Ika-Beinteng Siglo nga Fax

GIKAN sa Nueva York ngadto sa Toronto sa menos usa ka minuto. Mao kana ang kapaspason sa fax. Unsa kini? Sa yanong pagkahubit, kini halayo nga pagkopya​—pakigkomunikar nga walay mga pulong. Sa Tinipong Bansa lamang, sobra sa usa ka gatos ka libong facsimile nga makina ang ginapalit matag bulan.

Ang mga doktor nagapadala ug medikal nga mga taho, mga abogado nagabalhin ug legal nga papeles, mga tindero nagakuha ug mga order, ug mga estasyon sa radyo nagadawat ug hangyo sa kanta gikan sa mga mamiminaw​—tanan pinaagi sa fax. Sulod lamang sa usa ka oras pagkahuman sa pagpanganak, usa ka inahan sa California nag-fax sa tunob sa iyang bata ngadto sa mga apohan nga nagapuyo sa lain nga estado.

Sa Unsang Paagi Kini Molihok?

Simple lang kaayo. Ang imo lamang gikinahanglan mao ang telepono, usa ka pansakanan sa bungbung ug usa ka fax nga makina. Usa ka dukomento ang ipasulod sa makina, diin usa ka nagaaninaw nga himan ang nagabasa sa tanan nga itom nga bahin sa panid, nagahubad niini ingong elektrikal nga mga sinyales, ug nagapadala niini pinaagi sa usa ka linya sa telepono. Usa ka nagadawat nga fax nagahubad niini pag-usab ingong itom nga panid ug moimprinta ug pareho nga kopya.

Asa Kining Maong Teknolohiya Naggikan?

Balik niadtong 1843 usa ka taga Scotland nga tighimo ug relo ug imbentor nga ginganlag Alexander Bain mihimo ug mipatente sa unang fax. Usa kadto ka menos lamang nga moaninaw nga himan kon itandi sa karong mga sukdanan. Usa ka elektrikal nga igkukulit nga nakabit sa punoan sa usa ka nagabitay nga pendulum nga ginaduyanduyan diha sa usa ka bloke sa metal, nga nagapadala ug elektrik nga sinyales latas sa mga telegrapong mga linya. Laing pendulum ang nagahubad sa matag pulso ingong itom nga bahin diha sa usa ka elektrosensitibo nga papel.

Sa pagka-1907 ang mga fax gihimo nga migamit ug usa ka nagatuyok nga dram ug usa ka potoelektrikong selula nga mahimong makabasag ordinaryong printa gikan sa usa ka papel nga giputos sa dram. Hinuon, ang pagpadala pinaagig radyo nga mga sinyales hinay ug kasagaran daghang samok.

Ang teknolohiya sa mga tuig 1980, nga nagagamit ug fiber optics, digital transmission, ug signal compression, nagpaposible ug mga fax nga makabasa ug makapadala ug matag pahina nga kapaspason sa tulo ka segundo ilalom sa espesyal nga kondisyon. Sa karon, ang kasagarang ginagamit nga mga makina adunay praktikal nga kapaspason sa pagpadala sa 45 segundo matag panid.

Sa Unsang Paagi ang Fax Gamiton?

Impormasyong dinalian nga kasagaran mapadala pinaagi sa pagkagabii nga mensahero o sa koreo mahimong mapadala na sa pipila lamang ka minuto. Importanteng mga dukomento i-fax ug mabatonan sa tigtungod sa mao-maong kadugayon nga ang usa ka sobre butangan sa adres, selyohan, ug ipadala kini.

Sa Canada usa ka bata ang bag-ohayng nahibal-an nga adunay seryoso, hulga-sa-kinabuhing medikal nga komplikasyon nga nanginahanglan sa dugo. Ingong mga Saksi ni Jehova, ang mga ginikanan lig-on sa ilang relihiyosong pagtuo nga dili gamiton sa bisan unsang mga sirkumstansiya ang dugo. Gikontak ang medikal nga mga tigsusi, ug sa pipila lang ka minuto mga artikulo gi-fax ngadto sa doktor nga nagadala sa maong kaso aron nga motabang sa medikal nga grupo sa pagsusi ug mga kapuli inay sa pagdugang ug dugo. Ang pagbuot sa mga ginikanan natuman, ug ang bata malamposon nga natambalan. Ang pamilya nakadayeg ug tungod niining medikal nga mga grupo sa ospital nga karon nagagamit na sa fax ingong instrumento sa pagpakig-ambit ug medikal nga mga protokol o lagda sa diplomasiya.

Bisan ang medya sa mga balita epektibong nagagamit sa fax. Sa 1989, sa dihang ang Intsik nga kasundalohan nagpahunong sa pag-alsa sa mga estudyante sa Tiananmen Square sa Beijing, China, ang gobyerno midumili sa telebisyon, radyo, ug mga pamalita. Mga linya sa telepono giablihan aron sa pagpabilin sa internasyonal nga himalitay, busa ang mga nagataho mi-fax sa balita ug mga hulagway sa mga tawo sa sulod sa Tsina ug sa tibuok kalibotan.

Ang industriya sa pang-anunsiyo migamit usab niini nga teknolohiya. Usa ka manedyer nagabatbat nga kon nagapadala ug mga pahibalo pinaagi ug fax, “ang mga mensahe adunay pagkadinalian ug pagkamapiliton. Sila mabasa dayon.” Apan kon kabahin sa daghang tag-iya ug fax, kini nga junk fax nagapakiglabot lamang sa ilang makina, nagasamok sa ilang pagbaton ug impormasyon nga hinungdanon sa ilang negosyo.

Sa ginapakita sa itaas, ang paggamit sa fax limitado lamang kutob sa imong imahinasyon. Hinuon, sama sa ubang bag-ong teknolohiya, adunay moabusar niini.

Unsa ang Kaugmaon sa Fax?

Usa ka inhinyero sa kompyuter nagalantaw nga ang mga fax mahimong mas paspas ug mas kinaadmanon. Sa dihang ang mga makina nga igo lamang sa lamesa mahimong maandan na sa mga negosyohanan, fax sa sulod opisina mao na ang mopuli sa koreyo sa sulod. Mahulagwayong mga facsimile, mao usab ang madala-dala nga mga fax, ginaugmad na. Usa ka kombinasyon nga copier/printer/fax nga mga makina nga giniyahan sa usa ka personal nga komputer maoy usa ka palaaboton. Usa ka dakong tighimo nagatagna gani nga $100 personal nga makinang fax ang gidak-on sama usa ka memo pad mahimong mabatonan.

Samtang ang telepono pa gihapon ang nagatagana sa dali nga komunikasyon, ang maong mga mensahe usahay dili mao o sayop ang pagsabot. Ang fax makahatod sa aktuwal nga mensaheng inimprinta​—ug paspas. Kini usa na karon ka importanteng himan sa komunikasyon sa atong mga kinabuhi. Miabot na ang panahon sa fax ug kini magpabilin.