Unsay Kahulogan sa Pasko Alang Kanimo?

Unsaon nimo pagtubag? Ang Pasko maoy (1) panahon nga makauban ang imong pamilya; (2) panahon alang sa mga piging; (3) relihiyosong panahon; (4) panahon nga puno sa kabug-at; (5) panahon nga mingawon ta; (6) panahon sa dayag nga komersiyalismo.

DAW katingad-an, sa kapin sa 1,000 ka tawo nga gisurbi sa Britanya, 6 porsiento lamang ang nag-isip sa Pasko ingong usa ka dakong relihiyosong okasyon. Sa pagtandi, 48 porsiento ang nagtuo nga ang Pasko sa dakong bahin maoy panahon nga makauban ang ilang pamilya. Sa pagkatinuod, daghan ang nagtuo nga kini maoy usa ka linaing panahon alang sa mga bata. Sa naandan, ang usa ka 11-anyos nga batang babaye, sa dihang gisukna kon unsay iyang nagustohan sa Pasko, mitubag: “Ang kaukyab, pagbati sa kalipay, [ug] paghatag ug mga gasa.” Ang The Making of the Modern Christmas miuyon nga “ang kinakusgang mga pagpasiugda sa . . . ‘naandang’ Pasko sa walay duhaduha maoy sa balay, sa pamilya ug ilabina sa mga bata.”

Apan ilabina sa kasadpang Kakristiyanohan nga ang Pasko maoy pamilyahanong okasyon, sa dihang ang mga paryente magtapok aron maghatagay ug mga gasa. Sa mga nasod diin ang Sidlakanhong Ortodoksong Simbahan may dakong impluwensiya, ang mga tawo labaw nga nagpasiugda sa Easter; sa gihapon, ang panahon sa Pasko kasagarang usa ka yugto sa bakasyon.

Usa ka “Komersiyal nga Palakaw”

Ang Pasko “nakaagi sa usa ka proseso sa talagsaong . . . komersiyalismo,” pahayag sa The New Encyclopædia Britannica. Tingali walay laing dapit nga labaw kining tinuod kay sa Hapon.

“Ang mga Hapones misalikway sa tanang pasumangil sa relihiyon ug gihimo ang Pasko ingong lonlon komersiyal nga kalihokan,” nagtaho ang Daily Record sa Washington. Ang Pasko sa Hapon, dugang niini, maoy “usa ka dakong selebrasyon nga mas gipausbaw ang komersiyalismo kay sa relihiyosong bahin niini.”

Bisan sa daghang nasod nga gikaingong Kristohanon, kining “relihiyosong bahin” subsob nga dili mamatikdan. Mga 40 ka tuig sa miagi, usa ka batok-Pasko nga pulyeto ang miingon: “Ang Pasko gipausbaw sa kalibotan sa negosyo. Mao kini ang kinadak-ang panahon sa tuig aron manapi. Ang mga negosyanteng nangangkong Kristohanon naghinamhinam sa pag-abot sa panahon sa Pasko, dili tungod kang Kristo, kondili alang sa pinansiyal nga ganansiya.” Pagkatinuod niadtong mga pulonga karon! Sa daghang kayutaan, halos dili pa magsugod ang ulahing trimistri sa tuig makadungog na kitag mga pahinumdom kon pila na lang ka adlaw ang nahibilin aron mamalit ug mga gasa alang sa sunod nga Pasko. Ang pamatigayon labi pang mokusog samtang naghinapos ang tuig, nga halos unkuwarto sa halin sa tibuok tuig sa usa ka tindahan nagagikan sa halin panahon sa Pasko.

Bisag unsay kahulogan sa Pasko alang kanimo karon, hayan gusto nimong mahibaloan kon sa unsang paagi kini nagsugod. Sa pagkatinuod, ang Bibliya nagpaluyo ba sa paghatag ug gasa sa Pasko? Ang pagsaulog ba karon sa Pasko sa pagkatinuod Kristohanon? Atong tan-awon.

[Picture Credit Line sa panid 2]

Cover: Thomas Nast/Dover Publications, Inc., 1978