Ang Pagmata! Nagtabang sa mga Hinabako sa Pagbiya sa Bisyo!

KALIM-AN KA MILYON. Ingon niana kadaghan ang mga tawo nga nanabako sa Tinipong Bansa lamang. Nianang gidaghanona, dos tersiya gusto nga hunongon ang bisyo. Ug dili ikahibulong, kay sa Tinipong Bansa, hapit 400,000 ka tawo mamatay kada tuig ingong sangpotanan sa paggamit sa mga produkto sa tabako. Sa Pransiya, 65,000 ka tawo ang mamatay kada tuig ingong sangpotanan sa pagpanabako. Sa Alemanya ang gidaghanon maoy 70,000.

Uban sa panlantaw sa pagluwas ug mga kinabuhi, ang Pagmata! nagpatik ug serye sa mga artikulo bahin sa pagpanabako sa iyang Hulyo 8, 1989, nga isyu ubos sa tema nga “Kamatayon Ginabaligya.” Ang hapin nga letrato​—usa ka ulo sa kalabera nga may sigarilyo sa baba​—parehong makaalinggat ug makapahinuklog. Naghimo kana ug dakong kontrapuntos sa panghinapos nga artikulo, “Napulo ka Paagi sa Paghunong sa Panabako.” Ang pangutana mao, Ang isyu ba sa tinuod makatabang sa grabeng hinabako?

Si Rolf, usa sa mga Saksi ni Jehova nga nagpuyo sa Alemanya, nakahukom sa pagtan-aw. Siya may kauban nga grabeng hinabako sulod sa daghang katuigan ug nakasulay sa paghunong sa makadaghang higayon nga wala molampos. Busa si Rolf naghatag kaniya ug kopya sa “Kamatayon Ginabaligya” nga isyu sa Pagmata! Ang resulta?

“Tungod sa tabang sa tambag nga gihatag sa Pagmata!” nagtaho si Rolf, “siya wala manabako sulod sa 18 ka bulan. Matag panahon nga mobati siya nga kasigarilyohon, iyang kuhaon ang magasin sa iyang lamesa, ug ang pagkakita sa ulo sa kalabera nga may sigarilyo sa iyang baba paigo na sa pagsanta kaniya sa pagpanigarilyo pag-usab.” Kining dramatikong pagbali sa mga hitabo wala matago sa uban. Ang ikaduhang kauban nangutana sa una kon sa unsang paagi siya nakahimo sa paghunong sa panigarilyo. Siya gitunolan sa Pagmata! ug giingnan, “Pinaagi niini.” Ang resulta? Siya usab mihunong sa pagpanigarilyo ug sa pagkakaron nagbiya sa sigarilyo sulod sa kapin sa usa ka tuig!