Gikan sa Among mga Magbabasa
Diborsiyo Ang inyong mga artikulo bahin sa “Diborsiyo—Ang Kapildihan sa Tawo” (Pebrero 8, 1992) nagtukmod nako sa pagsulat. Niadtong 1988, ako nakigdiborsiyo tapos sa upat ka tuig nga pagkaminyo sa akong trato sa hayskul. Akong masulayan unta ang pagluwas sa akong kaminyoon kon nasayran ko pa kaniadto kon unsay akong nasayran karon. Ang diborsiyo makapahapay nimo sa pinansiyal. Ug samtang ang mga babayeng diborsiada pahimudsan sa mga minyong lalaki, ang mga ulitawo dili moangay sa mga babayeng may mga anak. Sila tingali makigdeyt kanimo, apan sila dili maninuod. Ako nanghinaot gayod nga kining artikuloha magluwas sa labing menos usa ka kaminyoon; ako wala makaluwas sa akoa.
T. R., Tinipong Bansa
Ang inyong punto nga adunay makaguol nga sangpotanan sa diborsiyo, bisan pag adunay maayong mga katarongan, nasabtan pag-ayo. Usahay bation ko nga ako nagalangoy sa dagat sa mga emosyon. Ang paglabay sa panahon, ang naandang mga kalihokang espirituwal, ug ang mga malumong kaluoy ni Jehova nakapakunhod sa kasubsob ug kagrabe nianang lisod nga mga emosyon.
M. H., Tinipong Bansa
Mga Batan-on Nangutana Salamat sa artikulong “Mga Batan-on Nangutana . . . Normal ba ang Pagkahimong Ulay?” (Marso 22, 1992) Sanglit daghan ang mokatawa ug mobiaybiay kanako tungod sa pagtipig sa akong pagkaulay, ako nagsugod sa pagbatog mga pagduhaduha bahin niini. Apan ang maong artikulo nag-abli sa akong mga mata. Ako nakahukom sa pagtipig sa akong lawasnon ug emosyonal nga kaayohan, ug labing hinungdanon, akong maayong relasyon uban sa Diyos.
A. R., Brazil
Nakaangay ako sa artikulo sa “Mga Batan-on Nangutana . . .” nga “Nganong Dili Ako Mohaom?” (Oktubre 22, 1991) Kana miabot sa panahong gibati ko gayod ang dakong kasubo tungod kay dili mohaom sa mga pundokpundok. Ako susama sa batan-on nga miingon, ‘Kon wala ka magsul-ob ug husto nga sapatos sa tennis, dili ka mohaom,’ kay ako walay kuwarta sa pagpalit sa tanang nauso nga biste. Ang inyong artikulo nakatabang nako sa pagsabot nga wala ako mag-inusara.
K. M. S., Tinipong Bansa
Salamat sa artikulong “Mga Batan-on Nangutana . . . Unsa man Diay kon Pobre ang Akong Pamilya?” (Enero 22, 1992) Bisan pag dili ako batan-on ug dili gayod kabos, kining artikuloha nakatabang nako. Ang akong bana ug ako nakaagig lisod kaayong mga panahon. Ang kahimtang morag walay paglaom nga akong gibati nga dili na makalihok. Ang impormasyon mitabang nako sa pag-amgo nga ang akong negatibong panghunahuna nakapasamot lamang sa kahimtang. Karon ako mas makaantos na.
K. J., Tinipong Bansa
Incas Bag-o pa kong nakahuman sa pagbasa sa artikulong “Ang Pagtan-aw sa Bulawanong Panahon sa mga Inca.” (Enero 22, 1992) Ako 15 anyos, ug ang pagtuon sa una-Columbianhong mga sibilisasyon sa Amerika del Sur sa kanunay nakapaikag kanako. Ang inyong artikulo makaiikag kaayo, dili madapigon, ug lahi sa uban nga akong nabasa. Kining matanga sa materyal motabang kanato sa pagdugang sa atong kahibalo sa lainlaing mga ulohan sa praktikal ug sa makalingawng paagi.
D. A. S., Argentina
Mga Suliran sa Pagkaon Salamat sa artikulong “Pagtabang sa May Suliran sa Pagkaon.” (Pebrero 22, 1922) Ang labing suod nako nga higala kanunay moreklamo sa iyang timbang. Siya may timbang nga 45 kilos lamang o duolduol niana, ug ako doble sa iyang gidak-on! Busa kana mopabati gayod nako ug kaulaw sa akong pagkatambok. Nasulayan na nako ang tanang diyeta nga anaa apan wala molampos. Ako may gamay kaayong pagtahod sa akong kaugalingon tungod sa pagkadako kaayo. Ang inyong artikulo nakatabang sa pag-ugmad diha kanako ug dugang pagtahod sa akong kaugalingon.
P. M., Tinipong Bansa
Ako nahigawas sa kusog nga pangupot sa bulimia sa duolan na karon ug duha ka tuig. Ang matag-adlaw nga pagsusi sa akong bana, ingon man kanunay nga pag-ampo kang Jehova, nahimong akong luksohanan padulong sa pagkaayo. Laing butang nga mitabang mao ang paghupot ug makapahimsog nga mga pagkaon sama sa prutas ug utanon sa akong kusina inay sa way-sustansiyang mga pagkaon. Katingalahan ang pagkatam-is sa peach inighunong nimog kaon sa mga pagkaong way-sustansiya!
S. G., Tinipong Bansa