Gikan sa Among mga Magbabasa

Ato Bang Ginausab ang Atong Klima? Ako 17 anyos ug nangandam alang sa akong diploma. Ang pasulit naglakip sa geograpiya, ug ang serye nga “Ato Bang Ginausab ang Atong Klima?” (Mayo 22, 1998) nakatabang ug dako kanako sa pagpangandam. Human sa pasulit, gipangutana ako sa akong mga klasmet kon diin nako nakuha kining impormasyona bahin sa klima, ug katunga kanila mihangyo alang sa mga kopya.

A. G., Switzerland

Ako malipayong natingala sa analisis sa greenhouse effect niini nga gula sa Pagmata! Ako maoy usa ka debotadong ekolohista ug usa ka Kristohanon. Ang mga Saksi ni Jehova sagad kaayong gisaway sa palaumagian sa balita. Apan ang mga kaundan sa inyong magasin takos pamalandongon. Ang ekolohiya ug pagtuo nagakahanaw na. Sa kataposan, adunay relihiyosong mga tawo nga interesado sa kalalangan sa Diyos!

M. C., Pransiya

Ako 14 anyos ug buot magpasalamat kaninyo sa mga artikulo. Wala ko gayod hatagig dakong pagtagad ang klima, apan karon seryoso ko nang gitagad sa unang higayon ang mahitungod sa kon unsay hayan natong ginabuhat sa atong planeta. Kini nga mga artikulo magpugos sa daghang tawo nga makaamgo, tungod kay kinsay buot nga magdaot sa atong kalikopan? Dili nato angayng isalibay na lamang ang usa ka gasa sa Diyos.

S. Q., Alemanya

Makapahupay ang pagbasa sa usa ka butang bahin sa klima, diha sa usa ka magasing giisip sa mga tawo nga relihiyoso. Nagpakita lamang kini kon unsa ka dako ang pagtagad sa Pagmata! bahin sa mga tawo—dili lamang sa relihiyosong paagi kondili sa pisikal usab. Bisan pag wala nato kini pabilhi pag-ayo, ang klima nag-apektar gayod sa atong mga kinabuhi.

M. F. M., Alemanya

Pag-atiman sa Kuko Makapahibulong nga sa duolan sa 52 ka tuig, gawas sa duha ka mugbong mga yugto, ako tigkitkit sa akong mga kuko. Kay nabasa diha sa Pagmata! sa Mayo 22, 1998, ang artikulong “Imong mga Kuko—Giatiman ba Nimo Kini?,” ako mihunong sa pagkitkit. Ngano? Tungod kay si Jehova nga Diyos mao ang Tigdisenyo niini ug buot nga kita, maingon man sa tanang uban pa, mag-atiman niini. Salamat sa inyong mahigugmaong mga pahinumdom.

D. H., Inglaterra

Sanglit ako nag-atiman sa balay ug tanaman ug nag-atiman sa akong baldado nga ugangang-babaye, inyong mahanduraw nga ako adunay daghang buluhaton kay sa yanong pag-atiman sa akong mga kamot. Ang akong mga kuko dugaydugay nang nakapabalaka kanako, tungod kay kini natigpod ug nalutak. Busa ang artikulo miabot sa husto gayod nga panahon.

W. B., Alemanya

Sukad pa sa akong pagkabata, tigkitkit na ako sa akong mga kuko ug busa gikaulaw ang dili maayong porma niini. Sa dihang nabasa ko ang artikulo, napalalom ang akong pagpabili nga ang mga kuko maoy usa ka kahibulongang bahin sa atong tawhanong mga lawas. Nagdasig kini kanako nga paningkamotang tul-iron ang akong batasan.

K. Y., Hapon

Sumbanan Sa dihang nabasa ko ang artikulo sa Mayo 22, 1998, nga Pagmata! nga nag-ulohag “Mga Batan-on Nangutana . . . Kinsay Angayan nga Mahimong Akong Sumbanan?,” akong gipalandong ang paagi nga ang mga artikulong sama niini nagpalambo sa akong kinabuhi. Human mabungkag ang akong pamilya, ako sa kinaiyanhon unang nadani ngadto sa mga higala nga akong kaedad. Apan ako misugod sa paghunahunag seryoso bahin sa mga tawo kinsa adunay labing positibong impluwensiya sa akong kinabuhi—ang mga edarang Kristohanong mga babaye. Karon ako nangita ug mga relasyon sama niadtong kang Pablo ug Timoteo o kang Ruth ug Naomi. Ang akong suod nga higala maoy usa ka igsoong babaye nga mga 50 anyos kinsa nagtudlo kanako bahin sa kangaya, gugma, pagkamabination, kalulot, ug pagkamahinatagon. Kami nagkahiusang nagabuhat—magkauban kami sa lawak ug kami misulod sa bug-os-panahong ministeryo. Salamat sa inyong maayong paggiya ug pagtultol.

C. F., Tinipong Bansa