Gikan sa Among mga Magbabasa

Edukasyon Bahin sa Sekso Ako misulat sa pagpasalamat ug kinasingkasing kaninyo tungod sa inyong mga artikulo labot sa “Edukasyon Bahin sa Sekso​—Kinsay Angay Motudlo Niini?” (Pebrero 22, 1992) Ako may duha ka bata ug wala pa gayod makahisgot kanila mahitungod niining butanga. Ako mismo wala gayod makadawat sa maong edukasyon, ug wala ako mahibalo kon unsay isulti kanila o sa unsang paagi himoon kana. Apan pagkatapos mabasa kadtong mga artikulo, ako may separadong pakig-estorya sa kada bata. Kadto maoy makalilipay nga kasinatian, usa nga walay ginikanan ang angay mopalabay.

M. A. P., Espanya

Kining artikuloha dili makapakugang apan sa tin-aw ug sa matinahuron nagbatbat sa unsang paagi kami makatudlo sa among mga bata. Salamat kaninyo sa pagtabang kanako sa pagkaamgo nga ako nagpabaya sa pagbuhat niini. Akong gitul-id ang mga butang, salamat niining talagsaong artikulo.

V. B., Pransiya

Ako usa ka 25-anyos nga babaye nga sa karon nakapabili sa panlantaw sa Bibliya bahin sa seksuwal nga moralidad. Ang gikaingong kalalim sa pakighilawas dili takos sa dili malikayang pagkawala sa kalinaw sa panghunahuna. Bisan tuod ako dili na usa ka bata o tin-edyer, ako mibati nga morag nakakat-on ug bililhong mga leksiyon gikan sa mga artikulo.

S. H., Tinipong Bansa

Ako wala gayod makabasa bisag unsa nga kokaamgid niini sa tibuok nakong kinabuhi. Pagkatagsaon nga kamo motudlo sa unsang paagi igahatag ang edukasyon bahin sa sekso ngadto sa mga bata samtang, sa samang higayon, nagtabang kanila sa pagbaton ug hataas nga pagpabili sa moral.

N. C., Italya

Ako inahan sa duha ka dalagita. Ako nakahimo nag dalayegong panaghisgot uban kanila mahitungod sa tanang bahin sa sekso. Apan usab inahan ako sa duha ka batang lalaki, nga nagpangedarog 11 ug 9. Samtang nahisgotan nako ang sekso sa linangkob nga paagi uban kanila, wala nako mahisgoti ang mga kausaban sa lawas nga ilang masinatian. Niining hapona lamang ang inyong tagsaong magasin miabot sa koreo. Kini motabang kanako sa pagpakiglabot uban sa akong duha ka mga anak lalaki.

P. W., Australia

Ingong usa ka batan-ong babaye, ako nakakuha gayod ug kaayohan gikan sa pagbasa niining magasina. Ang akong mga ginikanan wala mahibalo sa paagi sa paghatag kanamo ug nagkaangay nga edukasyon bahin sa sekso. Pinaagi sa tabang ni Jehova, ako nakalikay sa pagsimang gikan sa moral nga mga sukdanan sa Diyos. Sa gihapon, ako naglaom nga kining artikulo motabang sa mga ginikanan nga wala pa makahisgot sa ilang mga bata mahitungod sa mga butang sa sekso.

A. M., Mexico

Ang inyong sugyot nga ang edukasyon bahin sa sekso pagaisipon nga usa “ka sekreto sa pamilya” mahimong sa dili tinuyo mosangpot sa dakong kakulian alang sa pila ninyo ka magbabasa. Ang mga sosyal nga kawani, magtutudlo, narses, ug ubang mga propesyonal pagkakaron nabansay na sa pagmatikod sa mga ilhanan sa pag-abuso sa bata. Ang pulong “sekreto” sa dihang gamiton sa usa ka bata maoy usa sa maong mga ilhanan, tungod kay daghan sa mga tig-abuso sa sekso mosulti sa mga bata sa pagtago sa pag-abuso nga usa ka sekreto.

E. R. N., Tinipong Bansa

Ubay-ubay sa mga magbabasa nagdala niini sa among pagtagad, ug kami nasubo kon kami nakapahinabo ug bisan unsang kabalaka sa among mga magbabasa nga sensitibo sa isyu bahin sa pag-abuso sa bata. Kami mituo nga usa kini ka punto nga dawaton ug maayo. Aron malikayan ang posibleng sayop nga pagsabot, tingali makaayo kon ang mga ginikanan mohubit sa seksuwal nga mga butang ingong “pribado” inay sa “sekreto.”​—ED.