Ang Pagpamati sa Tago ba Magpadayon?

Tingalig sila namati sa tago sa imong mga pakig-estorya.

Basin nasayod sila sa pipila sa imong mga sekreto. May mga plano ka ba alang sa sunod hinapos sa semana? Basin nasayod na sila niana. Kinsa ba sila? Sila mao ang mga tawo nga ang ilang pasatiempo mao ang pagpamati sa walay-alambre-teleponong mga estoryahay. Kon gusto nila, makahupot silag sinulat nga talaan sa mga impormasyon sama sa numero sa imong credit-card, kon asa ka nagtrabaho, ug imong suweldo. Ngani, sagad sila may usa ka talaan nga gisulatan nila sa mga ngalan sa mga tawong regular nagagamit ug walay-alambreng mga telepono.

Mahimo nga sila kaila nimo o dili. Sila mahimong nagpuyo sa pila ra ka balay gikan kanimo o mga milya ang gilay-on. Sa kadaghanang nasod, dili supak sa balaod ang maong pasatiempo, ug kini sayon kaayong buhaton.a

Sa pila ra ka gatos ka dolyares, ang usa makapalit ug scanner radio ug ikonektar kana sa usa ka antenna sa gawas. Ang scanner makapunit ug mga signal gikan sa luag-aboton walay-alambreng mga kasangkapan sa komunikasyon. Ang pipila ka tiglingawlingaw mopalabi sa paggamit ug madaladala nga mga scanner. Tungod kay kini gaan ug gamay sayon ang pagpasiyo sa usa ka silinganan ug pagpamati niini.

Kon maayo ang panahon, ang usa ka operetor nga may scanner makapamati sa sistema sa pagpanawag sa usa ka duol nga ospital, sa mga panag-estorya sa departamento sa kapolisan pinaagi sa radio, ug mga sistema sa intercom sa balay. Sa dihang gamiton ang walay-alambreng mga mikropono, sama sa diha sa mga pasundayag sa teatro, ang mga signal daling mapunit sa usa ka scanner. Ang pila ka tiglingawlingaw nasangkapan sa pagpamati sa tago sa mga panag-estorya gikan pa sa abot ug 100 kilometros nga gilay-on!

Unsay imong mahimo sa pagsanta sa maong mga tiglingawlingaw sa paglapas sa imong pribasiya pinaagi sa ilang mga scanner? Dili dako kon kanunay nimong gigamit ang imong walay-alambreng telepono. Hinuon, may mahalong mga himan nga makapagubot sa mga tawag sa telepono. Apan kana magkinahanglan nga ikaw ug ang mga tawong ginatawag nimo magbaton sa maong himan.

Bisan pa niana, dunay usa ka butang imong mahimo. Kon ang imong mga pakig-estorya angay isekreto, ayaw gamita ang walay-alambreng mga kasangkapan sama sa walay-alambreng mga telepono. Ug seguroa nga himoon usab kining panaganaha sa imong ikaestorya. Kay kon dili, ang inyong mga sekreto maglutawlutaw sa kahanginan, nga nagahulat nga may mamati niana.

Usa ka butang dili nimo mahimo mao ang pagkuha sa ilang pasatiempo. Bisan pag himoon nimo nga maglisod sila sa pagpamati kanimo, sila daling makakitag lain. Samtang ang mga tawo mopadayon sa pagpalit ug walay-alambreng mga kasangkapan ug paggamit niana sa pagpakig-estorya, husto o sayop, ang pasatiempo sa pagpamati sa tago magpadayon!

[Footnote]