Kahoy nga Nagatabang sa mga Tawo sa Pagmata!

Sinulat sa koresponsal sa Pagmata! sa Sweden

ANG pag-imprenta sa magasing Pagmata! nga imong gikuptan sa imong kamot nagadependeg dako sa usa ka palakaw nga nagasugod sa lasang. Ang mga lawas sa kahoy nagatagana sa materyales alang sa papel. Kini mao ang sinugdanan niini. Apan mopasiyo kita pinaagi sa hulagway ug tan-awon sa unsang paagi ang usa ka kahoy mahimong magasin nga sama sa Pagmata!

Ang kasangkapan sa unang hulagway mao ang modernong makinang tigpukan, usa ka prosesor, nga nagaandar. Kini dili lamang mopukan sa mga kahoy kondili motangtang usab sa mga sanga. Dugang pa, kini mogabas sa mga troso sa nahiangayng mga gitas-on. Ang kahoy dad-on pinaagi sa trak o tren ngadto sa galingan sa papel. Ang kargadong trak mohatod ug 20 ka tonelada sa usa ka panahon. Sa galingan sa papel nga giduaw sa Pagmata! alang niining tahoa, ang usa ka paghatod sa kahoy moabot kada 15 minutos sa tibuok nga adlaw. Ang usa ka tibuok nga seksiyon daling idiskarga pinaagig higanteng makinang kimpit, sumala sa makita sa kataposang hulagway sa panid 25.

Daghan nianang mga kahoya ang gikinahanglan alang sa usa ra ka isyu sa Pagmata! Sanglit daghan kaayong papel ang gamiton kada tuig, daghang kahoy ang pagaputlon. Hinuon, sa Sweden kini usa ka kontrolado kaayong palakaw. Ang mga awtoridad motugot lamang sa pagpamutol kon tamnan pag-usab ang katumbas nga mga luna, ug niining paagiha, ang kalasangan sa Sweden padayong maulian.

Ang diagrama sa panid 25 nagapakita sa palakaw sulod sa makina sa papel. Ang pulpa ipakaon sa usa ka tumoy sa linya, ug ang papel mogawas sa pikas nga tumoy. Apan unsaon paggama sa pulpa?

Ang troso putolputolon una ngadto sa nahiangayng mga gitas-on, ug ang panit tangtangon sulod sa higanteng mga dram. Dayon ang kahoy awtomatikong klasipikahon sumala sa gibag-on ug gitas-on. Ang kahoy nga makakab-ot sa pila ka sukdanan kombertihon nga groundwood pulp sa galingan. Kini nga pulpa maoy usa sa upat ka lainlaing matang nga gigamit sa paggamag papel sa maong galingan. Ang nahibiling kahoy tipaktipakon ug gamiton sa paggamag thermomechanical pulp ug sulfite pulp. Ang ikaupat nga matang sa pulpa nagagikan sa gi-recycle nga papel.

Ang groundwood pulp gam-on pinaagi sa paggaling, nga ubos sa presyon ug tali sa dagkong mga batong galingan, sa kahoy uban sa tubig. Ang resulta mao ang gigama sa makina nga pulpa.

Ang thermomechanical pulp magama pinaagi sa pagpino sa mga tipak sa kahoy ubos sa hataas nga presyon ug kainit mao nga ang mga lanot mabulag sa usag usa. Kini nagahatag sa mas taas ug mas lig-ong mga lanot kay sa mekanikal nga paagi.

Ang sulfite pulp gigama sa kemikal nga paagi. Kini andamon diha sa dagkong mga sudlanan nga magdunot sa mga tipak sa kahoy pinaagi sa pagpabukal niana uban sa magnesium bisulfite, sama sa diha sa pressure cooker. Kini mogama sa labing lig-ong pulpa kay sa unang tulo ka matang.

Ang ikaupat nga matang, ang pulpa gikan sa gi-recycle nga papel, gam-on tapos ang nausar nga papel napulpa ug nahinloan sa daang tinta ug papilit.

Sa kataposan, diha sa tiglikit ang dagkong mga likit sa papel putlon sumala sa mga sukod sa pumapalit ug dayon puston. Ang nakompletong mga likit klasipikahon sumala sa destinasyon ug unya ipadala sa trak, tren, o barko ngadto sa pumapalit.

Ang papel karon nakaabot sa imprentahan sa Arboga. Ang likit ipakaon sa usa ka makina nga moputol sa papel ngadto sa nahiangayng sukod alang sa bag-ong full-color sheetfed nga imprentahan sa Sweden. Kining bag-ong imprentahan makaimprentag 15,000 ka impresyon sa usa ka oras.

Ang matag isyu ipadala ngadto sa mga suskritor sa Sweden ug sa gawas sa nasod. Dugang pa, ang mga bangan sa mga kopya aron iapod-apod sa publiko ginapadala ngadto sa ginatos ka kongregasyon sa mga Saksi ni Jehova sa tibuok nga nasod. Ang libolibong kopya gikan sa maong mga bangan ginabilin sa mga Saksi sa ilang pagduaw sa mga balay sa katawhan o sa dihang mahibalag nila sa ubang dapit.

Oo, ang maong lawas sa kahoy sa lasang nakaabot sa kataposan niining destinasyon​—ang magasing Pagmata! Matikdi, palihog, nga ang Pagmata! nagaapil sa mga artikulo nga nagapahibalo ug nagapamata sa mga magbabasa ngadto sa kahulogan sa mga hitabo sa kalibotan sa kahayag sa tagna sa Bibliya. Sa ingon kini nagatabang sa mga magbabasa sa pagkabalo bahin sa Maglalalang sa tawo ug sa Iyang katuyoan alang sa atong adlaw. Ang maong kahibalo motabang nimo sa pagsabot sa kahulogan kon unsay nagakahitabo sa atong panahon ug motabang usab nimo sa pag-ugmad ug lig-ong paglaom sa mas maayong kaugmaon.

[Kahon/​Diagram sa panid 25]

Ang Makina sa Papel

A. Ang pulpa nga mahiabot sa makina sa papel kaamgid sa lasawng linugaw ug ipahid sa ubay-ubayng metros nga gilapdon sa wire-gauze conveyor belt. Niining puntoha ang pulpa maoy mga 99 porsientong tubig. Kadaghanan ning tubiga mawagtang sa pagbiyahe agi sa makina, nga mga 70 metros sa gitas-on.

B. Ang gidaghanon sa tubig makubsan ngadto sa mga 60 porsiento sa seksiyong tigpiga. Ang tubig mapiga pinaagi sa makina, nga kasagarang kauban sa tigsuyop.

C. Sa seksiyong tigpamala, ang hut-ong sa papel pamalhon sa gipainit-sa-alisngaw nga mga silindro.

D. Ang pagpasinaw mopahamis pa sa papel, ug kini ginahimo pinaagi sa pagpaagi sa papel tali sa mga roller. Singko porsiento lamang sa tubig ang mabilin sa dihang ang papel sa kataposan likitong mga rolyo.

[Diagram] (Alang sa aktuwal nga pagkahan-ay, tan-awa ang publikasyon)

Ulo nga kahon Parteng alambre Seksiyong tigpiga Seksiyong tigpamala Pagpasinaw

Basang tumoy Paglikit

[Mga hulagway sa panid 26]

Ang sangang-buhatan sa Arboga, Sweden

Mga likit sa papel nga gikamada