La Raclette!—Gikan sa Taas sa Bukid Ngadto sa Lamesa
Sinulat sa koresponsal sa Pagmata! sa Switzerland
GINAINGON nga usa ka adlaw sa mga tuig sa 1875, dihay pipila ka lalaki nga nagtrabaho sa parrasan nga duol sa Swiss sa lungsod sa Sierre. Tugnaw kaayo nga panahon kadto. Sa udto sila nagtipon libot sa kalayo aron mokaon ug tinapay, keso, ug bino. Ang usa kanila nangandoy nga makakaon ug mainit nga pagkaon. Busa iyang gibutang ang iyang pirasong keso sa ibabaw sa baga hangtod nga ang ibabaw niini milanay. Unya iyang gikagis kini ug gipahid diha sa iyang tinapay ug—ang la raclette natawo!
Dunay ubang mga bersiyon sa estorya. Bisan tuod ang sinugdanan niini dili dokumentado, ang la raclette sa tinuod maoy iladong pagkaon, ilabina sa bukirong lugar sa Valais sa Switzerland. Ang Pranses nga pulong racler nagkahulogang “pagkagis,” ug tukmang nagbatbat kini sa tagsaong paagi sa pagdalit sa lanay nga keso. Apan labi pang tagsaon mao ang paagi sa paghimo sa kesong raclette.
Keso nga Hinimo Diha Mismo sa Lugar
Inig-abot sa ting-init sa Valais, ang natunawng niyebe mahimong lunhawng sibsibanan. Malipay kaayo ang mga baka niini, ug motungas, sila manibsib gikan sa usa ka sibsibanan ngadto sa laing sibsibanan hangtod sa kilid sa mga dagkong bukid nga yelo. Sa nangagi, ang paghipos sa gatas o paghakot niini ngadto sa ubos sa walog kaduha sa usa ka adlaw aron maproseso lisod kaayo. Busa ang solusyon mao ang paghimo sa keso dinhi mismo, sa lugar. Oo, ang keso ginahimo sa gawas kon hain gani ang panon sa mga baka. Sa unsang paagi?
Usa ka kawa, usa ka salaan, sugnod nga kahoy, ug ubang gikinahanglang mga gamit ikarga sa kabayo o mga mula patungas sa maong dapit. Ang mga bato aron tukoran sa abohan pilion diha sa palibot. Ang krema dili kuhaon gikan sa gatas, ug ang resulta maoy suwabe ug lamiang keso.
Karong adlawa, ang mga tighimog keso sa lugar sa Valais dili na kinahanglan magtrabaho sa gawas. Sila padayong naghimo sa keso diha mismo sa lugar, apan alang sa ilang paghimog keso, ilang gipahimuslan karon ang kakombenyente sa mga balay-balay nga gitukod sa nagkalainlaing dapit sa hataas nga bukid. Ang matag usa ka balay-balay nasangkapan sa gikinahanglang mga gamit nga permanenteng pagkataod ug usa ka lawak sa silong diin ang keso butangag solusyon sa asin aron maproteksiyonan ang ibabaw niini. Ang keso pormahon samag ligid, ang matag ligid may gibug-atong mga 5 ka kilo. Human sa mga tulo ngadto sa lima ka bulan, ang mga ligid nga keso gulang na.
Pagdalit sa la Raclette
Sa karaan, ang la raclette idalit uban sa linung-ag nga patatas, atsara, gagmay puting sibuyas bombay, paminta ug ubang mga lamas, ug, siyempre, usa ka basong puting bino gikan sa Valais. Kon mag-order ka sa pagkaon diha sa restawran, dalhan ka sa silbidor diha sa imong lamesa ug tunga sa ligid nga keso nga ang ibabaw niini nagbukalbukal tungod kay giinit. Unya iyang kagison kanang lamiang-tan-awong ibabaw nga keso ug ibutang kini diha sa imong patatas!
Sa balay mahimo nimong gamiton ang elektrik nga kosinelya. Ang uban gidesinyo sa paglanay sa keso nga ginagmay, ug ang uban may igong gidak-on nga masulod ang tunga sa ligid nga keso. Sa tinuod, dili ka magkinahanglag espesyal nga kosinelya para sa raclette. Imong mapalanay ang mga hiwa sa keso sa imong oben sa kosena.
Daghan ang modalit niining pagkaona sa ilang mga bisita tungod sa popularidad ug kasayon niini. Busa sa sunod higayong may mga higala ka alang sa paniudto, nganong dili sulayan kining tagsaong pagkaon nga gikan sa kabukiran sa Switzerland: la raclette!
[Mga hulagway sa panid 26]
La raclette: usa ka tagsaong paagi sa pagdalit sa nalanay nga keso
Naghimo sa keso
Pila ka pagkaong mahimong iparis sa “la raclette”
Nagdalit sa “la raclette”