Nganong Mag-usab?

PILA ra kanato ang moangkon nga kita adunay dagkong mga kahuyangan. Tinuod kaayo ang mga pulong sa magbabalak nga taga-Scotland si Robert Burns: “Oh, kon unta may usa ka gahom nga maghatag kanato sa katakos nga makita ang atong kaugalingon sama sa pagkakita kanato sa uban!”a Oo, sayon ra nga kita makakita ug mga sayop diha sa uban ug dali nga motambag aron sa pagpakita kanila kon unsaon sa pag-uswag. Apan ang bisan unsang sugyot nga ato mismong gikinahanglan aron sa pag-usab sa atong kagawian basin makapasilo kanato. Masilo ka ba?

Mohunong kitag kadiyut ug handurawon ang usa ka hingpit nga kalibotan diin ang matag usa maoy hinlo, himsog, malipayon, ug matinud-anon; diin bisan kadtong anaa sa awtoridad maoy maluluton ug mahunahunaon, interesado sa pagbuhat ug maayo alang sa uban; diin walay kahakog, ug walay mamentaha sa iyang isigkatawo; diin ang mga anak masinugtanon ngadto sa mabination, mapinanggaong mga ginikanan; diin walay mga pagsilaob sa kasuko​—walay kapintasan, walay krimen, walay imoralidad; diin ang mga tawo may pagsalig ug maayohog kinaiya; diin ang kinabuhi matagamtam uban sa pagbati sa kasegurohan ug kaayohan.

Imo bang makita nga ikaw mohaom sa usa ka kalibotan nga sama niana, kon ugaling may panahong maglungtad ang maong hingpit nga kalibotan? Aw, ang maayong balita gikan sa Bibliya mao nga ang maong kalibotan umaabot niining yutaa sa dili madugay. Busa karon ang hinungdanong pangutana mao: Ikaw ba may mga kinaiya nga maghimo nimong dili takos nga mohaom sa maong mithianong komunidad? Sa imong hunahuna, unsa ka lisod nga manlimbasog nga mahimong takos sa kinabuhi sa maong paraiso?​—Isaias 65:17-25; 2 Pedro 3:13.

Bisan karon, sa dili pa moabot kanang bag-ong kalibotan, ang imo bang kinabuhi mapauswag kon ikaw may buhaton sa imong gawi ug tinamdan? Kon mao, nganong dili mag-usab? Posible ang paghimo niana. Hinumdomi, ang tinong mga impluwensiya nag-umol ug naghulma sa imong gawi sa unang bahin, busa pinaagi sa pagbaton sa labaw nga paggahom ug interes, posible nga imong maumol pag-usab ang imong gawi bisan karon.

Ugaling, basin motutol ka gihapon: ‘Apan ako ba makausab? Misulay na ako sa nangagi, sa makadaghan, ug napakyas. Ako mao ako sumala kon unsa ako, ug wala akoy mahimo bahin niana!’

Palandonga si Pablo, usa ka apostol ni Jesu-Kristo. (Roma 7:18-21) Si Pablo nag-usab gikan sa pagkamapintason, nagpakamatarong-sa-kaugalingon nga magsusupak sa mga Kristohanon ug nahimong Kristohanon mismo. Siya nag-usab tungod kay buot gayod niya. Wala siya moundang tungod sa mga kakulian o mga impluwensiya sa henetika. Siya wala magtuo nga ang iyang daang pagkatawo dili na gayod mausab. Dako kadtong kahago sa iyang bahin. Apan nakadawat siyag dakong tabang.​—Galacia 1:13-16.

Diin ba gikan ang maong tabang?

[Footnote]