“Water Dowser” ba si Moises?

“SI Moises, nga nagpagulag tubig pinaagi sa pagbunal sa bato pinaagig usa ka sungkod (Numeros 20:9-11), gitawag nga mao ang unang water dowser.” (The Encyclopedia Americana) Kini mao ang ideya nga motungha kanunay sa dihang hisgotan ang ulohan sa dowsing. Sa dili pa dugay, ang magasing National Wildlife sa yano, nagtawag sa sungkod ni Moises nga “usa ka sungkod sa pagtagna.” Ug ang ubang mga dowser nagtuo nga ang ilang gahom nagagikan kang Moises.

Sa kasukwahi, hinunoa, si Moises mao ang usa nga misulat sa sugo batok sa pagtag-an! (Deuteronomio 18:10) Ug ang milagro sa Meriba lahi kaayo sa water dowsing. Daghan sa mga dowser magsalig sa usa ka lipak sa pagkaplag sa natagong tubig; ilang subayon kini, magpaabot niini nga mougpot o moigking. Apan wala maghulat si Moises nga ang iyang sungkod mougpot; gani, wala gayod siya sa aktuwal mangitag tubig. Si Jehova ang Maglalalang sa yuta ug ang iyang natagong mga tuboran sa tubig, mao ang misulti kang Moises sa tukmang dapit kon asa makita ug sa unsang paagi makuha ang tubig: “Sultihi ang bato,” ang Diyos misugo, “aron kini mohatag sa iyang tubig.”​—Numeros 20:8.

Dugang pa, ang mga dowser sagad mosulti lamang sa mga tawo kon asa magkalot. Sa dihang nabunalan ang bato sa sungkod ni Moises, ang bul-og sa tubig mibuhagay​—igo nga makatagbaw sa kauhaw sa tibuok nasod. Nasuko ang Diyos kang Moises sa dihang iyang giangkon ang pasidungog niini nga milagro. Unsa pa kaha kon pasidunggan ang iyang sungkod​—usa ka walay-hunahunang piraso sa kahoy!