Abtik sa Pagtabang sa Uban
SAMTANG nagatrabaho sa Dade County Criminal Traffic Courthouse, usa sa mga Saksi ni Jehova sa Miami, Florida, nakahigayon sa paghatag ug espirituwal nga tabang sa kaubanan sa trabaho. “Usa ka adlaw,” si Rafael misulat, “usa ka babaye kinsa regular nga nagadawat ug kopya sa mga magasing Bantayanang Torre ug Pagmata! gikan kanako nag-ingon nga usa ka magbabaligya mitanyag kaniya sa usa ka ensiklopedia sa Bibliya alang sa iyang otso-anyos nga anak lalaki nga $500 ang bili apan dili siya makaabot niadto. Ako dayong gitanyag kaniya nga dad-an ko siya ug usa ka tomo sa publikasyong Akong Basahon sa mga Estorya sa Bibliya. Sa sunod nga adlaw akong gidala kini, ug siya nahimuot sa mga ilustrasyon ug midayeg sa libro.
“Iyang gibutang ang libro sa iyang lamesa ug mipadayon sa pagtrabaho. Wala ray 15 minutos, laing empliyado miduol sa akong lamesa nga nagdalag Akong Basahon sa mga Estorya sa Bibliya; buot niyang mahibalo diin nako kuhaa ang libro. Akong gipahayag nga ang Watch Tower Society mao ang nagpatik niana. Buot niya ug tulo ka kopya alang sa iyang mga anak. Siya nagtudlo sa Sunday school ug mibati nga kining libroha dako ug ikatabang sa iyang klase. Siya miingon nga pahibaloon lang ako niya kon kanus-a siya magkinahanglan na usab ug dugang pang mga kopya.
“Sa milabay ang tunga sa oras, lain na usab nga kauban sa trabaho miduol kanako nagbitbit sa libro, buot mahibalo kon makakuha ba siya ug tulo niadto. Wala madugay ang uban usab nangutana bahin sa maong libro, ug sa wala lamang nako damha, nakuha ko ang 12 ka pedido sa Akong Basahon sa mga Estorya sa Bibliya. Ang mga babaye gani naglagot kanako sa wala pagsulti kanila mahitungod sa maong libro sa sinugdanan pa! Sa pagkasunod nga adlaw sa trabahoan, gidala nako ang mga libro sa opisina ug gihatod kini ngadto sa mga tawo nga mihangyo niana.
“Sa pagkasunod semana ang magtutudlo sa Sunday-school miingon nga siya nagkinahanglan ug 15 ka libro alang sa iyang mga estudyante. Siya naghulat lamang sa pag-uyon sa pari ug usab sa superintendente sa eskuylahan. Ang pari, matud pa niya, nahimuot sa libro ug midayeg sa iyang daghang mga ilustrasyon. Siya mihatag sa pag-uyon sa pagbaton sa maong mga libro.
“Ang magtutudlo sa Sunday-school buot nga mohatag sa maong mga libro sa mga anak ingong gasa sa Pasko. Nahibalo siya nga ako dili mosaulog ug Pasko, apan kining libroha maoy usa ka maayong gasa sa Pasko. Siya miingon kanako nga masayon ang pagkuha sa atensiyon sa mga bata sa dihang iyang basahan sila gikan sa maong libro.
“Usa ka kauban sa opisina miingon nako nga iyang ginabasa ang maong libro sa iyang mga anak magabii ug gani siya daghag nakat-onan. Pananglitan, siya wala mahibalo nga duna diay mga higanteng nagpuyo sa yuta sa panahon ni Noe. Laing kauban sa trabaho miingon nga usa ka henyo seguro ang mihimo sa mga ilustrasyon sa libro. Sila maorag tinuod. ‘Ang libro maoy usa gayod ka mutya,’ siya miingon.
“Tanan-tanan, sa pipila lamang ka adlaw, ako nakapahimutang ug 32 ka kopya sa Akong Basahon sa mga Estorya sa Bibliya sa trabahoan, ug kini nagdaghan pa. Sa matag panahong ipakita nako ang libro diha sa usa ka tawo, sila mangutana, ‘Diin nimo kana kuhaa?’”
Ikaw ba abtik sa pagtagbaw sa espirituwal nga panginahanglan sa uban? Si Rafael, nga karon usa na ka Kristohanong ansiano diha sa usa ka kongregasyon sa mga Saksi ni Jehova sa Miami, mihinapos: “Kini nga eksperyensiya nagtudlo kanako mahitungod sa dili-pormal nga pagsangyaw ug pagkaandam sa pagtabang sa uban.”