Gikan sa Among mga Magbabasa
Pagkahilo sa Tingga Mao pay pagkahuman nakog basa sa mga artikulong “Pagkahilo sa Tingga—Ikaw ug ang Imong mga Anak Nameligro Ba?” (Nobyembre 22, 1992) ug buot ko nga pasalamatan kamo alang niining haom sa panahon, timbang, nga mga artikulo. Naglaom ako nga sa umaabot makasulat kamo ug susamang artikulo bahin sa kalangkitan sa aluminum ug sa sakit nga Alzheimer.
D. C., Canada
Kining maong gula gilakbitan na ug hisgot diha sa artikulong “Polusyon—Kinsay Nagpahinabo Niini?” diha sa among Mayo 8, 1990 nga gula.—ED.
Kinamanghoran Ako 13 anyos ug ang kinamanghoran sa lima. Ang artikulong “Mga Batan-on Nangutana . . . Nganong Ako pa ang Kinamanghoran?” (Oktubre 8, 1992) gipabilhan ug dako. Gibati ko ang sama gayod sa gibati sa mga batan-ong inyong gikutlo, ug naglaom ako nga kining artikuloha mohatag kaayohan sa akong tibuok nga pamilya. Salamat kaninyo sa pagtabang kanamong mga batan-on.
C. M., Tinipong Bansa
Ako ang kinatung-an sa mga anak, apan daghan ang giingon niining artikuloha nga ikapadapat sa akong gibati. Gibati ko usab nga daw nagabayad ako sa mga sayop nga nahimo sa akong igsoon nga lalaki. Ang akong kurpiyo nahimong alas nuybe tungod kaniya. Ako ug ang akong igsoong babaye usa ra ug lawak, ug ako walay pribasiya. Sa gihapon, ako nalipay nga nahimong kinatung-an sa mga anak, nga may magulang nga lalaki nga katun-an ug manghod nga babaye nga katudloan. Wala gayod ako mag-inusara. Busa salamat kaninyo sa pagsulat sa maong artikulo; bisag dili ako ang kinamanghoran, apan ako nakabatog kaayohan niana.
N. R., Tinipong Bansa
Mga Kamot Samtang nagbasa ako sa artikulong “Ang Atong Kahibulongang mga Kamot” (Agosto 8, 1992), dili ako makapugong sa dili pagtan-aw sa akong kaugalingong mga kamot. Wala ko kini kahatagig-bili kon unsa ka kahibulongan kining mga sangkapa nga gihatag ni Jehova kanato. Sa unsang paagi ang pipila makatuo nga ang mga tawo maoy resulta sa ebolusyon? Nagtuo ako nga daghan ang mag-usab sa ilang hunahuna sa dihang ilang mabasa kining artikuloha.
E. M., Brazil
Iron Lung Ako nagsulat uban sa akong mga mata nga puno sa mga luha human nga nabasa ang kasaysayan ni Laurel Nisbet, “Bisan ang ‘Iron Lung’ Dili Makapugong Kaniya sa Pagsangyaw.” (Enero 22, 1993) Ang iyang pagtuo maoy usa ka sumbanan kanatong tanan karong adlawa. Makapatandog gayod ang pagbasa kon sa unsang paagi ang iyang kahimtang nakatabang sa daghan pang uban nga mahibalo bahin kang Jehova. Siya determinado usab sa dili paglapas sa pagkabalaan sa dugo ug gigamit ang tibuok niyang kusog sa pagpatin-aw sa iyang baroganan ngadto sa iyang doktor, bisan siya himalatyon na. Salamat kaninyo uban sa tibuok kong kasingkasing sa pagpatik sa iyang kasinatian.
Y. C., Italya
Hinawayong mga Ginikanan Ang mga artikulo sa “Mga Batan-on Nangutana . . . ” “Nganong Wala Akoy Mahimong Maayo?” (Nobyembre 22, 1992) ug “Unsaon Nako Pagsagubang ang mga Panaway sa Akong mga Ginikanan?” (Disyembre 8, 1992) miabot nga tukma gayod sa panahon. Gibati ko ang kasubo tungod kay ang akong amahan kanunay gayong may makitang ikabagulgol bahin nako. Karon maningkamot gayod ako sa pagdawat sa panaway nga malinawon ug dili masuko nga modawat niana.
M. Z., Italya
Ang mga artikulo aplikado gayod kanako. Nagtuo ako nga sawayon ako kanunay sa akong mga ginikanan tungod kay ako dili makahimog maayo. Natabangan ako sa inyong artikulo sa pagkakita nga ang ilang disiplina maoy bunga sa ilang gugma ug nga buot nila nga ako molampos. Sukad nga nabasa ko ang inyong artikulo, ang akong mga ginikanan wala na kaayoy ikareklamo.
S. P., Tinipong Bansa
Dili Kristohanon ang akong inahan, ug wala akoy nahimong maayo alang kaniya. Apan kining artikuloha nakatabang kanako sa pagsabot pa kaniyag maayo. Ang resulta sa akong paningkamot? Siya mamati na karon ug motuo na sa akong isulti kaniya gikan sa Pulong sa Diyos!
M. T., Pilipinas