Sa Unsang Paagi Makatabang ang Pamilya?

“Una ang tawo moinom, ug unya ang pag-inom sundan ug laing pag-inom, ug sa kataposan ang pag-inom mogahom sa tawo.”​—Panultihon sa Oryente.

NAGLAKAW ka sa daplin sa kalamakan. Sa kalit, mihulpa ang yuta. Sa pipila ka gutlo ikaw naunlod diha sa huyonghuyong. Sa sobra nimong panlimbasog, mas nalunod hinoon ka.

Lamyon sa alkoholismo ang tibuok pamilya sa samang paagi. Ang isigkaulipon nga kapikas manlimbasog pag-ayo aron mabag-o ang alkoholiko. Palihokon sa gugma, hulgaon sa asawa ang iyang bana, apan moinom gihapon ang bana. Tagoan sa asawa ang maisog nga ilimnon sa bana, apan mopalit hinoon siya ug daghan. Tagoan sa asawa ang kuwarta sa bana, apan manghulam ang bana sa usa ka higala. Mangaliyopo ang asawa sa iyang gugma alang sa pamilya, sa kinabuhi, o bisan alang sa Diyos​—apan kawang gihapon. Sa sobra niyang panlimbasog, mas nalunod hinoon ang tibuok pamilya sa kalamakan sa alkoholiko. Aron matabangan ang alkoholiko, kinahanglang makasabot una ang mga sakop sa pamilya sa kinaiyahan sa alkoholismo. Sila kinahanglang mahibalo kon nganong ang pipila ka “mga solusyon” kasagarang mapakyas, ug sila kinahanglang makakat-on kon unsa gayod ang paagi nga mosaler.

Labaw pa ang alkoholismo sa yanong paghuboghubog. Kini maoy usa ka dili-normal nga balatian sa pag-inom nga maila pinaagi sa pagkalinga sa alkohol ug pagkadili makakontrolar sa pag-inom. Samtang ang kadaghanang mga eksperto nagkauyon nga kini dili matambalan, ang alkoholismo masumpo pinaagi sa usa ka programa sa tibuok-kinabuhi nga paghunong sa pag-inom.​—Itandi ang Mateo 5:29.

Diha sa pipila ka bahin ang kahimtang mahimong ikatandi sa usa ka diabetiko. Samtang siya dili makabag-o sa iyang kahimtang, ang diabetiko makatabang sa iyang lawas pinaagi sa paglikay sa asukar. Sa susama, ang usa ka alkoholiko dili makausab sa reaksiyon sa iyang lawas sa pag-inom, apan siya makapahiangay sa iyang balatian pinaagi sa bug-os nga paglikay sa pag-inom.

Apan, sayon kining isulti kay sa buhaton. Ang alkoholiko nabutaan sa dili-pagdawat. ‘Dili ako ingon niana ka daotan.’ ‘Ang akong pamilya maoy nakaingon sa akong pag-inom.’ ‘Kon may amo ka nga sama sa akoa, kinsay dili moinom?’ Ang iyang pangatarongan makapakombinsir kaayo nga ang tibuok pamilya moduyog sa dili-pagdawat. ‘Ang inyong amahan kinahanglang magparelaks sa kataposan sa adlaw.’ ‘Kinahanglang moinom si Papa. Giantos niya ang sigeg pagyawit ni Mama.’ Dili gayod nila iladlad ang tinagoan sa pamilya: Si Papa alkoholiko. “Kana lamang ang paagi nga sila mabuhi nga malinawon,” misaysay si Dr. Susan Forward. “Ang pagpamakak, mga pasumangil, ug mga tinagoan maoy sama ka komun sa hangin niining mga panimalaya.”

Ang mga sakop sa pamilya dili makahaw-as sa alkoholiko gikan sa huyonghuyong hangtod nga sila ang unang mohaw-as. Ang uban tingali motutol, ‘Ang alkoholiko ang nagkinahanglag tabang, dili ako!’ Apan palandonga: Unsa ka dulot nalangkit ang imong mga emosyon ug aksiyon sa batasan sa alkoholiko? Unsa ka subsob nga bation mo ang kasuko, kaguol, pagkawala sa paglaom, kahadlok tungod sa iyang mga lihok? Pila ka higayon nga ikaw nagpabilin sa balay aron maatiman ang alkoholiko nga duna ka man untay mas importanteng buhaton? Kon ang dili-alkoholikong pamilya mohimog mga lakang sa pagpauswag sa ilang kaugalingong mga kinabuhi, ang alkoholiko mahimong mosunod.

Ayaw na dawata ang mga pagbasol. ‘Kon maayo ka pang motagad nako, dili unta ako mapugos sa pag-inom,’ tingalig moingon ang alkoholiko. “Kini ang ipatuo kanimo sa alkoholiko aron iyang ikapasangil kanimo ang iyang responsabilidad sa pag-inom,” miingon ang magtatambag nga si Toby Rice Drews. Ayaw pagtuo niana. Ang alkoholiko nagsalig dili lamang sa alkohol kondili sa mga tawo nga motuo sa iyang dili-pagdawat. Sa ingon gitabangan sa mga membro sa pamilya ang alkoholiko sa pagpadayon sa pag-inom.

Ang sanglitanan sa Bibliya bahin sa pagkawalay pagpugong sa kasuko ikapadapat usab sa alkoholiko: “Ipapas-an kaniya ang mga sangpotanan niini. Kon sa makausa luwason mo siya gikan sa kasamok, buhaton mo kini pag-usab.” (Proverbio 19:19, Today’s English Version) Oo, pasagdi nga ang alkoholiko maoy motawag sa iyang amo, sa pagbangon, ug sa paghinlo sa iyang sinuka. Kon ang pamilya maoy mihimo niining mga butanga alang kaniya, ilang gitabangan hinoon siya sa pag-inom hangtod sa kamatayon.

Pangayog tabang. Malisod ug tingali imposible pa sa usa ka sakop sa panimalay sa paghaw-as gikan sa huyonghuyong nga mag-inusara. Ikaw nagkinahanglan ug tabang. Salig sa mga higala nga dili mopaluyo sa dili-pagdawat sa alkoholiko ni pasagdan ka sa mao gihapon nga kahimtang.

Kon mosugot ang alkoholiko sa pagpangayog tabang, kini mopahinabog dakong kalipay. Apan kini maoy sinugdanan lamang sa pagkaayo. Ang pagkaulipon sa lawas sa alkohol masumpo sa pipila ka adlaw pinaagi sa pagkuha sa alkohol sa lawas. Apan ang pagkaulipon niini sa hunahuna mas malisod nga atubangon.

[Kahon sa panid 5]

Mailang mga Kinaiya sa mga Alkoholiko

Pagkalinga: Ang alkoholiko maghinamhinam sa iyang mga panahon sa pag-inom. Sa panahong dili siya moinom ug alkohol, alkohol lamang ang anaa sa iyang hunahuna.

Dili Makakontrolar: Ang iyang pag-inom lahi gayod kanunay gikan sa iyang tumong, bisan unsa pa siya ka matinguhaon.

Mapig-oton: Ang gipakanaog sa kaugalingong mga lagda (“Dili ako moinom nga ako rang usa,” “dili sa panahon sa trabaho,” ug uban pa) maoy mga pagtakoban lamang sa tinuod nga lagda sa alkoholiko: “Ayaw tugoting may makababag sa akong pag-inom.”

Pagkadili-maapektohan: Ang tagsaong katakos sa ‘pagkadili-maapektohan’ dili usa ka panalangin​—kasagaran kini maoy unang timaan sa alkoholismo.

Negatibong mga Sangpotanan: Ang normal nga mga batasan dili mohatag kadaot sa pamilya, karera, ug pisikal nga panglawas sa usa. Ang alkoholismo mao ang makadaot.​—Proverbio 23:29-35.

Dili-modawat: Ang alkoholiko mangatarongan, ibale-wala, ug ipakamatarong ang iyang paggawi.