Gikan sa Among mga Magbabasa

Mga Gang sa Dalan Natandog ako sa mga artikulo bahin sa mga gang sa dalan diha sa Abril 22, 1998, nga isyu sa Pagmata! Sa pagkakaron ania ako sa usa ka repormatoryo nga eskuylahan. Usa sa mga Saksi ni Jehova ang akong inahan, apan di pa dugay mihunong ako sa pagtambong sa mga tigom. Dayon nalangkit ako sa daotang mga higala ug misalmot sa serye sa mapintas nga mga pagpangawat. Mao nga gipadalhan ako niining Pagmata! sa akong inahan. Sa sinugdan matod ko, ‘Nia na pod!’ Apan sa dihang gisusi ko kini, ako nalinga ug gibasa kining tanan. Pagkahuman nakog basa niini, nausab ang akong panghunahuna. Wala gyod ko magdahom nga ang Pagmata! makatabang nakog dako. Gusto kong magbag-o ug motambong pag-usab sa mga tigom. Gibati kong dili na gyod nako buot usbon ang akong mga kasaypanan ug nga buot kong alagaran si Jehova samtang ako buhi.

M. S., Hapon

Nag-inusara akong ginikanan sa 11-anyos nga batang lalaki ug 9-anyos nga batang babaye, ug nagpuyo kami sa dapit nga daghag nagkalainlaing gang. Akong gibasa kining magasina ug dihadihang gihisgotan kini uban sa akong mga anak. Sa tabang sa artikulo, ilang nasabtan nga ang pag-anib sa gang dili gayod ikapuli sa gugma o sa usa ka hilwas nga pamilyahanong kinabuhi.

B. S., Tinipong Bansa

Akong kinasingkasing nga mga pasalamat alang sa mga artikulo. Sagad akong nabalaka bahin sa akong tin-edyer nga mga pag-umangkong lalaki, ug ang impormasyon nga inyong gitagana napamatud-ang makatabang gayod kaayo.

I. M. M., Brazil

Husto gayod sa panahon ang pag-abot sa mga artikulo tungod kay ang pipila sa akong mga klasmet nagpormag usa ka gang. Ang uban dili segurado kon gusto ba gyod nilang magpasakop sa usa niini, sanglit ang lider nagpasulat kanilag law-ayng mga pulong diha sa bungbong bahin sa among prinsipal. Salamat sa pagtabang sa mga batan-on niining lisod nga mga panahon.

B. C. G., Mexico

Pagbalda Pinaagig mga Higala Gusto lang kong mosulti kon unsa ka dako ang akong pagpabili sa artikulong “Mga Batan-on Nangutana . . . Sa Unsang Paagi Malikayan Nakong Mabalda Pag-ayo sa Akong Higala?” (Abril 22, 1998) Bisan tuod ako hingkod ug minyo na, malingaw ko kanunay niining mga artikuloha. Kining partikular nga artikulo mihaom gayod sa kahimtang nga nasinati ko ug sa akong bana karon nga gibasa ko kinig lima ka beses una pa kini gibutang. Nakatabang kini kanako sa pagkakat-on nga bisan si Jesus nagkinahanglag panahon alang sa iyang kaugalingon.

P. A., Trinidad

Tungod sa gamayng di-pagkasinabtanay, ang akong higala ug ako usahay dili na mag-estoryahanay, ug nakapahiubos kini kanako pag-ayo nga dili na ko makasentro sa pagtagad. Human nga nabasa ang artikulo sa daghang higayon, akong naamgohan nga ginabalda ko ang akong higala ug wala maghatag kaniyag panahon sa pagbuhat sa ubang mga butang. Akong gibati nga kining artikuloha gisulat alang gayod kanako, kay gipakita niini kanako ang daghan kaayong paagi sa pagpalambo sa akong mga relasyon ngadto sa uban.

R. S., India

“Orthodontics” Sa di pa dugayng pagduaw ngadto sa akong dentista, nagbilin ko ug kopya sa Abril 8, 1998, nga Pagmata!, nga naundag artikulo bahin sa orthodontics. Sa ulahi ang dentista miapresyar, nga nag-ingong matulon-anon ug laktod ang artikulo ug gisulat sa paaging daling masabtan. Matod pa usab niya nga iyang gihatagag mga kopya sa artikulo ang pipila ka pasyente aron matabangan sila sa pagsabot sa ilang programa sa pagtambal.

T. P., Inglaterra

Kasaysayan sa Kinabuhi ni Grace Marsh Gusto kong ipahayag ang akong pasalamat alang sa kasinatian ni Grace Marsh diha sa Pagmata! (Abril 22, 1998) Makapalig-on ug makapadasig ang pagbasa bahin sa iyang kaisog sa pagpadayon sa pagsangyaw bisan pa sa pagsupak. Labi pang nakapadayeg nako ang kagawasan nga atong naangkon sa pagsangyaw ingong resulta sa mga paningkamot sa mga igsoon sa nangagi.

C. F., Tinipong Bansa