“Angay Lamang nga Buhaton Mo Kini”

Sinulat sa koresponsal sa Pagmata! sa Colombia

USA ka batan-ong magtiayon nga gikan sa Missouri sa Tinipong Bansa misaysay: “Kami unang nakadungog mahitungod sa International Volunteer Construction Worker Program sa ting-init sa 1988 sa dihang ang pipila ko ka higala namauli gikan sa usa ka asaynment sa sangang buhatan sa Watch Tower Society sa Honduras, Sentral Amerika. ‘Angay lamang nga buhaton mo kini!’ sila miingon, nga nagbulabulang nag-estorya.”

Ang programa sa konstruksiyon nga gihisgotan mao ang usa nga giugmad sa mga Saksi ni Jehova alang sa pagtukod sa ilang mga sangang buhatan sa tibuok kalibotan. Aron mahimong kuwalipikado alang niini, ang umaabot nga mga trabahante kinahanglang motrabaho una sa opisina sa hedkuwarter sa Watch Tower Society sa Brooklyn, New York, diin ang ilang batasan sa pagtrabaho ug mga abilidad matimbangtimbang. Busa gikontak sa bana nga gikan sa Missouri ang opisina sa Sosyedad sa Brooklyn ug mibolunter sa pagtrabaho didto nga temporaryo.

Samtang didto sa hedkuwarter sa Brooklyn, ang bana mipirma sa pagtrabaho sa laing nasod. Unya, sa pagpauli ngadto sa Missouri, siya ug ang iyang asawa nagsugod sa pagtigom alang sa ilang gipaabot nga biyahe. Sa milabay ang pipila ka bulan miabot ang ilang asaynment. Sila gipaadto sa Colombia, sa Habagatang Amerika!

Gikan sa 1987 ngadto sa 1990, kapin sa usa ka libo ka temporaryong bolunter nga mga trabahante maoy mibayad sa ilang kaugalingong plete ngadto sa Colombia aron sa paggugol gikan sa duha ka semana ngadto sa duha ka bulan sa pagtukod ug dako bag-ong sanga nga patikanan sa mga Saksi ni Jehova didto. Dugang pa, duolan sa 80 ka bolunter nga gikan sa 14 ka nagkalainlaing mga nasod nakagugol ug kapin sa usa ka tuig sa pagtrabaho niining dakong proyekto sa Colombia. Ang uban niining mubog-abot ug taas-ug-abot nga mga trabahante nakatabang niadto sa pagtukod ug bag-ong mga pasilidad sa sanga diha sa mga nasod sama sa Nigeria, Pilipinas, Guyana, El Salvador, Guatemala, Costa Rica, Peru, ug Ecuador.

Ang bolunter nga mga trabahante nga miabot sa Colombia gitabangan sa ilang mga tig-abiabi sa pag-adto sa imigrasyon ug sa aduwana. Unya gihatod sila sa kotse ngadto sa dapit sa konstruksiyon sa Facatativá, nga duolag 50 ka kilometros sa amihanang-kasadpan sa Bogotá.

Pagpasinati

Alang sa usa ka bag-ong abot, ang unang adlaw sa proyekto nag-apil sa pagpasiyo sa mga pasilidad ug mga instruksiyon mahitungod sa pagkinabuhi ingong bahin sa internasyonal nga mga trabahante. Ang kadaghanan sa mga internasyonal nga trabahante sa konstruksiyon​—sa mga katuigang dili pa dugay hatagan ug 40 ngadto sa 60 sa bisan unsang panahon​—sa pagpuyo sa mga pasilidad sa pangbalay nga napalit duol sa dapit nga tukoran.

Ang bag-ong mga trabahante sa konstruksiyon makadawat ug mga instruksiyon mahitungod sa iskedyol sa pagtrabaho, sa pagtambong sa Kristohanong mga tigom, sa pakigbahin sa hinapos sa semana nga kalihokan sa pagsangyaw, ug sa hustong pag-atiman sa ilang mga puy-anan. Ihatag usab ang impormasyon mahitungod sa pagpalaba, ug sa pakig-ambit sa programa sa buntag sa paghisgot sa Bibliya ug sa nalangkit nga mga butang.

Ang mga lawak nga gitagana haruhay, ang pagkaon init ug sustansiyado, ug ang mga labada moabot sa maong adlaw, linabhan ug plansado. Bisan ang medikal nga pag-atiman mabatonan. Walay gisipyatan aron sa paghimo sa mga butang nga mahapsay kutob sa mahimo alang sa mga trabahante sa konstruksiyon.

Ang mga bag-ong abot kasagarang matingala sa pagkaplag nga ang proyekto sa pagtukod mas dako kay sa ilang gilaoman. Diha sa usa ka bakilid paingon sa dakong lasang diha sa bukid sa likod, nagkaguliyang ang kalihokan sa dos-andanas nga residensiya nga mga tinukod. Kini sa ulahi magpapuyo ug 250 ka membro sa kawani sa sanga sa Colombia, nga gitawag pamilyang Bethel. Sa nangaging mga bulan, ang bag-ong mga abot nakakitag mga trabahante nga nagtaod sa mga tubo sa tubig, sa mga alambre sa koryente, ug steel-stud framing sa bungbong.

Ang komedor, nga haruhayng makapalingkod ug 400, puno sa 600 o kapin pa sa mga panahon sa hinapos sa semana sa dihang ang panon sa lokal nga trabahanteng mga bolunter mangaon sama sa kapeteriya. Gawas sa pila ka pangataposang trabaho, ang komedor karon hapit nang matapos.

Diha sa dako dos-andanas nga tinukod alang sa pabrika, mibalhin ang Shipping Department ug ang Job Press Department. Samtang ang bag-ong mga nangabot miagi sa ikaduhang andana sa pabrika, ang usa nga nagdumala sa paglibot sa lugar mapasigarbohong nagtudlo sa dako bag-ong Hantscho rotary offset nga prensa sa pagpatik. Daghang mga membro sa lawak nga patikanan sa Brooklyn mao ang nagdumala sa pagtaod, nga gitabangan sa ubang mga bolunter.

Kining gikontrolar sa kompiyuter nga patikanan​—65 ka tonilada ug 88 piye ang gitas-on​—mao ang usa sa labing maayo nga mabatonan karong adlawa. Kini karon nagapatik ug 38,000 ka kopya sa usa ka oras sa Kinatsilang mga edisyon sa Ang Bantayanang Torre ug Pagmata! nga mga magasin alang sa pagpanagtag sa tibuok amihanang-kasadpan sa Habagatang Amerika. Kapin sa 155,000 ka mga Saksi ni Jehova sa Colombia, Venezuela, Panama, Ecuador, ug Peru bag-o pang nakadawat sa ilang mga magasin gikan niining maong patikanan​—nga de-kolor.

Local nga Pagsuportar

Daghang mga bolunter nga taga Colombia diha usab sa proyekto sa pagtukod, mga lalaki ug babaye. Sila mapasigarbohon nga nagtrabaho sa ilang bag-ong sanga, sumala sa ilang pagtawag niana. Ang uban niini temporaryong nagpuyo sa pamalay duol sa lugar sa konstruksiyon, ug uban regular nga mobiyahe gikan sa Bogotá ug sa ubang kasikbit nga mga lungsod. Sa mga hinapos sa semana ug sa mga piyesta opisyal, dugang 50 ngadto sa 150 ka boluntaryong trabahante ang moabot, pulipuli, gikan sa duolan sa usa ka gatos ka kongregasyon sa mga Saksi ni Jehova sa Bogotá ug sa kasilinganan niini.

Usa ka bolunter nga trabahante sa konstruksiyon nga gikan sa Canada, nga hanas sa steel-stud framing ug pagtaod sa bungbong nga drywall, miingon: “Ang lokal nga mga igsoon dinhi maikagon kaayong makakat-on, ug ang kalidad sa ilang trabaho maoy sama ka maayo, o mas maayo pa gani, nianang imong makita sa komersiyal nga proyekto diha sa balay.”

Ang trabahante nga maoy nagpadagan sa dagkong mga makina ug makinang tighakot ug yuta sukad sa 1987 midugang: “Dako ang among pundok sa mga lalaki, apil ang pipila ka lokal nga mga igsoon nga nagtrabaho uban kanamo. Ang uban kanila wala pa gayod makamanehog sakyanan kaniadto, apan nahimo silang maayo kaayong drayber sa mga dagkong makina.”

Ubay-ubayng mga batan-on nga taga Colombia nga regular nga nagtrabaho sa proyekto mihatag ug aplikasyon alang sa permanenteng pag-alagad sa pamilyang Bethel, nga sa dili madugay modako. Ang uban mobalik sa bug-os panahong pagsangyaw sa Colombia. Kining tanan nakadugang kaayo sa ilang espirituwal nga kahimtang pinaagi sa pag-alagad ingong bolunter nga mga trabahante sa konstruksiyon dinhi niining atmospera sa pamilyang Bethel.

Usa ka Magantihong Trabaho

Ang libolibo nga nakabahin sa International Volunteer Construction Worker Program nagpamatuod nga kini nahimong labing makaiikag nga bahin sa ilang mga kinabuhi. “Kini linain kaayo,” miingon ang usa ka trabahante nga gikan sa Missisippi, T.B.A., mahitungod sa proyekto sa Colombia. “Ang mga tawo ang nagpahimo niini nga linain. Gusto ko nga motrabaho niini sa tibuok panahon kon posible pa unta. Makatukod ka ug ubang mga tinukod sa laing dapit, apan ang pagtrabaho uban sa mga igsoon ang nakahatag ug kalainan.” Ang adlaw-adlaw nga pagpakig-uban sa mga Kristohanon nga nagpasundayag sa mga bunga sa espiritu ni Jehova lahi kaayo gikan sa pagtrabaho diha sa sekular nga kalibotan!

Ang panahon sa paggikan alang sa temporaryong mga trabahante dili lang hibal-an kalit nga moabot. Anaa ang ginaksanay ug daghang mga luha. Pagkasubsob nga madungog ang mga pulong sa panamilit: “Dako ang among tinguha nga magpabilin ug dugay-dugay!” Ang tanan nanglakaw nga nagbilin ug labi pang lalom nga apresasyon sa internasyonal nga panag-igsoonay sa mga Saksi ni Jehova. Sila nakasinati sa pagtilawng daan sa umaabot nga pagkinabuhi, magpasangkad sa Paraiso ngadto sa kinatumyang bahin sa yuta.

Siyempre, ang tanan, dili makabahin niining internasyonal nga programa sa konstruksiyon. Apan kadtong kansang mga sirkumstansiya makatugot, ang usa ka dako bag-o ug makapaukyab nga pultahan sa kahigayonan gibuksan sa International Volunteer Construction Worker Program.