“Aron Walay Mausik”
Sinulat sa koresponsal sa Pagmata! sa Ghana
AKONG nahibalag siya sa iyang pinobreng talyer sa Labadi, usa ka balangay sa Accra, nga demanong naggabas ug nagsipilya uban ang katingalahang pasundayag sa pagkakusgan. Ang iyang ngalan mao si Adams Akuetteh. Siya maoy 70 anyos na ang edad ug karpentero sa nangaging 50 ka tuig.
Sa gipangutana ko siya kon unsa ang iyang giisip nga mao ang kinatayoktokan sa iyang karera sa pagkakarpentero, siya mitubag dihadiha nga mao kadtong upat ka tuig nga iyang nagugol sa pagtukod sa bag-ong pasilidad sa sangang buhatan sa Watch Tower Society sa Nungua, Ghana. Kadto maoy gikan sa 1984 ngadto sa 1988.
“Unsay imong trabaho diha sa konstruksiyon?” nangutana ako.
“Nagtrabaho ako sa paghimog mga hulmahan sa semento ug mitabang sa mga mag-aatop.”
“Daw mas mahinumdoman ka,” matud ko, “labot sa pagsuplay ug mga lansang.”
“Aw, oo, sa mga lansang. Abi gud nimo, mahal ang mga lansang sa Ghana. Niadtong mga adlawa ang tunga sa kilong lansang mokantidad ug dos ngadto sa tres dolyares. Busa miingon ako sa akong kaugalingon, ‘Nganong dili nato gamiton ug usab ang ubang mga lansang? Sulayan ko.’
“Busa gisugdan ko kini nga walay nagsugo kanako ug gihimo ko kini sa akong libreng panahon. Sa dihang nakit-an ako sa magtatan-aw sa proyekto, siya nalipay. Permanente niya akong gitudlo sa maong trabaho. Busa sa upat ka tuig, matag buntag mangita akog nahipasad nga mga lansang. Ayohon nakog kuha ang lansang nga anaa sa gibungkag nga mga kahoy nga maoy gibuboan sa semento.”
“Inyo bang gilabay ang dumpol ug ang balikong mga lansang?”
“Wala. Ang dumpol nga mga lansang gamiton ug balik diha sa humok nga kahoy, o kaha gamitan ug barina aron magamit ug balik ang lansang diha sa gahing-kahoy. Ang mga baliko ayohon nakog tul-id sa martilyo.”
“Wala ka ba pul-i sa trabaho?”
“Tingali pul-an ang batan-on, apan ako wala. Gisultihan ako sa magtatan-aw sa proyekto nga nakadaginot ug salapi ang Sosyedad sa akong trabaho, nga salapi ni Jehova, busa nalipay ako. Malipay kaayo akong magtan-aw sa pundok sa nagkalainlaing gidak-on sa mga lansang nga nahipos nga modaghan. Ug moingon ako sa akong kaugalingon, ‘Aha! Ako karon ang nakauna sa mga mag-aatop!’ Apan unya ang pundok sa mga lansang mangawagtang. Mosinggit sila gikan sa atop sa pagpangayog dugang pang lansang! Busa mosugod na usab ako ug dukdok sa pagtul-id sa lansang.
“Unsay imong trabaho karon nga natapos na ang trabaho sa pagtukod?”
“Misulod na usab ako sa bug-os panahong ministeryo, naghulat hangtod nga moabot ka sa pagtukod ug ekstensiyon sa sangang buhatan sa Ghana. Unya moabot ako didto, manul-id ug mga lansang ug managinot ug salapi—nga may kalipay.”
Upat ka tuig siyang nagtrabaho nga giisip sa uban nga ubos nga trabaho. Apan wala mag-isip ug ingon niana si Adams Akuetteh, “ang tigtul-id ug lansang sa sangang buhatan sa Ghana.” May kalipay niyang giresiklo ang mga lansang aron makadaginot ug salapi alang kang Jehova!
Mao usab kanay panghunahuna ni Jesus. Bisan tuod walay limitasyon ang iyang milagrosong gahom sa pagdaghan sa mga tinapay, siya miingon human sa usa ka pangaon: “Hiposa ang mga tipik nga nanghibilin, aron walay mausik.”—Juan 6:12.
[Hulagway sa panid 31]
Si Adams Akuetteh, “ang tigtul-id sa lansang sa sangang buhatan sa Ghana”