Gikan sa Among mga Magbabasa

Pagpanghatag sa Panahon sa Pasko Ang artikulong “Mas Maayo pa Kay sa Pagpanghatag sa Panahon sa Pasko” (Disyembre 22, 1992) tin-awng nagdumala sa lantugionong ulohan, apan uban sa taktika. Sugod pa sa sinugdan, kana dalawaton sa matag magbabasa, relihiyoso man o dili. Gawas pa, walay tiningob nga pagsaway sa tanang kuskus-balungos nga nalangkit sa Pasko. Kining maayong pahayag makapahimuot nga basahon ug makapahimuot nga itanyag sa atong pagsangyawng buluhaton.

T. T., Alemanya

Ang artikulo nagpakita gayod kanako kon unsay mas maayo pa kay sa mga gasa sa panahon sa Pasko, nga mao, ang gugma sa akong mga ginikanan ug sa paagi nga sila tinuod nga mihatag gikan sa kasingkasing. Giatubang ko usab ang suliran sa pagsaysay ngadto sa akong klase nganong kita ingong mga Saksi ni Jehova wala magsaulog sa “St. Nicholas’ Day” ug sa Pasko. Uban sa tabang niining maong artikulo, makahimo ako sa paghatag ug maayong pagpatin-aw.

S. H. S., Alemanya

Mga Celta Ang inyong artikulong “Ang mga Celta​—Ilang Impluwensiya Mabati Gihapon” (Septiyembre 8, 1992) makalingaw kaayo. Komon kaayo karong adlawa [alang sa mga magsusulat] sa paghisgot sa mga ulohan sa karaang mga kultura nga mao rag ang katawhan niadtong mga adlawa adunay modelong kinabuhi ug nga kon kitang tanan mahimong karaang mga tawo na usab, mamaayo ra ang tanan. Makapahayahay ang pagbasag artikulo nga nagpadayag sa usa ka kultura sa usa ka makaiikag nga paagi nga wala maghimo kanilang sumbanan o maghimo kanilang kataw-anan.

L. Z., Tinipong Bansa

Ang Sekso sa Bata Salamat sa kahon nga nag-ulohang “Kon Unsaon Pagtino sa Sekso sa Bata?” nga nigula sa artikulong “Kababayen-an​—Gitahod sa Balay?” (Hulyo 8, 1992) Gitudloan ninyo ako nga dili basolon ang akong magulang nga babaye sa pagpanganak ug lima ka batang babaye sulod sa yugto nga napulo ka tuig ug sa pagkapakyas niya sa pagbaton ug anak nga lalaki. Sumala sa inyong artikulo, kon adunay basolon, kana mao ang bana.

E. J. O., Nigeria

Bisan kon ang binhi sa lalaki nagdala sa nagatinong hinungdan kon ang bata lalaki o babaye, dili ang bana ni ang asawa ang mabasol. Ingon sa gipahayag sa artikulo, kini “yano lamang nga loteriya sa pagsanay” nga mahitungod niana si bisan kinsang hingtungdan walay gahom.​—ED.

Crossword Puzzles Salamat kaayo sa crossword puzzles! Bag-ohay pang nabasa nako ang kapitulo bahin sa kagul-anan sa librong Mga Pangutanang Gisukna sa mga Batan-on​—Mga Tubag nga Mosaler. Kini nagsugyot nga ikaw magkalingaw sa “mga kalihokan nga mohatag kanimog kahimuot,” sama sa pagsulbad ug pulongbay. Kini usa ka maayong sugyot tungod kay akong nakita ang akong kaugalingon nga nagkatawa, nalingaw, ug nagkaplag ug bag-ong impormasyon. Palihog padayona pagpatik ang mga puzzles!

M. R., Tinipong Bansa

Ang basahong gihisgotan gipatik sa Watchtower Bible and Tract Society of New York, Inc., ang magpapatik niining magasina.​—ED.

Nahisalaag nga mga Ginikanan Sa dihang nabasa nako ang artikulong “Mga Batan-on Nangutana . . . Unsa Kaha Kon ang Akong Ginikanan Nagpakaulaw Kanamo?” (Oktubre 22, 1992), ako mihilak. Ang akong amahan napalagpot gikan sa Kristohanong kongregasyon duha ka tuig kanhi, ug ang akong inahan ug ako nakasinati ug masulayon kaayong panahon. Gibuhat nako ang gisugyot sa artikulo ug misumbong sa akong suliran ngadto sa usa ka hamtong nga Kristohanong ansiano, ug ako nakadawat ug daghang pagdasig ug pagpaluyo.

A. O., Hapon

Ang akong amahan, kinsa usa sa mga Saksi ni Jehova kanhi, nahimong usa ka apostata. Naningkamot siya nga mobulag ang uban gikan sa kamatuoran ug mopakigpulong pa gani siya sa mga simbahan. Gitawag nila siya nga “reverendo”! Gibati ko ang kaulaw! Kining artikuloha nakatabang gayod kanako.

B. A., Tinipong Bansa