Gikan sa Among mga Magbabasa

Mga Kalisdanan sa Bakasyon Nalingaw gayod ako sa artikulong “Kon Unsaon nga Imong Malikayan ang mga Kalisdanan sa Bakasyon.” (Hunyo 22, 1998) Daghan akog nakat-onan. Pananglitan, wala gayod ako mahibalo nga modako ang risgo sa pagpanibug-ok sa dugo sa dihang ikaw maglingkod sa huot nga mga dapit sa daghang oras.

L. G., Tinipong Bansa

Mga Tawo—Mas Hataas ba Lamang nga mga Mananap? Buot kong ipahayag ang akong dakong apresasyon alang sa serye sa mga artikulong “Mga Tawo—Mas Hataas ba Lamang nga mga Mananap?” (Hunyo 22, 1998) Kining mga artikuloha maoy maayo kaayong pagkahunahuna ug maayo kaayong pagkasulat. Ang aktuwal nga mga pagkutlo sa ilado-kaayong mga awtoridad naghimo niini nga angayan nga basahon sa mga eksperto. Sa kataposan imposible gayod nga dili mouyon—kita maoy mga linalang sa Diyos.

A. D., Slovakia

Makalingaw kining mga artikuloha. Ang Pagmata! tinong nahibalo kon unsaon sa pagpamubo sa lisod sabton ug komplikadong mga kamatuoran ngadto sa yano, dili-malalis nga mga pahayag.

C. L. D., Alemanya

Ang hulagway sa hapin sa mga artikulo madanihon kaayo, ug ang mga kaundan sa susama madanihon. Gipabilhan ang inyong makanunayong mga paningkamot sa pagdepensa sa kamatuoran sa Bibliya batok sa malimbongong mga teoriya. Diha sa buluhatong pagsangyaw, kini nga gula sa Pagmata! nakapukaw ug dakong interes taliwala sa mga batan-on; daghang bukas-ug-hunahuna nga mga tawo ang midawat niini.

M. M., Italya

Usa ka Robot Nagsuhid sa Mars Human lamang sa akong pagbasa sa serye sa mga artikulo nga naglaraw sa dako kaayong kal-ang nga nagbulag sa tawo gikan sa mga hayop, ako mipakli sa artikulo nianang mao gihapong gula nga nag-ulohag “Usa ka Robot Nagsuhid sa Mars.” (Hunyo 22, 1998) Pagkatin-aw ug pagkadili-malalis nga gipamatud-an sa maong artikulo ang mahitungod sa intelektuwal nga kal-ang tali sa tawo ug mga mananap!

G. D. M., Tinipong Bansa

Unsa na man Kon Dili Niya Baslan ang Akong Gugma? Karong adlawa akong nadawat ang Hunyo 22 nga gula sa Pagmata!, ug sa dihang akong nakita ang artikulong “Mga Batan-on Nangutana . . . Unsa na man Kon Dili Niya Baslan ang Akong Gugma?,” dihadiha ako nagpasalamat kang Jehova sa pagtubag sa akong mga pag-ampo. Determinado ako sa paghatag ug pagtagad niining artikuloha uban sa akong mama ug sa pagpadapat sa tambag diha sa akong kinabuhi. Ang serye sa “Mga Batan-on Nangutana . . .” usa gayod ka mahigugmaong tagana gikan kang Jehova nga Diyos.

K. M., Kenya

Usa ako ka 22-anyos nga babaye, ug ako nalingaw sa matag gula sa inyong magasin; apan kini mao ang unang higayon nga ang usa ka artikulo nakatandog pag-ayo sa akong kasingkasing. Sa dihang akong gisugdan sa pagbasa kana, milugmaw ang mga luha sa akong mga mata. Sa panahong miagi parehas gayod ang akong gibati sa inyong gihubit, ug ako adunay daghang pangutana mahitungod niana. Kining artikuloha mitabang kanako nga masabtan ang mga butang nga mas tin-aw.

R. B., Lithuania

Sa dihang akong nabasa kining artikuloha, ang akong reaksiyon mao, ‘Sa unsang paagi nga dunay usa nga nakasabot sa akong gibati?’ Malipayon kaayo ako sa pagkahibalo nga si Jehova malulotong nakasabot sa tanang butang. Ang magasin miabot karong adlawa, ug bisan pag tungang-gabii na, buot kong mosulat dihadiha.

A. N., Hapon

Bisan kon ang artikulo giandam nga anaa sa hunahuna ang mga babaye, nakaplagan kong kini makatabang gayod. Usa pa lamang ka semana nga sayosayo, ako kusganong gisalikway, ug kini nakapasakit kanako. Ang inyong artikulo mitabang sa pagsusi sa akong gibati. Kini naghupay kanako ug, labawng hinungdanon, nagpakita kanako nga sa dihang magpilig asawa, kinahanglan kong hunahunaon ang paghatag, dili ang pagkuha.

P. H. S., Brazil

Ang katilingban sa Korea nagbutang ug dakong pagpasiugda bahin sa pagminyo sa usa ka babaye sa dihang siya anaa na sa hustong edad. Usa gayod ka hagit alang sa usa ka Kristohanong babaye nga maghulat hangtod nga siya “lapas na sa pagbuswak sa pagkabatan-on” sa dili pa magminyo. (1 Corinto 7:36) Salamat sa ekselenteng tambag.

S. C., Korea