Nganong Asul ang Langit?

Ang dakong mga rehiyon sa wanang gitabonan sa kangitngit. Ang atong gitawag nga langit mao ang atmospera nga nagalibot sa kalibotan, ang rehiyon sa wanang nga makita sa tawhanong mata. Sa maghangad sa pagtan-aw niining dako nga hawan, ang wanang, daghan ang nahibulong, ‘Nganong asul man ang langit?’ Nganong dili man biyoleta, berde, dalag, orens, o pula​—ang pila ka pangunang mga kolor sa makitang spectrum o bangaw sa mga bulok?

Ang kahayag-sa-adlaw adunay mga kahayag nga nagkalainlaing ang wavelengths o gitas-on sa mga balod, nga makita ingong nagkalainlaing mga kolor sa makitang spectrum. Ang labing taas niining mga balora sa kahayag mao ang pula, ug ang labing mubo mao ang asul o biyoleta. Ang mga molekulang gas sa atong atmospera nagakatag ug mas daghang kahayag sa mubong wavelength, ang asul, kay sa taas nga wavelength, ang pula. Ingong resulta, ang tin-aw nga langit asul ug kolor. Ang hangin nga nagalibot sa yuta, uban sa dili-maihap nga mga partikulo niini sa solidong mga materyal, sama sa abog, nagpakatag sa kahayag nga nagahatag ug panagway sa pagkamakita, nga morag banaag gikan sa salamin.

Sa laing bahin, kon ang adlaw duol sa kapunawpunawan, ang kahayag sa adlaw mobiyahe diha sa mas daghang atmospera aron makaabot sa mata, ug kon mas taas ang maabot sa mga balod kay sa mubong mga balod, ang langit mahimong luto nga orens ug pula nga panagway. Ang solidong mga partikulo sa hangin mopasamot sa pagkapula. Sa susama, kon ang aso ug baga nga panganod molukop sa langit, ang mga balod sa kahayag sa tanang mga kolor makatag. Kini ang nagpahimo sa langit nga kolor-abo nga tan-awon.

Kining katingalahang pasundayag sa paggamit sa Diyos sa kahayag diha sa atmosperikong kalangitan nagpahinumdom kanato sa mga pulong sa salmista: “Ang mga langit nagapahayag sa himaya sa Diyos; ug ang hawan nagapadayag sa buhat sa iyang mga kamot.”​—Salmo 19:1.