Posibleng Maayo

“Duha ka kapilian ang atong atubangon: Mohunong sa pag-inom ug maulian, o magpadayon sa pag-inom ug mamatay.”​—Usa ka nauliang alkoholiko.

HANDURAWA nga kalit kang nakamata sa usa ka gabii sa pagkaplag nga nasunog ang imong balay. Sa pipila ka gutlo sa ulahi miabot ang tabang, ug sa kataposan napalong ang kalayo. Makabalik ka ba sa sulod ug magpakaaron-ingnong walay nahitabo? Dayag dili gayod. Ang balay naugdaw, ug ang pagtukod pag-usab gikinahanglan sa dili pa mobalik ang normal nga kinabuhi.

Ang samang hagit maoy atubangon sa alkoholiko dihang mosugod siya sa pagkaayo. Ang iyang kinabuhi nadaot sa alkohol, tingali sa daghang tuig. Karon siya naglikay sa pag-inom. Ang “kalayo” napalong, apan ang dakong pagtukod pag-usab sa tinamdan, paagi sa kinabuhi, ug paggawi hinungdanon aron ang alkoholiko dili mobalik sa pag-inom. Ang mosunod nga mga sugyot makatabang sa alkoholiko sa pagkab-ot sa permanenteng pagkadili-hubog.

1. Ilha ang Kaaway

Ang Bibliya nag-ingon nga ang mga tinguha sa unod “nagapakig-away batok sa kalag.” (1 Pedro 2:11) Ang Gregong pulong nga gihubad “nagapakig-away” sa literal nagkahulogan ug “pagserbisyo militar,” ug kini may ideya bahin sa malaglagong panaggubat.​—Itandi ang Roma 7:​23-25.

Sama nga ang usa ka maayong sundalo nagkinahanglag panahon sa taktika sa iyang kaaway, sa ingon kinahanglang edukahon sa alkoholiko ang kinaiyahan sa alkoholismo​—ug kon sa unsang paagi daoton niini ang alkoholiko ug ang mga tawong suod kaniya.a​—Hebreohanon 5:14.

2. Usba ang Pag-inom ug Kaisipan

“Ang pagkadili-hubog nagkahulogan sa pagwala sa botelya ug sa bata,” matud pa sa usa ka mananambal. Sa laing pagkasulti, labaw pa kay sa pag-inom ang kinahanglang bag-ohon; ang pagkatawo sa sulod kinahanglang mabag-o usab.

Ang Bibliya maalamong nagtambag: “Bag-oha ninyo ang inyong salabotan.” (Roma 12:2) “Hukasa ninyo ang inyong daang pagkatawo uban sa mga batasan niini.” (Colosas 3:9) Kon ang lihok nabag-o apan nagpabilin gihapon ang pagkatawo, ang alkoholiko yanong mopadayon ngadto sa laing makadaot nga pagsalig​—o kaha mobalik sa daan nga batasan.

3. Pagkuhag Masinabtanong Sumbonganan

Usa ka sanglitanan sa Bibliya nag-ingon: “Ang usa nga magpalain sa iyang kaugalingon nagapangita sa iyang hakog nga tinguha; ug siya nagasupak sa tanang praktikal nga kaalam.” (Proverbio 18:1) Bisan kon dili-hubog, ang alkoholiko mokiling sa pagpangatarongan. Busa, siya nagkinahanglan ug usa ka masinabtanon apan malig-ong sumbonganan (kasagarang gitawag nga usa ka tiglaban). Mas maayo kon ang sumbonganan mismo maoy usa ka nagpaayo nga alkoholiko nga nagmalamposon sa pag-atubang sa mga hagit sa pagpabiling dili-hubog. (Itandi ang Proverbio 27:17.) Angay tahuron sa sumbonganan ang relihiyosong mga pagtuo sa alkoholiko ug kinahanglang mosakripisyo sa kaugalingon ug masaligan sa paghatag ug padayong tabang.​—Proverbio 17:17.

4. Magmapailobon

Anam-anam ang pagpaayo. Nagkinahanglag panahon aron matukod pag-usab sa alkoholiko ang iyang kinabuhi. Tingalig dunay pinansiyal nga suliran, mga tensiyon sa trabaho, kagubot sa balay. Ang pagkalibre gikan sa alkohol wala magkahulogan nga wala nay suliran. Ang nagpaayo nga alkoholiko tingali sa sinugdan mobatig mga kabalaka samtang iyang atubangon ang kinabuhi nga walay usa ka kemikal nga ‘tigsulbad sa suliran.’ Kon ang maong mga kabalaka daw dili-madaog, kinahanglang hinumdoman sa nagpaayo nga alkoholiko ang makapahupay nga mga pulong sa salmista: “Itugyan mo kang Jehova ang imong palas-anon, ug siya magasapnay kanimo. Dili gayod niya itugot nga mapukan ang matarong.”​—Salmo 55:22.

5. Pagbaton ug Maayong mga Kauban

Angay nga matinud-anong pangutan-on sa alkoholiko ang iyang kaugalingon: ‘Ginapaluyohan ba sa akong mga kauban ang akong pagkadili-hubog o kanunay ba silang magsultihay bahin sa “unang mga panahon,” mopabati kanakong may nagkulang kanako?’ Ang Proverbio 18:​24 nag-ingon: “Adunay mga higala nga kiling sa pagbungkag sa usag usa, apan adunay usa ka higala nga mounong labaw pa kay sa usa ka igsoon.” Nagkinahanglag salabotan ang pagkakita kon kinsa ang tinuod nga mga higala ug kinsa ang posibleng makadaot nga mga kauban.

6. Ayaw Paghinobra sa Pagkamasaligon

“Maayo ang akong pamati​—dili na gani ako hidlawon sa pag-inom!” Gipalabihan pag-isip sa usa ka alkoholiko nga mopahayag niini ang iyang pag-uswag, gipakamenos ang iyang alkoholismo. Ang kadasig nga bation sa pagsugod sa pagkaayo, nga gitawag pink cloud o gibayaw sa panganod, temporaryo. “Paninguhaa ang timbang nga panglantaw,” misugyot ang librong Willpower’s Not Enough. “Kon kini magkulang imong gitugotan ang imong kaugalingon nga mahulog, ug layo ra ba ang panganod.”​—Itandi ang Proverbio 16:18.

7. Pagbantay sa Kapuling mga Pagkagiyan

Daghan ang mihunong sa pag-inom, apan unya makaugmad sila ug abnormalidad sa pagkaon o nahimong giyanon sa trabaho, dili-makapugong nga mga sugarol, ug uban pa. ‘Unsay daotan niana? Labing menos wala ako moinom,’ ang alkoholiko nga nagpaayo sa lawas tingalig mangatarongan. Tinuod, ang pipila ka paghumpay sa lawas tingalig maayo. Apan kon ang bisan unsang substansiya o kalihokan gamiton aron makubalan ang imong mga pagbati, kini mohatag lamang ug usa ka dili-tinuod, temporaryong pagbati sa kasegurohan.

8. Magpaangay sa Bag-ong mga Papel sa Pamilya

Daoton sa daghang alkoholiko ang ilang pagpauli sa lawas kon maayo nag lakat ang mga butang! Ngano? Sa yano tungod kay ang pagkadili-hubog maoy usa ka bag-ong kasinatian. Tingalig bation sa alkoholiko nga madanihon ang naandang paagi sa kinabuhi. Dugang pa, sa dihang ang alkoholiko mahuwasan sa pagkahubog, iyang uyogon ang pamilya. Busa, kinahanglang bag-ohon sa matag usa ka membro sa pamilya ang iyang papel. “Ang tibuok iskrip sa drama sa pamilya kinahanglang ilabay ug maghimog usa ka bag-o nga kapuli niini,” nagkanayon ang pulyetong Recovery for the Whole Family. Alang sa maayong katarongan, ang pagkaayo gitawag nga usa ka kalihokan sa pamilya.​—Itandi ang 1 Corinto 12:26.

9. Pagbantay Batok sa Pagkabughat

Ang sobrang-pagsalig, dili-maayong mga kauban, kapuling mga pagkagiyan, ug nagkagrabe nga pagpalain mahimong tikanganan sa pagsugmat. Pagbaton ug bukas nga komunikasyon uban sa usa ka sumbonganan bahin sa bisan unsang mga kiling.

Ang usa ka nagpaayo nga alkoholiko miingon: “Ang tanang mga alkoholiko mihunong na sa pag-inom. Ang pipila kanamo bulahan sa paghunong samtang buhi pa kami.”

[Footnote]

[Kahon sa panid 7]

Kon Gikinahanglan Gayod ang Tambal

Ang bisan unsang medisina nga may alkohol mopukaw pag-usab sa kahidlaw ug mopahinabo sa usa nga mabughat.

Si Dr. James W. Smith misulat: “Kasagaran sa usa ka alkoholikong pasyente nga mabughat human sa katuigan sa pagkadili-hubog ingong resulta sa kinaugalingong pagtambal pinaagig tambal sa ubo nga dunay alkohol.” Ang alkoholiko daling maapektohan sa tanang mga pangpakalma. Kon gikinahanglan gayod ang medisina sa pagpakalma, ang alkoholiko kinahanglang . . .

1. mokonsulta ug parmasista aron mahibaloan ang posibleng mga kapeligrohan.

2. pahibaloa ang usa ka sumbonganan, ug kon mahimo, tawga siya sa dili pa motomar sa dosis.

3. irekord ang matag dosis nga gitomar.

4. ihunong ang tambal sa labing madali.

5. ilabay ang sobrang tambal kon matapos na ang paggamit niini sumala sa giresita.