Tagamtama ang Mexicanhong Taco
Sumala sa koresponsal sa Pagmata! sa Mexico
UNSA ang taco? Diha sa Espanyol-sinultihan nga kalibotan, mahimo kanang magpasabot sa daghang mga butang. Sa Espanya magkahulogan ngani kana ug balikas! Apan sa Mexico ug Amihanang Amerika, kana nagpasabot sa pagkaon. Unsay dagway niana? Unsay lami niana?
Usa kana ka klase sa sandwich nga hinimo pinaagi sa manipis nga tortilla, pislat nga lingin nga ginama ug harina sa mais. Kini ilikit sa kadaiyang saksak-sinagol nga sahug ug usahay pinirito. May mga tortillas usab nga ginama sa harinang trigo. Importante kaayo ang mga tortilla sa Mexico nga ang tinuod mexicano dili makasugod sa paghanduraw ug usa ka kan-anan nga wala kini.
Ning bag-o pa, ang inadlaw Mexicanhong mantalaan nga El Universal nagluwat ug artikulo uban sa ulohan nga “Mga Taco: Usa ka Luhong Butang.” Kauban sa laing mga butang, kana miingon: “Kita kinahanglang motawag sa atong kaugalingon nga mga tacomexicanos, sanglit, sa walay duhaduha, kana ang atong paboritong pagkaon.” Apan ang pila ka mga taco mahal na kaayo nga alang sa daghang Mexicanhon sila maoy usa ka luho. Ug bisan pa kana ang “matag-adlaw nga tinapay” sa mga kantero, mamumuo sa pabrika, mangunguma, ug manungasay sa bukid, nga mibati nga dili sila mabuhi kon wala kana. Makaiikag nga tan-awon ang mga kantero nga mokaon sa ilang paniudto. Sila mohaling ug initon ang mga taco ibabaw a comal, o kolonon tapan nga plato—ug pagkalami nila!
Kon hinikay-sa-balay, ang mga taco dili kaayo mahal. Puwede nimong sudlan ang tortilla sa bisan unsang butang makaon: giprito pag-usab nga mga balatong, keso, karne, patatas, kan-on, karneng baboy, manok, ug uban pa. Sila mahimong yano kaayo o kuti kaayong pagkahikay, apan bisag giunsa nimo paghikay kanila, sila makatagbaw alang sa usa ka diyutay nga kan-anan.
Ang Labing Iladong Taco
Sa Yucatán Peninsula, sila nagahikay sa gitawag ug cochinita pibil. Sila mag-ihaw ug baktin, hinloan kana pag-ayo, puston kana sa panakot gitawag achiote, ug unya asalon kana. Ang unod humok nga lami nga walay kasama. Ang cochinita pibil nga mga taco ilado sa tibuok Mexico ug mahalin sa katulinon sa ilang paghikay.
Ang mga taco mahimong kaonon nga giprito o wala. Aron may kagumkom kaayo nga taco, gamita ang init nga mantika o lana. Ituslob ang mga taco ngadto sa lana sa igong gidugayon nga magpabrawon kanila, unya kuhaon sila ug patuloon. Unya ibutang ang imong halang nga sarsa ug aslom nga krema kon gusto nimo. Sila sa walay sipyat lami!
Ang labing ilado nga mga taco diha sa Siyudad sa Mexico maoy steak nga taco nga gisugba sa uling. Kon gusto nimo maghikay niana sa balay, pagkuha ug mga karne pang-isteak nga mga 110 gramos, butangig gamay nga duga sa agridulse ug sili, unya parilyahon sila ibabaw sa uling. Butangig gamay nga sibuyas usab samtang ginaparilya. Sa dihang makita nimo nga nagduga sa ibabaw sa mga steak abori sila ug asin (tinimplahag-sibuyas nga asin kon gusto nimo) ug unya baliha sila. Sa kasamtangan, pag-init ug duha ka mga tortillas. Sa dihang ang karne naluto nag maayo, ibutang kana tali sa duha ka tortillas, ug yab-ig daghang pula o berde halang nga sarsa kauban sa duha ka buok nga sibuyas. Atua may usa ka na ka diyutayng kan-anan nga makalilipay gayod. Ang samang pamaagi mahimong ipadapat sa mga fajitas, nigpis nga mga hiwa sa karne.
Ang carnitas nga mga taco maayo kaayong sulayan. Ang karneng-baboy hiwaon nga gagmay ug pritohon sa iyang kaugalingong mantika diha sa lalom tumbaga nga kaldero. Ang asin gitawag ug sal-tierra idugang sa karne aron mopula ang bulok. Kini kauban sa inasal nga karnero maoy pangunang mga butang alang sa mga piknik. Ngano? Siyempre, sa Siyudad sa Mexico may mga 18 ka milyong tawo, ug ang siyudad gialirongan sa gagmayng mga lungsod sa kabukiran. Busa kada tapos-semana linibo ka mga pamilya manungas sa kabukiran, ug inay sa pagdala sa ilang kaugalingong hinikay-sa-balay nga pagkaon, sila mopalit ug ilang karne, daghang mga tortillas, keso, utanon sama sa nopales (linghod prickly pear nga kaktus) ug watercress. Ang coriander, ug ubang mga lamas ginagamit sa paghikay sa lamiang halang nga sarsa. Alang sa panghinam-is, may pila sila ka mga bunga sa kahoy.
Sa sunod higayon nga ikaw nagdali, timan-i nga ang Mexicanhong mga taco puwedeng hikayon sa pipila ka minutos. Busa, nganong dili tilawan ang Mexicanhong taco? Magustohan nimo kana!