabang. Nasayod ka kon diin ang mga butang (nga makadaginot sa imong panahon), ug nasayod ko kon kanus-a ang baratilyo (nga makadaginot sa imong kuwarta).

Pagpili sa Kinamaayohang Panahon

Ang matag babaye dunay iyang kaugalingong orasan sa kahiladman. Ang pipila labing maayog kahimoan sa mabuntag; ang uban maayog kahimoan sa hapon. Kon ikaw usa ka tawong buntagon, ieskedyul gayod ang imong lisod nga mga buluhaton sa maong panahon. Gamita ang imong kahinguhaan sa imong mga kinalabwang yugto. Kon nagatrabaho ka sa gawas sa panimalay, nganong dili makigsulti sa imong amo? Sa imong kaayohan ingon man iyaha ang pagdelegar sa imong trabaho sumala niana. Kon, sa laing bahin, ikaw luyahon sa mabuntag, itagana ang imong labing hinungdanong trabaho sa hapon sa dihang ikaw mas maayog kahimoan.

Si Mary usa ka tawong buntagon. Ginaisip niya ang panahong gigugol niya sa iyang ministeryo nga mao ang labing hinungdanong bahin sa iyang adlaw. Busa nagbaton siyag inoras nga trabaho sa hapon. Kana nakapaarang niya sa pagdeboto sa iyang labing maayong mga oras sa iyang buluhaton sa pagpanudlo sa Bibliya. Mahimo ba nimo ang susama sa imong eskedyul?

Magmatinud-anon

Aron mapraktikal ang usa ka eskedyul, kinahanglang kini dili mag-apil sa daghan kaayong kalihokan. Ang pagsulay nga mahimong Super Mama, Misis, o Obrero mahimong motultol sa kahiubos ug pagbati sa kapakyasan. Kini matuod ilabina kon ikaw may mga suliran sa panglawas. Kat-oni ang pagtrabaho sulod sa imong mga limitasyon.

Si Dolly, kinsa may nagbalikbalik nga sakit, misaysay: “Nasentro ang akong panahon sa kalihokan sa akong bana. Siya usa ka nagapanawng ministro. Sanglit nagapuyo kami sa usa ka gamayng mobile home, sa dihang matapos niya ang iyang trabaho, unya akong buhaton ang akoa. Ang akong sakit nagapugong nako sa pagbuhat sa tanan nga buot kong buhaton. Apan sa dihang ako makaarang, ang akong ministeryo ang pagaunahon. Ang ubang butang sa panimalay biyaang dili matrabaho nianang adlawa.”

Magpaayon-ayon

Ang usa ka tigi sa kinaiya sa usa ka babaye mao kon unsaon niya pagdumala ilalom sa kapit-os. Kon siya makapabiling kalmado kon may suliran, labaw ang iyang mahimo kay sa madaot sa emosyon.

Nakaplagan ni Sandra ang sekreto sa pagkontrolar sa kapit-os. Siya miingon: “Kon motungha ang mga emerhensiya ug mobati akong giduot sa tanang kiliran, ako morelaks lamang. Nasayod ako nga kana katingad-ang paminawon, apan molampos kini. Sa dihang makontrolar ko na ang akong kaugalingon, unya makahukom ako kon unsay unahon sa pagbuhat. Kon dili ako morelaks, dili nako matino ang tukmang mga palabihon. Sa dihang kini matino na, unya akong paspasan ang akong mga kalihokan sa pag-atubang sa emerhensiya ug mahuman ang mga buluhaton. Pananglitan, kas-a nangabot ang mga bisita mga oras nga sayo alang sa panihapon. Inay matarantar, ako nagluto lamang samtang nag-abiabi kanila sa labing maayo kutob sa akong mahimo. Ang tanan narelaks ug nahimuot.”

Magpatabang

May nag-ingon kas-a nga ang labing maayong ehekutibo mao ang usa nga nagpaalirong sa may-katakos nga katabang. Nagapatabang ka ba sa uban sa trabaho? Sa dihang ang kaubang mga trabahante nasayod nga gipabilhan ang ilang tabang, sila mas daling moboluntaryo niana. Ang sama matuod sa panimalay. Ikasubo, ang pila ka babaye kutihan kaayong mga tig-atiman sa panimalay ug mga kusinera nga sila nagapalayo sa hinabang. Ug kanang tinamdana mismo mahimong mao ang hinungdan ang pila ka asawa ug inahan kanunay nga mabug-atan sa trabaho samtang ang mga sakop sa ilang pamilya nagalingkod nga maorag walay kabalaka.

Karon komosta ka man? Sa dihang gikinahanglan nimo ang tabang, gidasig ba nimo kana? Ikaw ba nangayo sa tabang, o ikaw ba nagapamugos niana? Ang “Alayon” mas nindot pamation kay sa “Gusto kong”​—kon kaha nagasulti ka sa imong mga anak o sa imong bana.

Usa ka babaye, nga nagdayeg sa iyang bana tungod sa tabang nga iyang gihatag kaniya, miingon: “Maayo kaayo siya bahin niana. Sa dihang lain ang akong pamati, iya akong pahigdaon, ug siya ang magluto, siya ug ang mga bata tanan moapil ug motabang sa pagbuhat sa mga buluhaton. Makaangay gayod ako niana!”

Pagkamaayong tinamdan nga mahuptan sa usa ka pamilya! Apan ang pangunang karakter sa maong kahimtang mao ang inahan. Makabansay siya sa iyang mga anak sa pag-amgo sa bili sa panahon ug pag-ugmad sa positibong tinamdan bahin sa trabaho. Ang maong mga anak sa kadaghanan gustong motabang kay sila makabatog kalipay tungod sa pag-amot ngadto sa komung tumong sa pamilya.

Di na mistil isulti, ang pila ka tawo nagausik ug panahon bisan kon unsay isulti o buhaton sa uban. Dili kita makabag-o kanila; makapauswag lamang kita sa atong kaugalingon. Makahukom kita nga magmatinud-anon mahitungod sa panahon, mahimong mas organisado, magtino sa tukmang mga palabihon, ug magpatabang kon gikinahanglan.

[Mga hulagway sa panid 15]

Ang mga palabihon kinahanglang matino aron ang imong panimalay moobra sa tukmang paagi