Gikan sa Among mga Magbabasa
Mga Panimalay sa Nag-inusarang Ginikanan Gipasalamatan ko pag-ayo ang artikulong “Mga Batan-on Nangutana . . . Ako Kaha Manormal Uban sa Usa Lang ka Ginikanan?” (Hulyo 8, 1990) Ang akong amahan mibiya kanamo sa dihang ako dos anyos pa lang. Kadto nakaapektar sa akong emosyonal nga pagtubo. Ako nahimong sobra ka aktibo ug dili makahimog mga higala. Misugod ako sa pagpukgo sa tanang emosyon ug sa kadugayan gidala ngadto sa usa ka sikyatrista. Busa ang pagtubo diha sa usag-ginikanan nga panimalay dili maayong kahimtang alang sa tanang batan-on. Apan ang pagdawat ug pagsabot sa isigka-Kristohanon, ilabina ang mga isigkaingon, makapamenos sa tensiyon nga gibati sa pila ka batan-on nga may kalisdanan sa emosyonal nga paagi. Kinahanglang ako maningkamot aron makabaton sa maong mga higala. Ug karon, pinaagi sa balanse nga eskedyul diin ako nagagugol ug panahon kauban sa akong inahan ug bag-ong-kaplag nga mga higala, dili na ko mobatig kaluoy sa akong kaugalingon tungod kay ang akong pamilya “nadaot.”
T. A., Tinipong Bansa
Upat ka tuig nga miagi gibugto sa akong bana ang among kaminyoon. Samtang gibasa ko ang artikulo uban sa akong anak babaye, siya miingon: “Aw, normal ang akong gibati. Ako may mga ginikanan lamang nga anaa sa separadong mga balay!” Ang artikulo mipabati usab kanako nga normal ingong nag-inusarang ginikanan, nga nag-alsa gikan kanako sa kabug-at sa kabalaka ug pagbati sa sala ngadto sa akong anak.
J. C. P., Tinipong Bansa
Carbohydrate nga Merienda Linain nga pasalamat alang sa gamay nga artikulo bahin sa carbohydrate nga merienda. (Hulyo 22, 1990) Ako kasagaran magluto sa akong pamilya sa pasta nga pagkaon alang sa paniudto. Ako kapoyon ug kinahanglang mopahulay tapos niana. Karon ako nakasabot ngano. Ang pag-usob sa among diyeta dili kaayo makadaot sa akong lawasnong mga katakos ug maghimo kanakong mas masangkapan alang sa akong buluhaton sa pagsangyaw sa hapon.
J. W., Pederal Republika sa Alemanya
Uropanhong Ekumenikal nga Asembliya Salamat kaninyo alang sa artikulong “Gihukman Sumala sa Ilang Kaugalingong mga Pulong.” (Marso 22, 1990) Sa ilang pag-angkon mismo, ang mga relihiyon karong adlawa nasipyat sa tema sa Bibliya ug napakyas sa pagsalig sa Gingharian sa Diyos. Ikaw tinuod makaingon nga ‘pinaagi sa ilang mga pulong sila gihukman.’—Mateo 12:37.
D. P., New Zealand
Rosaryo Ang inyong ginaingon bahin sa Rosaryo (Hunyo 8, 1990) katunga lang nga kamatuoran. Ang dakong bahin sa mga pag-ampo gibase sa mga estorya sa Bibliya o maoy direktang mga kinutlo sa Bibliya. Busa ang pagrosaryo maoy maayong sinugdanan alang sa espirituwal nga kinabuhi. Adunay positibong mga resulta, sama sa kalinaw sa hunahuna ug kalipay niining kalibotan sa mga suliran.
H. W., Italya
Ang paggamit sa Rosaryo maoy minahal sa mga kasingkasing sa daghang sinserong Romano Katoliko. Bisan pa niana, ang among artikulo nagsentro sa isyu kon kaha ang tulomanon maoy kahimut-anan sa Diyos o dili. Ug bisan tuod ang memoryadong mga pangadye tingali naundan sa Kasulatanhong mga hunahuna, hinumdomi nga si Jesus mismo ang nag-ingon sa Mateo 6:7, 8: “Kon magaampo, ayaw ninyo sumaysumaya ang samang mga butang.”—ED.
Hubak Ako mapasalamaton sa artikulo bahin sa hubak. (Marso 22, 1990) Ako 16 anyos ug nag-antos niining sakita halos sukad sa pagkatawo. Ako wala mahibalo nga ang emosyonal nga suliran ug pila ka pagkaon makabikil sa mga pag-atake. Karon ipadapat ko na ang inyong tambag.
A. D., Espanya
Ang artikulo nakaikag kanako ingong usa ka hubakon nga gidali sa pagdala ngadto sa usa ka ospital pinaagig ambulansiya abot sa 12 ka beses sa tulo ka bulan. Ako sa nangagi nagtagad sa akong hubak ingong usa ka okasyon inay usa ka grabeng sakit. Apan human sa pagkaagom sa tulo ka paghunong sa gininhawa sa usa ka gabii, gihukom ko ang pagtomar nga regular sa akong tambal. Ako wala na maospital sulod na karon sa tulo ka tuig.
S. M., Australia