Usa ka Butang Bag-o sa Internasyonal nga Pagtukod

DAGHAN ang nahibulong sa mga proyekto sa pagtukod sama sa mga piramide sa Ehipto ug sa Great Wall sa Tsina. Ang modernong kuwatro-siyentos ka metrong gihabugong mga skyscrapers katingalahan usab. Apan, may mga bahin sa laing programa sa pagtukod ang katingad-anan usab.

Ang mga buluntaryo nagpanukod ug dinosenang dagkong mga proyekto sa tibuok-kalibotan. Ang kadaghanan niining mga buluntaryo maoy gikan sa mga nasod nga may gihimong pagpanukod. Apan kay kinahanglan kanunay ang dugang tabang, ang mga trabahante sa ubang mga nasod migasto ug milyonmilyong dolyares sa ilang kaugalingong salapi sa pagbayad sa ilang kaugalingong plete ngadto sa halayong mga lugar sa pagtukod. Gisakripisyo sa kadaghanang mga buluntaryo ang ilang bakasyon aron sa pagtrabaho; ang uban nangayog awtorisasyon sa pagpalta gikan sa ilang regular nga trabaho ug busa napildihan ug igoigong kita.

Kining katingalahang paningkamot sa pagtabang maoy usa ka internasyonal nga buluntaryong programa sa pagtukod nga gipalakaw gikan sa hedkuwarter sa mga Saksi ni Jehova sa Brooklyn, New York. Sukad gisugdan kining programa sa pagtukod sa Nobyembre 1985, kapin sa 3,000 ka tawo ang mibayad sa ilang kaugalingong plete ngadto sa kapin sa 30 ka lugar sa Amerika del Norte ug del Sur, Australia, Aprika, Uropa, ug nagkalainlaing mga isla.

Sa pagkakaron, hapit 600 ka internasyonal nga mga buluntaryo ang nagtrabaho sa duolan sa 25 ka nasod. Kapin sa 400 kanila anaa sa mga asaynment nga taas-ug-tagal nga usa ka tuig ug kapin pa, ug sila gitawag “Internasyonal nga mga Alagad.” Ang nahibilin maoy mubog-tagal nga mga asaynment gikan sa duha ka semana ngadto sa tulo ka bulan.

Nganong kining mga trabahantea mibuluntaryo sa ilang mga katakos ug kahago nga walay bayad? Unsay ilang gilantaw nga hinungdanon kaayo nga ila kining gisakripisyohan?

Sa Pagtuman sa Tagna sa Bibliya

Ang rason sa katingalahang pagsanong sa internasyonal nga programa sa pagtukod makita diha sa tubag sa usa ka pangutana. Kapin sa 1,900 ka tuig kanhi, ang mga apostoles ni Jesu-Kristo nangutana kaniya: “Unsa may ilhanan sa imong presensiya ug sa konklusyon sa sistema sa mga butang?” Human gibatbat ang mga butang sama sa kaylap nga mga gubat, kakulang ug pagkaon, kamatay, ug mga linog, si Jesus miingon: “Kining maayong balita sa gingharian igawali sa tanang gipuy-ang yuta alang sa pagpamatuod sa tanang kanasoran; ug unya moabot ang kataposan.”​—Mateo 24:3, 14.

Ang buluntaryong mga trabahante nagtuo nga karon mao na ang panahon nga ginatuman ang tagna ni Jesus. Busa sila malipayon sa pagbuhat ug bisan unsa nga ilang mahimo aron mapalambo ang pagsangyaw sa Gingharian sa dili pa moabot ang kataposan niining sistemaha. Kining internasyonal nga programa sa pagtukod gisugdan aron sa pagdumala sa mga paningkamot niining mga tawhana sa pagtukod ug mga pasilidad nga nagapatik ug nagaapod-apod sa mensahe sa Gingharian.

Pagpadako sa Buluhaton sa Gingharian

Sa miaging tuig 678,509,507 ka magasing Bantayanang Torre ug Pagmata!, nga nagpasiugda sa Gingharian sa Diyos nga mao ang bugtong paglaom sa katawhan, gipatik diha sa mga pasilidad nga gipalakaw sa mga Saksi ni Jehova. Kana maoy kapin sa duha ka milyong magasin​—sama niining usa nga imong gibasa​—nga gikan sa mga prensa matag adlaw sa pagtrabaho! Dugang pa, kada tuig tinagpulo ka milyong mga Bibliya, mga libro, pulyeto, ug mga brosyur ang gipatik ug giapod-apod.

Ang labing dakong mga imprintahan anaa sa internasyonal nga mga hedkuwarter sa mga Saksi ni Jehova sa Brooklyn, New York, ug sa amihanang bahin sa estado duol sa Wallkill, New York. Apan, sa mga tuig sa 1950 ug sa 1960 daghang imprintahan ang gipanukod usab sa gawas sa Tinipong Bansa. Busa, sa pagka 1970 Ang Bantayanang Torre ug Pagmata! giprinta usab diha sa mga pasilidad nga gipalakaw sa mga Saksi ni Jehova sa Alemanya, South Africa, Canada, Inglaterra, Switzerland, Denmark, Sweden, Finland, ug Pransiya.

Unya, sa pagka 1972 ug 1973, ang mga magasin gisugdan usab sa pagpatik diha sa mga imprintahan sa mga Saksi ni Jehova sa unom pa ka nasod: Hapon, Brazil, Australia, Ghana, Nigeria, ug ang Pilipinas. Sa mga tuig nga misunod, sa miuswag ang buluhaton sa Gingharian, gisugdan ang kontruksiyon sa bag-ong mga sangang buhatan uban sa mas dako pang kapasidad sa pagpatik. Aron may ideya sa kusog nga pag-uswag, palandonga ang mga dapit sa sanga nga dunay bag-ong mga imprintahan alang sa Ang Bantayanang Torre ug Pagmata! nga gipahinungod sa mosunod nga mga petsa:

Gresya, Enero 16, 1979; Sweden, Disyembre 23, 1980; Brazil, Marso 21, 1981; Canada, Oktubre 10, 1981; Italya, Abril 24, 1982; Republika sa Korea, Mayo 8, 1982; Japan, Mayo 15, 1982; Australia, Marso 19, 1983; Denmark, Mayo 21, 1983; Espanya, Oktubre 9, 1983; ang Netherlands, Oktubre 29, 1983; Alemanya, Abril 21, 1984; India, Enero 20, 1985; ug South Africa, Marso 21, 1987.

Dugang pa, dihay gipahinungod nga bag-ong mga sangang buhatan o dagkong mga tinukod nga gidugang sa mga daan nang tinukod sa Côte d’Ivoire, Pebrero 27, 1982; Tahiti, Abril 15, 1983; Ingglatera, Oktobre 2, 1983; Finland, Mayo 5, 1984; Norway, Mayo 19, 1984; Matinique, Agosto 22, 1984; Peru, Enero 27, 1985; Mexico, Abril 13, 1985; Venezuela, Abril 21, 1985; ug Pransiya, Mayo 4, 1985.

Bisag ang ubang trabaho sa pagtukod sa pipila ka sanga gihimo sa gisuweldohang mga propesyonal nga dili mga Saksi, ang mga Saksi ni Jehova mismo ang nagtrabaho sa kadaghanan niini. Sa linibo ilang gihatag ang ilang mga serbisyo, bisag ang kadaghanan kanila dili hanas sa pagtukod.

Samtang ang pagsangyaw sa Gingharian sa mga Saksi ni Jehova nagpadayon sa pag-uswag, ang dakong mga pasilidad gikinahanglan. Sa unsang paagi kini matukod nga mas episyente?

Ang Bag-ong Programa Nagatagana sa Panginahanglan

Aron maorganisar ug matabangan ang katingahalang pagtubo niining internasyonal nga trabaho sa konstruksiyon, ang espesyal nga programa sa pagbuluntaryo nahunahunaan ug giugmad. “Sa panahon sa usa ka proyekto sa pagtukod, ang hanas nga trabahante sa kontruksiyon ang kinahanglan sa partikular nga panahon,” miasoy ang usa sa mga magtatan-aw sa programa. “Dili ka magkinahanglag tig-atop kon gibubo pa ang semento sa pundasyon. Busa ang internasyonal nga opisina sa trabahante gitukod sa Brooklyn, New York, aron dumalahon ang mga butang.”

Busa, sa nangabot ang mga paghangyog batid nga mga trabahante, ang opisina sa Brooklyn nagsilbing “tighikay.” Kini maoy mopaigo sa mga panginahanglan sa proyekto sa pagtukod sa tibuok kalibotan nga may igong mga trabahante aron katagan-an ang maong mga panginahanglan sa pagtukod. Pananglitan, dihang hapit nang matapos ang sanga sa Mexico sa 1988, dihay gipangayo sa Brooklyn alang sa hanas nga tigtaod sa alpombra. Sa pipila lamang ka minutos, ang opisina nakakitag upat ka hanas nga tigtaod sa alpombra nga malipay sa pagbuluntaryo. Sa panahon nga gipahinungod ang gidugang nga tinukod sa sanga sa Enero 1989, ang mga alpombra nataod na ug nindot tan-awon.

Aron Mahimong Kuwalipikado sa Pag-alagad

Aron makabahin sa internasyonal nga programa sa pagbunluntaryo, ang usa ka trabahante kinahanglan una nga mahimong kuwalipikado. Ang kada buluntaryo kinahanglang dedikado, bawtismadong Saksi ni Jehova. Sa Tinipong Bansa, ang umaabot nga buluntaryo kinahanglang motrabaho una sa usa sa mga pasilidad sa New York sa mga Saksi ni Jehova. Kini naghatag higayon aron ang iyang batasan sa pagtrabaho ug mga katakos matimbangtimbang. Siya mahimong hatagan ug aplikasyon alang sa programa. Ang mga asawa sa umaabot nga mga buluntaryo, bisag dili kasagarang dapiton sa pag-alagad uban sa ilang mga bana sa New York, mahimong kuwalipikado usab alang sa programa ug magsulat ug porma sa aplikasyon.

Ang mga Saksi ni Jehova sa ubang nasod makaaplay sa pakigbahin sa programa pinaagi sa pagpangayog aplikasyon gikan sa sanga sa ilang dapit. Kini nga aplikasyon ipadala ngadto sa opisina sa hedkuwarter sa Brooklyn nga maoy nagadumala sa internasyonal nga mga alagad ug ubang internasyonal nga mga buluntaryong trabahante. Unya ang aplikante pahibaloon kon gikinahanglan ang iyang mga kahanas sa trabaho.

Tabang sa mga Asawa

Bisag ang mga asawa sa mga trabahante sa konstruksiyon dili hanas sa pagtukod, daghan ang nabansay sa pahigot sa kabilya ug mga alambre sa pagpalig-on sa konkreto, sa pagbutang ug pagsemento sa baldosa, ug sa pagliha ug pagpintal. Ang uban nagaatiman sa kinahanglanong mga trabaho sa balay. Busa ang tanan kanila nakatabang sa maayong paagi sa pagtrabaho diha sa mga lugar sa konstruksiyon sa tibuok kalibotan.

Ang usa ka asawa nga miduyog sa iyang bana nga nagtrabaho diha sa pagtukod sa bag-ong sanga sa Puerto Rico dili pa dugay misulat sa opisina sa Brooklyn: “Miabot kami sa Enero 1, 1991, alang sa among usa-ka-bulan nga asaynment. Nagtrabaho ako uban sa mga trabahante nga naghigot sa kabilya nga gilala. Mao pa kini ang labing mabudlayng trabaho nga akong nasulayan sukad. Gani, magduko ka kanunay nga nagabugkos sa mga kabilya, ginamit ang mga playis ug linukon nga alambre​—sa tibuok adlaw!

“Sa unang mga adlaw ang akong hard hat magsige ug kahulog, ug maapil ug higot ang akong luag nga guwantis diha sa mga linala nga mga puthawng gagmay. Apan nakamao ra ako sa kataposan. Lima o unom ka Band-Aids nakasanta sa dugang pagpamuto sa panit sa akong kamot. Nakakat-on ako sa pagkuhag sukod gikan sa mga plano, sa pagpitik ug linya, ug sa paghapnig sa puthaw alang sa matag linala. Kadto matagbawon gayod nga trabaho. Ang kadaghanan sa akong trabaho adlaw-adlaw balikbalik nakong trabahoon​—paglimpiyo, pagluto, paglaba, ug uban pa. Apan ang linala nga mga puthawng gagmay mahimong bungbong nga magpabilin samtang magbarog pa ang sanga. Kana nga hunahuna magantihon!”

Mapasalamaton sa Pribilehiyo sa Pagtrabaho

Ang usa ka magtatan-aw niining internasyonal nga buluhaton sa konstruksiyon miingon: “Kini mao ang labing katingalahang butang nga imong mahanduraw. Gigamit sa mga tawo ang ilang mga bakasyon aron sa pagpabiyahe sa lagyong mga lugar nga pagatrabahoan, nagbayad sa ilang kaugalingong plete. Didto sila magtrabaho sa mas kugi ug sa mas taas nga oras kay sa ilang matrabaho sa tibuok tuig. Ug inigpauli nila, sila mosulat sa pagpasalamat kanamo alang sa pribilehiyo!”

Pananglitan, ang usa ka sulat dili pa dugay nag-ingon: “Kami nagsulat aron pasalamatan kamo sa dakong pribilehiyo nga among natagamtam samtang nagtrabaho sa tulo ka bulan sa sanga sa Pilipinas. Inigkatapos sa trabaho sa usa ka adlaw, lapoy kaayo ang among mga lawas, nga maoy madahom, apan nadasig kaayo sa espirituwal tungod sa among maayong pag-ubanay. Nalipay kami sa pagkaila ug daghan pang mga buluntaryo nga atua didto, ug nakadayeg kaayo kami sa lokal nga mga Saksi nga akong nakauban sa trabaho. Sila napamahal kaayo namo, usa ka ekstensiyon sa among pamilya.”

Usa ka magtiayon nga miadto sa Ecuador misulat: “Nakakat-on kami sa pagkinabuhi nga walay mga sitsiriya, sa pagkaligo sa diyutayng tubig lamang, ug sa pagbalbas ug pagkaligo sa bugnawng tubig. Kami walay ideya nga pagkadako diay sa impluwensiya sa paanunsiyo diha sa among kaisipan. Gihatag namo ang among labing maayo diha sa dapit sa konstruksiyon, apan namauli kami nga nagdala ug daghan pa sa among nahatag. Ang atong mga igsoon sa Ecuador kabus sa materyal, sumala sa sukdanan sa U.S., apan ang ilang espirituwalidad ug apresasyon sa buluhatong pagsangyaw talagsaon. Ang mga pulong dili makahubit sa among gibati niining pribilehiyoa.”

“Tilt-Up” nga Paagi sa Pagtukod

Ang tagsaong bahin sa trabaho sa internasyonal nga pagtukod mao ang paagi sa paggamit ug tilt-up. Gilangkoban kining paagiha sa paghulmag dako, linig-onag puthaw nga konkretong mga panel diha mismo sa dapit nga tukoran. Kini mahimong tres andanas ug may gibug-atong mga 20 toniladas. Ang mga panel hulmahon ibabaw sa hulmahan diha sa salog sa tinukod o diha sa duol nga hulmahan.

Unom o walo ka panel mahimong ipatongpatong. Kon gahi na ang mga panel​—human sa pito ka adlaw​—crane ang gamiton sa pag-alsa niini aron itaod. Ang mga panel mao na karon ang gigamit alang sa bungbong sa gawas ug sa sulod, sama sa daghag-andanang mga tinukod. Ginatos niining mga panela, pananglitan, ang gigamit diha sa 11-ka-andanang sangang buhatan sa Pilipinas. Ang hamis nang konkretong mga panel pintalan na lang.

Dili lamang makadaginot ug panahon kining paagiha sa pagtukod kondili epektibong gigamit niini bisan ang dili hanas nga mga trabahante. Ang publikasyong labot sa panukod, Concrete, miingon bahin sa pagtukod sa bag-ong pabrika sa mga Saksi ni Jehova sa Inglaterra: “Ang tilt-up nga pagtukod moangay sa ilang mga panginahanglan tungod kay simple kining paagiha sa pagtukod . . . Ang madaginot nga panahon ug salapi maoy dakong bentaha sa maong sistema.”

Ang magasin midugang mahitungod sa tilt-up nga paagi sa pagtukod: “Ang katakos niini sa paggamag lapad nga bungbong (bungbong nga makadaog ug sagbayan ug ikaduhang andana) ug mga bungbong nga walay bug-at nga ipatong sa mubong panahon, nakaabag sa paggamit sa lokal nga trabahante nga dili magkinahanglan ug daghang panahon sa pagdumala, maoy nakahimo niining paagiha nga mas madali ug madaginoton.” Busa, pagkatukma nga ang gamiton sa bag-ong programa sa pagtukod mao kining yano, episyenteng paagi sa pagtukod!

Mga Opisina sa Inhenyeriya

Ang pagtultol alang niining internasyonal nga programa sa konstruksiyon gitagana gikan sa usa ka dakong opisina sa inhenyeriya sa hedkuwarter sa mga Saksi ni Jehova sa Brooklyn, New York. Didto, kapin sa usa ka gatos ka inhenyero, mga tigdesinyo sa tinukod, ug mga tigdrowing—maoy membro sa trabahante sa hedkuwarter​—nagtrabaho sa mga plano sa tinukod. Aron mogaan ang nagdaghang trabaho, ang rehiyonal nga mga opisina sa inhenyeriya dili pa dugayng gitukod sa Hapon, Australia, ug Uropa.

Sa 1987, ang CAD (Computer-Aided Design) gipailaila aron maandam ang mga drowing. Ang estasyon sa CAD dunay daghang gamit. Dunganon paggamit, napaposible kini sa pag-andam sa mga drowing diha sa kompiyuter inay idrowing sa kamot diha sa drafting board. Sa pagkakaron, kapin sa 65 ka estasyon sa CAD ang gigamit sa Brooklyn ug sa mga sangang buhatan.

Sanglit ang mga drowing matipigan man diha sa memoriya sa kompiyuter, ang mga plano gikan sa miaging mga proyekto ikasukip diha sa bag-ong mga drowing. Kini makapatulin sa trabaho ug sa pagtukod sumala sa sukdanan sa desinyo ug sa pagtukod.

Dili pa Dugayng mga Proyekto sa Pagtukod

Sa midako ang Opisina sa Inhenyeriya sa Brooklyn, midako usab ang ideya sa pag-organisar sa mga buluntaryo alang sa trabaho. Mahimong ikaingon nga ang programa nagsugod sa 1985 sa dihang ang mga trabahante gikan sa ubang mga nasod misanong sa pagtukod ug bag-ong sangang buhatan sa Panama. Kini miuswag pa sa dihang ang Peru nangayog tabang dihang nagdugang kini ug dakong tinukod sa sangang buhatan niini. Ug ang programa tinuod nga nagsugod sa pagkaporma sa pagtukod sa mga sanga sa Costa Rica ug Nigeria. Sa wala magdugay ang mga trabahante gipadala sa pagtabang sa mga proyekto sa tibuok kalibotan.

Ang internasyonal nga mga alagad ug ubang mga buluntaryo nakatabang na karon sa pagtukod ug daghang bag-ong mga sanga ug ubang mga tinukod nga gidugang sa karaang mga tinukod, apil sa kadaghanan niadtong natapos sukad sa unang mga tuig sa 1986. Sa miaging lima ka tuig o kapin pa, ang mga proyekto natapos ug napahinungod diha sa Panama, Costa Rica, Chile, Mexico, New Zealand, Haiti, Liberia, Austria, Ecuador, Papua New Guinea, Guyana, Ghana, Hawaii, Portugal, Hong Kong, Cyprus, Peru, El Salvador, Mauritius, Hapon, Honduras, Guatemala, Nigeria, Argentina, Australia, New Caledonia, Fiji, Pilipinas, ug Gresya.

Ang kadaghanan niini maoy dagkong proyekto sa pagtukod. Sa Nigeria usa ka gamayng lungsod ang natukod diha sa 57 ka ektaryang luna sa yuta. Usa ka 140 ka metros, 70 metros nga pabrika ang gitukod, ug mga puy-anan aron makapapuyog kapin sa 400 ka tawo, usa ka opisina, garahe, ug ubang mga tinukod. Ang materyal sa pagtukod nga gipadala gikan sa Tinipong Bansa igong makapuno sa 347 ka freight containers, kon isumpaysumpay kini moabot ug 3.5 ka kilometros!

Usahay, anaa ang klero nga mosupak sa mga proyekto sa pagtukod. Sa Gresya ang klero nagtipon ug 40 ka bus nga punog mga tigprotesta niadtong Marso 1989, apan gipaluyohan sa kapolisan sa mga Saksi ang ilang legal nga katungod sa pagtukod, ug ang protesta wala molampos. Ang bag-ong sanga, nga dunay usa ka dako, bag-ong pabrika ug 22 ka tinukod nga puy-anan nga makapapuyog kapin sa 170 ka tawo, natapos ug gipahinungod niini nga tingpamulak.

Sa Pransiya ang Obispo sa Evreux, si Jacques Gaillot, miprotesta sa mga plano alang sa usa ka dakong sangang buhatan sa mga Saksi ni Jehova sa Louviers. Siya miingon nga ang ministeryo sa publiko sa mga Saksi wala “magtahod sa tawhanong dignidad.” Apan, ang uban wala mouyon sa obispo. Sila nagtuo nga ang mga Saksi ni Jehova angay nga may katungod sa pagpadako sa ilang mga pasilidad sa lugar, sama sa ilang ginahimo sa daghang dapit sa tibuok kalibotan.

Sa pagkakaron, ang internasyonal nga mga buluntaryo sa pagtukod nagtrabaho diha sa mga proyekto sa sanga sa Colombia, Puerto Rico, Zambia, Brazil, Inglaterra, Canada, Domican Republic, Ecuador, Poland, Guadeloupe, Thailand, Leeward Islands, Bahamas, Western Samoa, Tahiti, Solomon Islands, Venezuela, Republika sa Korea, South Africa, ug Alemanya. Ang ubang mga proyekto giplano pa, apil sa bag-ong mga sanga o gidugang nga mga tinukod sa natukod na diha sa Pransiya, Espanya, Mexico, Sri Lanka, Taiwan, ug Suriname.

Nagpaabot ug Panginahanglan

Dihang mitugot ang Nagamandong Lawas sa mga Saksi ni Jehova ug 50-porsiento nga pagpadako sa sangang buhatan sa Alemanya sa 1988, ang ubang mga maniniid nagtuo nga ang idugang nga tinukod dako ra kaayo. Apan sa pagka 1989 ug 1990 ang pagsangyaw nga buluhaton sa mga Saksi ni Jehova gihimo nang legal o gitugotan sa pag-obra nga walay babag sa Polandiya, Hungaria, sidlakang Alemanya, ug Romania. Ug sa Marso 27, niining tuiga, ang mga Saksi ni Jehova giila sa Unyon Sobyet ingong relihiyosong organisasyon.

Kapin sa 250,000 ka tawo sa mga nasod sa Sidlakang Uropa mitambong sa mga kombensiyon sa mga Saksi ni Jehova sa miaging ting-init ug naghinamhinam nga makadawat ug mga basahon sa Bibliya. “Sulod sa duha ka bulan,” miingon ang 1991 Britannica Book of the Year, “ang sangang buhatan sa Kasadpang Alemanya sa Watchtower Society nakapadalag 275 ka toniladang mga basahon nga binase sa Bibliya, apil sa 115,000 ka kopya sa mga Bibliya, ngadto sa Sidlakang Alemanya lamang.” Busa dayag karon nga gikinahanglan sa sanga sa Alemanya ang awtorisasyon sa tanang pagpadako, ug kini gikinahanglan dihadiha!

Nangamdam Alang sa Umaabot nga mga Panginahanglan

Sumala sa imong mahanduraw, ang pagwali sa ‘maayong balita sa Gingharian diha sa tanang ginapuy-ang yuta sa dili pa moabot ang kataposan’ sa katumanan sa tagna ni Jesus nagkinahanglag dakong trabaho. (Mateo 24:14) Ug ang matuod nga mga Kristohanon sa tibuok-kalibotan nagkugi alang niana. Ilang gihimo ang kutob sa ilang maarangan diha sa maayong pagkaorganisar nga paagi sa paghimo sa balita sa Gingharian nga mabatonan sa tanang kanasoran.

Aron mahimo kini, ang mga Saksi ni Jehova nagpadako sa ilang kapasidad sa pagpatik ug literatura sa Bibliya diha sa ilang hedkuwarter sa kalibotan sa Brooklyn, New York. Ang pagtukod ug usa ka 30-ka-andanas nga tinukod, nga nahimutang diha sa Sands Street, nga makapapuyog libolibo pang mga membro sa ilang mga trabahante sa hedkuwarter gikamulo pa ug tukod karon ug giiskedyol nga matapos sa 1993.

Ang labing dakong proyekto, hinunoa, nga ginahimo karon maoy 110 ka kilometros gikan sa New York City, duol sa Patterson. “Inigkatapos sa [mga Saksi ni Jehova], sa mga 1996,” mitaho ang The New York Times, “sila makatukod ug 6 ka balay nga apartment nga 2 ngadto sa 5 andanas ang gihabugon nga may 624 ka apartment, garahe nga masulod ang 450 ka sakyanan, 144-ka-lawak sa otel, dakong kosena ug komedor nga mosilbig 1,600 ka tawo sa usa ka kaonon, usa ka tinukod alang sa opisina, tinukod alang sa tunghaan ug daghang tinukod alang sa service personnel.” Gatosgatos ka buluntaryo nagtaganag libreng trabaho aron matukod kining dakong edukasyonal nga sentro sa Gingharian.

Sa pagkamatuod, usa ka katingalahang programa sa pagtukod ang ginahimo sa tanang bahin sa kalibotan​—ang tanan gipalakaw ug gihimo sa buluntaryong mga trabahante. Kini maoy usa gayod ka bag-ong butang diha sa internasyonal nga pagtukod!

[Hulagway sa panid 21]

Ang pagbugkos sa kabilyang puthaw maoy bahin sa trabaho sa pagtukod

[Mga hulagway sa panid 23]

[Mga hulagway sa panid 24]

[Mga hulagway sa panid 25]

Mga tinukod sa sanga sumala sa giplano alang sa Puerto Rico, Zambia, ug sa Leeward Islands

[Hulagway sa panid 27]

Ang buluntaryong mga trabahante diha sa proyekto sa pagtukod sa usa ka nasod sa Uropa