Mga Kamatuoran o mga Kabakakan sa Pasko?

“KON mangutana ka sa matinuohong mga Katoliko kon nganong gisaulog ang Pasko sa Disyembre 25, labing menos siyam sa napulo, ang pipila matingala ug ang pipila makatawa, motubag: ‘Aw, mao kana ang adlaw nga natawo si Jesus!’ Apan, kon mangutana kamo sa usa sa mga Saksi ni Jehova sa katarongan kon nganong siya dili mosaulog niining selebrasyona, siya malig-ong motubag: ‘Tungod kay kini wala hisgoti diha sa mga Ebanghelyo.’”

Mao kini ang paagi sa pagsugod sa usa ka artikulo mahitungod sa Pasko diha sa Il Mattino, sa Naples, Italya, usa ka adlaw-adlaw nga mantalaan. Apan haing hunahuna ang husto? “Ang buhaton lamang nimo,” midugang ang mantalaan, “mao ang pagpakli sa Mateo ug Lucas (silang duha lamang ka ebanghelisador ang miasoy bahin sa Pagkatawo ni Kristo) aron makita nga ang ikaduhang tubag husto.”

Ang mga artikulong sama niini komun kaayo. Ang mga palumagian sa balita masubsob nga nagayagyag sa kabakakan nga gituohan sa kadaghanan bahin sa Pasko. Pananglitan, diha sa Disyembre 1990, ang The Press, sa Christchurch, New Zealand, nasudlan ug artikulo bahin sa “Unom ka Kabakakan sa Pasko.” Kini nag-ingon:

“KABAKAKAN 1. Si Santa Claus, nga nagpuyo sa Polo Norte, paspas nga mopanaw sa tibuok kalibotan sa Bisperas sa Pasko aron ihatod ang mga gasa ngadto sa buotang mga batang babaye ug lalaki. Aw, walay tawo ang gustong modaot sa paglipaylipay, apan dili gayod kana husto, dili ba? Sa unsang paagi maduaw niya ang daghan kaayong mga balay sa usa lamang ka gabii, unsaon man niya sa pagkaon sa tanang fruit cake ug binong port nga tradisyonal nga ibilin diha sa matag balay aron iyang kaonon ug imnon? Ug unsay mahitabo kon walay chimney kay dinhi man kuno moagi si Santa Claus? Dili, kining estoryaha dili gayod tinuod. . . .

“KABAKAKAN 2. Disyembre 25 mao ang adlaw sa pagkatawo ni Kristo. Dili gayod. Ang ebanghelyo ni Lucas nag-ingon nga sa dihang natawo si Jesus sa Bethlehem, ang mga magbalantay sa karnero atua sa gawas ug nagbantay sa ilang mga karnero sa gabii. Sa maong lugar sa Palestina ang temperatura sa Disyembre may aberids nga 7° C [45° F.] sa maadlaw ug mas bugnaw sa gabii. Kanunay mag-ulan ug bugnaw, usahay mag-ulan ug niyebe diha sa mga bukid. Ang mga magbalantay atua uban kanunay sa ilang mga karnero sa maong panahon sa tuig​—diha sa usa ka sirado nga silonganan. . . .

“KABAKAKAN 3. Ang unang Pasko gihimo sa Bethlehem, sa dihang natawo si Kristo. Sa pagkatinuod ang sinugdanan niini daw gihimo sa Roma, uban sa labing unang rekord sa pagsaulog niini nga nahitabo sa 336. Kini mikaylap ngadto sa Sidlakan ug Kasadpan hangtod nga gidawat sa Iglesya sa Jerusalem sa tungatunga sa ika-5 nga siglo.

“Sa usa ka diwa, ang sinugdanan sa Pasko sa pagkatinuod anam-anam nga miabot ug ang ngalan sa kasaulogan lamang ang nausab: ang kaamgid nga paganong hudyaka-bahakhak ug mga piyesta ginahimo sa ulahing Disyembre sa daghang siglo sa wala pa si Kristo ingong bahin sa pagsaulog sa winter solstice sa amihanang hemisperyo . . .

“Ang pagdawat sa pagkatawo ni Kristo niining gipasukad sa paganong mga paghuboghubog dayag nga wala supaka sa mga lider sa iglesya, nga daw dili kaayo interesado sa kamatuoran o sa teolohikal nga kaputli gawas sa pagpadaghan sa ilang panon ug busa sa ilang gahom. . . .

“Dili ikahibulong nga ang mga Puritano sa Scotland, England ug New England naningkamot sa pagwagtang sa Pasko sa ika-7 nga siglo, gihukman kana ingon nga pagpadayon sa ‘kakawangan ug mga pagpatuyang nga ginahimo sa mga pagano.’

“Busa ang maong tinuig nga pagsinggit sa ‘pagpabalik kang Kristo diha sa Pasko’ wala gayoy kahulogan: ang kamatuoran mao, siya wala gayod makigbahin niana.

“KABAKAKAN 4. Ang tradisyon sa pagpanghatag ug mga gasa sa panahon sa Pasko nagsunod sa batasan sa paghatag ug mga gasang bulawan, insenso ug mira kang Jesus. Sa pagkamatuod ang mga tawo nagbayloay ug mga gasa sa Disyembre 25 ug 26 sa daghang siglo sa wala pa si Kristo ingong bahin sa mga pagsaulog sa solstice. Ang karaang mga Romano nagbagyloay ug mga gasa ingong bahin sa ilang piyesta sa pagsimba sa adlaw, ang Saturnalia.

“Bisan pa ang mga Mago mihatag ug mga gasa kang Jesus, dili sa usag usa, nga uyon sa kustombre sa maong panahon, dihang magaduaw ug mga tawong halangdon. Gawas pa, ang ebanghelyo ni Mateo nagpakita sa ilang interes kang Jesus ingon nga mao ang umaabot nga hari sa mga Hudiyo.

“KABAKAKAN 5. Ang ‘tulo ka tawong maalamon’ ug ang mga magbalantay naghatag katahoran kang Jesus samtang siya naghigda didto sa iyang pasungan. Kon kinsa man gani ang nag-imbento sa maong talan-awon sa pagkatawo nga nagpakita sa mga magbalantay ug sa mga tawong maalamon diha sa pasungan wala magbasag maayo sa ilang Bibliya.

“Ang ebanghelyo ni Mateo klarong nag-ingon nga sa dihang nakit-an sa ‘mga tawong maalamon’ si Jesus, siya sa maong panahon diha sa usa ka balay​—ug maingon man, mga duha ka tuig na human nga siya natawo.

“Dugang pa, dihang gibatbat ni Mateo ang pagduaw sa Mago, siya naghisgot kang Jesus ingon nga usa ka masuso, dili ingon nga usa ka gamay nga bata. Wala na siya magbakbak niining panahona ug ang mga magbalantay dugay nang nakabalik sa ilang mga hayop.

“Palandonga, usab, nga sa dihang si Herodes naningkamot aron sa pagpatay sa Mesiyas, iyang gigamit ang petsa nga gihatag sa Mago ug misugo nga ang tanang batang lalaki hangtod sa edad dos anyos kinahanglang patyon.

“Mohimo ba kaha siya ug sama niana ka makalilisang​—ug usab labing mangilngig​—nga sugo kon siya nahibalo pa nga ang iyang gitinguhang patyon maoy pipila pa lamang ka semana ang edad? . . .

“Ang Bibliya sa pagkatinuod wala gayod magsugyot kon pila ka Mago ang miadto didto. Ang Gregong pulong diha sa ebanghelyo mao ang magoi, nga gikan niini ang pulong ‘madyik’ gikuha. . . .

KABAKAKAN 6. Ang Pasko maoy usa ka panahon alang sa pakigdait sa yuta ug maayog kabubut-on sa tanang mga tawo. Pagkahalangdon nga hunahuna, apan dili kana ang giingon sa Bibliya. . . .

“Ang Interlinear nga mga hubad sa ebanghelyo ni Lucas diha sa orihinal nga Grego nagpakita nga ang tinuod nga gipamulong sa panon-panon sa mga manulonda nga mipakita sa mga magbalantay mao: ‘ug diha sa yuta pakigdait taliwala sa mga tawo nga maayo ug kabubut-on.’

“Ug mao kana ang kalainan. Ang pagsaulog ug usa ka adlaw sa tuig uban ang sobrang pag-inom ug alkohol, sobrang pagkaon, ug pagpasiugda sa komersiyalismo dili makahimo sa usa ka tawo nga Kristohanon; ang pakigdait, ang Bibliya nag-ingon, dili moabot ngadto sa mga tawo nga nagasaulog sa bakak nga adlaw sa pagkatawo ni Jesus, kini moabot sa mga tawo nga nagasunod sa iyang mga pagtulon-an​—sa tibuok tuig.”