Usa ka Alkoholiko sa Pamilya

“Ang alkoholismo nagaapil sa mga alkoholiko . . . Samtang usa lamang ang alkoholiko sa pamilya, ang tibuok pamilya mag-antos gikan sa alkoholismo.”​—Dr. Vernon E. Johnson.

ANG singko anyos nga si Alice naghigda, ang iyang batiis nagngutngot. Gisemento ang iyang tibuok batiis tungod sa usa ka aksidente nga nahitabo sa miaging duha ka adlaw. Apan hugot ra kaayo ang pagkasemento, ug mihubag ang iyang batiis tungod sa kahugot niini. Mihangyo si Alice sa iyang mga ginikanan nga dalhon siya sa doktor, apan ang iyang amahan naluya pa gikan sa pagkahubog, ug ang iyang inahan natunga kanilang duha, naglibog kon kinsay unahon.

Sa pipila ka adlaw, naminhod ang batiis ni Alice. Sa dihang misugod sa pagtulo ang itom nga duga sa iyang kumagko sa tiil, gidala dayon sa mga ginikanan ni Alice siya sa ospital. Sa dihang natangtang ang semento, nakuyapan ang usa ka nars sa dihang nakakita sa iyang batiis. Giputol ang batiis ni Alice tungod sa kanggrena.

Alkoholismo ug ang Isigkaulipon

Ang trahedya niining aksidenteha grabe pa kay sa pagkaputol sa batiis ni Alice. Ang amahan ni Alice alkoholiko. Tungod niini, siya dili kadangpan sa emosyonal ug pisikal nga paagi dihang ang iyang anak nga babaye nagkinahanglan kaayo kaniya. “Ang kinaiyahan sa alkoholismo mao nga ibutang sa alkoholiko ang iyang pamilya sa kataposan​—sunod sa alkohol ug sa tanang mga ginapangayo niini,” matud pa sa magtatambag nga si Toby Rice Drews.

Komusta ang inahan ni Alice? Siya usab ulipon, dili sa alkohol, kondili sa iyang alkoholikong bana. Sa kinaiyanhon, ang dili-alkoholiko nga kapikas nalinga kaayo sa mga paningkamot sa pagpahunong sa pag-inom sa alkoholiko o sa labing menos sa pagsagubang sa iyang dili-matag-an nga batasan.a Siya sobra kaayong nalinga sa problema sa alkoholiko nga siya nagpakitag samang mga kinaiya sa pagkaulipon​—apan walay alkohol. Tungod niini, ang mga tawong sama sa inahan ni Alice sagad gitawag ug mga isigkaulipon.

Ang alkoholiko ug ang isigkaulipon sa wala tuyoa gigamhan sa usa ka butang gawas sa ilang kaugalingon. Ang duha nabutaan tungod sa dili-pagdawat niini. Ang duha sa emosyonal nga paagi dili kadangpan sa ilang mga anak. Ang duha natunga sa usa ka kinabuhi sa kapakyasan, o sama nga dili makakontrolar ang alkoholiko sa iyang pag-inom, ang isigkaulipon dili makakontrolar sa alkoholiko, ug walay usa kanila ang makakontrolar sa epekto sa alkoholismo diha sa ilang mga anak.

Apan adunay tabang alang sa alkoholiko ug sa iyang pamilya. Mao kini ang hisgotan sa sunod nga mga artikulo.

[Footnote]