Ang Imposibleng Ideya sa Opisinang Walay Papel

Ang kataposang laraw niining artikuloha giimprenta pinaagig kompiyuter ingong 11 ka panid sa hard copy—sa ato pa, diha sa ordinaryong mga panid sa papel.a Panahon sa proseso sa paghimog mga pagtul-id, ang artikulo giimprenta pag-usab pinaagig kompiyuter sa mga 20 ka beses. Sa kataposan, kini gipadala ngadto sa mga 80 ka tem sa paghubad sa tibuok kalibotan, nga human niana ang kada tem mag-imprenta pinaagig kompiyuter ug mga unom ka laraw alang sa paghubad. Nan, sa katibuk-an kining artikuloha nagkonsumo ug kapin sa 5,000 ka panid sa papel una pa gayod kini makaabot sa mga imprentahan!

KINING maong mga kamatuoran sumpaki kaayo sa mga panagna nga gihimo sa pipila sa pagsugod sa panahon sa kompiyuter—nga mao, “ang opisinang walay papel” hapit nang moabot. Diha sa iyang librong The Third Wave, ang moderno kaayog panan-aw sa umaabot nga si Alvin Toffler mipahayag pa gani nga ang ‘paghimog mga kopya sa bisan unsa diha sa papel maoy dili-inantigong paggamit sa elektronikong mga word-processing machine ug sukwahi sa tinuod nga katuyoan niini.’ Makaiikag, sa dihang ang International Business Machines Corporation naggamit sa ilang orihinal nga personal nga kompiyuter sa 1981, sila mihukom nga dili magtaganag printer. Ang pipila nag-ingon nga ang kompaniya nagtuo nga ang mga tiggamit malipay sa pagbasa sa impormasyon diha sa eskrin sa kompiyuter. Bisan unsa pa man, gipanan-aw sa uban ang “usa ka nindot nga kahimtang nga wala nay papel”—nga ang papel sa di madugay ipadaplin na lamang diha sa mga museyo ug abogong mga tipiganan sa mga dokumento.

Mga Posibilidad sa Pagkawala-nay-Papel Kontra Katinuoran

Apan, sa pagkatinuod, ang mismong kasangkapan nga gidahom nga mopahinabog opisinang walay papel miresulta sa nagadugang pa gayod nga paggamit sa papel. Gani, ang pipila nagbanabana nga ang katibuk-ang konsumo sa papel nag-uswag sa di pa dugayng katuigan. Si Scott McCready, usa ka analista sa International Data Corporation, miingon: “Ang atong nahimo pinaagi sa paggamit ug awtomatikong kasangkapan diha sa atong mga opisina mao ang pagpauswag sa atong katakos sa pagpatunghag naimprentang mga panid diha sa nagatubong gikusgon nga kapin sa 25 porsiyento kada tuig.” Ang personal nga mga kompiyuter, printer, fax machine, E-mail, mga makinang tigkopya, ug ang Internet nakapauswag kaayo sa gidaghanon sa impormasyon nga atubangon—ug iimprenta—sa daghang tawo kada adlaw. Sa tibuok kalibotan sa 1998, sumala sa CAP Ventures, Inc., dihay 218 ka milyong printer, 69 ka milyong fax machine, 22 ka milyong daghag-gamit nga mga makina (printer, scanner, ug tigkopya nga giusa), 16 ka milyong scanner, ug 12 ka milyong tigkopya.

Diha sa iyang 1990 nga libro, ang Powershift, gibanabana ni Toffler nga sa usa ka tuig ang Tinipong Bansa nagpatunghag 1.3 ka trilyong dokumento—igo nga motaptap sa Grand Canyon sa 107 ka beses! Sumala sa mga taho, ang gidaghanon nagadugang. Sumala sa usa ka tinubdan, sa pagka-1995 ang Tinipong Bansa nagpatunghag duolan sa 600 ka milyong dokumento matag adlaw—igo nga mopuno ug usa ka hunos sa payl nga 270 kilometros ang gitas-on. Samtang namanagbanag ang tuig 2000, dunay gamayng pamatuod nga nagkausab ang kahimtang; ang kadaghanang impormasyon ginapasa gihapon diha sa papel.

Kon Nganong Gigamit Gihapon ang Papel

Nganong nasayop ang mga panagna nga ang elektroniks maoy mopuli sa papel? Ang International Paper nga kompaniya misulay sa pagpanaghap, nga nag-ingon: “Ang mga tawo dili lamang gustog impormasyon nga daling makuha pinaagig mga pagtulpok diha sa tapoyanan sa kompiyuter. Gusto nila kining gunitan. Gusto nilang mohikap, mopilo ug mobutang ug timaan; mo-fax, mokopya ug mosusi; mosulatsulat diha sa mga daplin o mapasigarbohong mopatapot diha sa pultahan sa repridyeretor. Ug, labaw sa tanan, gusto nilang moimprenta—sa madali, mahapsay ug sa magilakong kolor.”

Angayng angkonon nga ang papel adunay tinong mga bentaha. Kini madaladala, barato, durable, sayon tipigan, ug maresiklo. Kini usab sayon kaayong subayon—imong makita kon asa ka nang panira ug kon pila na lang ka panid ang nabilin nimo. “Ang mga tawo moangay ug papel. Gusto nila kining hikapon,” matod ni Dan Cox, hawas sa usa ka kompaniya nga namaligyag mga suplay sa opisina. “Kami nakakita ug mga tawo nga nagtinguhang matinuod ang opisinang walay papel,” matod ni Jerry Mallory, tig-analisar sa mga dokumento sa Arizona Department of Libraries, Archives and Public Records. “Apan ang tanang linibo ka kompiyuter nga among nakita adunay gikausahang usa ka butang: Kining tanan konektado sa labing menos usa ka printer.”

Unya, dugang pa, lisod usbon ang karaang mga batasan. Ang mga tawo nga nagnegosyo karon gitudloan sa bata pa sila sa pagbasa sa pinatik nga panid. Ang usa ka dokumento o E-mail maimprenta pinaagi sa usa lamang ka paghagtik sa mouse ug dayon kombenyente nga mabasa sa naggunit, bisan asa siya sa maong higayon. Ang pinatik nga materyal mahimong dad-on sa daghang dapit diin ang mga kompiyuter dili kombenyenteng magamit—bisan asa gikan sa higdaan o bathtub o dakong toalya nga gihapin diha sa baybayon!

Lain pang butang: Ang mga kompiyuter nagpasayon alang sa mga tawo sa paghimo sa matang sa mga dokumento nga di pa dugay kanhi mahimo lamang sa propesyonal nga mga printer. Bisag unsa gikan sa daghag-kolor nga mga kopya, mga laraw, ug mga taho ngadto sa giilustrar nga mga presentasyon, tsart, grapika, calling card, ug mga postkard sayon rang himoon. Ang maong mga posibilidad makapaaghat ug dugang nga mga pag-eksperimento. Busa human moimprentag dokumento ang usa ka tiggamit ug kompiyuter, tingali matental siya sa pag-usab sa estilo sa letra ug disenyo ug iimprenta kini pag-usab. Tingali sundan kini sa dugang mga pag-usab-usab ug, nakatag-an ka, dugang pang mga pag-imprenta!

Ang Internet nakaamot usab niining kahimtanga pinaagi sa pagpaposible sa mga tawo nga makakuha ug halos way-limiteng impormasyon.b Dili kalikayan, kini mosangpot ug dako kaayong konsumo sa papel, tungod kay ang mga tiggamit sa Internet kasagarang moimprentag hard copy sa resulta sa ilang panukiduki.

Dili usab ikasalikway mao ang kamatuoran nga ang presenteng pagbaha sa software ug kasangkapan sa kompiyuter nanginahanglan ug mas daghang libro nga naghatag ug praktikal nga mga instruksiyon. Ang kaylap nga paggamit sa mga kompiyuter nagpatunghag hilabihan ka daghan nianang mga libroha ug mga magasin sa kompiyuter.

Angay usab angkonon nga ang pagbasa gikan sa eskrin sa kompiyuter—ilabina sa eskrin sa karaang mga kompiyuter—adunay mga disbentaha. Ang pipila ka tiggamit nagreklamo gihapon sa pagsakit sa mata. Bisan unsa pa man, gibanabana nga ang katin-aw sa eskrin sa mas karaang mga kompiyuter kinahanglang pauswagon ug napulo ka pilo aron mahimong ekselente ang kalidad sa katin-aw niini.

Dugang pa, alang sa uban, ang usa ka pirasong papel morag mas kinahanglanon ug hinungdanon—mas direkta ug may epekto—kay sa usa ka butang nga imong makita diha sa eskrin. Ang usa ka naimprentang dokumento daw nagpamatuod sa kahago ug paningkamot sa usa, nga naghimo niini sa dagway nga makuptan. Ang pisikal nga dokumento nga gitunol ngadto sa superbisor o kliyente sa usa mahimo pa ganing makadawat ug labawng pagtagad ug mas makakuhag reaksiyon kay sa usa ka elektronikong mensahe.

Sa kataposan, daghang tawo ang nahadlok nga mawala nila ang impormasyon. Ug ang maong kahadlok sagad nga makataronganon. Bisan pa sa tanang komplikadong mga sistema sa pagtipig ug impormasyon diha sa kompiyuter nga naglungtad karon, ang bililhong mga pulong nga naghawas sa mga oras nga gigugol sa pagtrabaho nailalom gihapon sa gahom sa kalit nga pagsulbong sa agos sa koryente, pagkadaot sa disk, o usa ka sayop nga pagtulpok diha sa tapoyanan sa kompiyuter. Busa, ang kadaghanang tawo nag-isip sa papel nga mas segurado. Makaiikag, ang ubang mga eksperto nag-ingon nga ang elektronikong mga rekord mabasa lamang sa mubo kaayong panahon, kon itandi sa walay-asidong papel nga molungtad ug 200 hangtod 300 ka tuig. Tinuod, ang elektronikong impormasyon dugay kaayong madaot. Apan kusog kaayong nagaugmad ang teknolohiya. Ug sanglit dili na magamit ang karaang mga hardware ug software, mahimong magkaanam ug kalisod nga basahon ang mas karaang mga rekord sa kompiyuter.

Busa tan-awonon pa kon matuman ba o dili ang pangandoy alang sa opisinang walay papel. Sa kasamtangan, tin-aw nga, sa paghulam ug mga pulong gikan kang Mark Twain, ang mga taho nga ang paggamit ug papel nagakawala na tingalig gipasobraan ra kaayo.

Ato Bang Malaglag ang Tanang Kahoy?

Pila ka palid sa papel ang mahimo gikan sa usa ka kahoy? Bisan pag daghang nagkadaiyang mga hinungdan ang nalangkit—sama sa gidak-on ug matang sa kahoy ug ang matang ug kabug-at sa papel—gibanabana nga ang usa ka kahoyng gam-onong papel nga may gidak-on nga angayan nang ibaligya mopatunghag 12,000 ka palid sa ordinaryong papel nga sulatanan o gamiton sa pag-imprenta. Bisan pa niana, ang hilabihan ka daghang papel nga ginagamit sa pagkakaron nagpatungha gihapon ug makahahadlok nga hulagway sa umaw, gipuril nga kalasangan. Kita ba nagapadulong gayod sa usa ka krisis sa ekolohiya?

Ang mga tiggama ug papel nagpasidaan batok sa pagkalisang bahin niini. Sila dihadihang mopunting nga ang daghan kaayong papel—ingon ka daghan sa 50 porsiyento sa pipila ka kayutaan—ginama gikan sa mga sinapsap sa kahoy, mga biya sa industriya sa kahoy nga idapog unta sa mga tambakanan. Dili lamang kana, samtang nagakadugta ang mga sinapsap sa kahoy, kini mopagula ug methane, usa ka greenhouse nga gas nga nalangkit sa pag-init sa kalibotan. Busa ang mga tiggamag papel nagagamit niining maong mga sinapsap sa maayong paagi. Apan, ang mga grupo nga tigpaluyo sa kalikopan ug mga gumagamit misanong pinaagi sa pag-akusar sa industriya sa papel nga nagpatunghag polusyon ug sayop nga nagdumala sa kalasangan. Sila nangatarongan nga ang mga sugnod nga gigamit sa paggamag papel mopatunghag greenhouse nga mga gas! Sila usab nagpunting nga samtang nagakadugta ang mga basurang papel diha sa mga tambakanan, dugang greenhouse nga mga gas ang ginapatungha.

Bisan pa niana, ang usa ka pagtuon sa World Business Council for Sustainable Development mihinapos nga posibleng magpatungha ug kinahanglanong gidaghanon sa papel nga dili maghurot sa mga kahinguhaan sa yuta. Ang usa ka hinungdan mao nga ang mga kahoy motubo pag-usab, ug ang papel maresiklo. Bisan pa niana, gipasiugda sa pagtuon nga “dugang mga kausaban ang kinahanglang himoon sa industriyal nga mga kagawian sa matag hugna sa siklo sa papel—pagdumala sa lasang, paggamag pulp ug papel, paggamit ug papel, pagresiklo, pagpasig-uli sa enerhiya, ug kataposang pagsalibay.” Sa usa ka paningkamot nga makapatunghag pulp nga makaayo sa kalikopan ug baratong gamiton, ang industriya sa papel naglantaw usab sa mga kapilian sama sa dagami sa trigo, kusog-motubo nga mga kahoy, mais, ug lanot. Kon sa unsang gilapdon ang maong mga paagi igapadapat—ug mapamatud-ang epektibo—tan-awonon pa.

[Mga footnote]

[Kahon sa panid 27]

Kon sa Unsang Paagi Mamenosan ang Pag-usik sa Papel sa Opisina

✔ Gamaya ra ang iimprenta kon posible. Repasoha ug usba ang mga dokumento diha sa eskrin. Menosi ang gidaghanon sa mga hard copy ug mga laraw diha sa papel nga imong himoon.

✔ Alang sa dakodakong mga dokumento, gamita ang mas gagmayg mga sukod nga estilo sa letra nga mabasa gihapon.

✔ Kon ang imong printer mogamit ug usa ka panid alang sa pruyba o banner sa matag higayon nga paandaron kini o nag-imprentag dokumento, ipahiangay ang printer nga laktawan kining bahina.

✔ Iresiklo ang basurang papel.

✔ Sa dili pa iresiklo ang papel nga may imprenta sa pikas lamang nga bahin sa panid, laina kini aron gamiton sa ulahi, sa pag-imprenta ba kahag mga laraw o aron gamiton ingong gamayng pirasong papel.

✔ Paghimog mga pag-imprenta o mga kopya sa atubangan ug likod sa papel kon posible.

✔ Kon kinahanglang ambitan ang mga dokumento sulod sa opisina, sulayi nga ilibot kini imbes nga mohimog kopya alang sa kada tawo.

✔ Aron wad-on ang panginahanglan alang sa hard copy, magpadalag mga fax nga direkta gikan sa imong kompiyuter. Kon kinahanglan kang mag-fax ug mga hard copy, pagdaginot ug papel pinaagi sa dili paggamit ug hapin nga panid.

✔ Likayi ang wala-kinahanglanang pag-imprenta ug E-mail nga mga mensahe.

[Hulagway sa panid 24]

Ang pipila nangatarongan nga ang mismong kasangkapan nga gidahom nga mopahinabog opisinang walay papel miresulta sa nagadugang pa gayod nga paggamit sa papel

[Hulagway sa panid 26]

Usahay, ang pinatik nga panid mas sayon nga gamiton kay sa eskrin sa kompiyuter