Tubig nga Makamatay

GIEKSAMIN sa mga tigdukiduki gikan sa Mayor de San Marcos National University sa Peru ang 30 ka sampol sa tubig gikan sa mga pasilidad sa publiko ug sa mga residente sa siyudad sa Lima. Sumala sa Visión, usa ka magasin sa Latin-Amerika, 29 ka sampol grabeng nahugawan sa mga kagaw ug sa mga kinalibang. Usa ka sampol sa tubig lamang ang luwas nga imnon sa tawo.

Ang Ministri sa Panglawas sa Peru mihinapos nga 50 porsiento sa tubig nga gigamit sa mga tawo sa Lima makapasag sakit nga “kalibang, tipos, hepatitis, kolera, ug ubang mga sakit sa tiyan.” Ang ilabinang ilado mao ang epidemiya sa kolera nga mihapak sa Peru, nga nakatakod ug mga 150,000 ka tawo ug mipahinabog 1,100 ka kamatayon tali lamang sa Enero ug Abril sa 1991.

Ang kaylap nga girekomendar nga solusyon sa problema mao ang pagpabukal ug dugay sa tubig aron mamatay ang nagahatag sakit nga mga kagaw. Bisan pa, kini dili kanunay sayon nga himoon. Ang Visión miingon nga alang sa “kadaghanang pamilya mahal ang magpabukal ug tubig sulod sa diyes minutos tungod kay ang usa ka galon nga gas mokantidad man ug kapin sa usa ka dolyar,” nga usa ka taas nga porsiento sa aberids nga kita sa usa ka semana.

Ang problema sa hugawng tubig nga ilimnon dili lang makita diha sa daghang kabos nga mga nasod. Pananglitan, sumala sa The New York Times, sa Tinipong Bansa, “gibanabana nga matag tuig kapin sa 250,000 ka bata ang naladlad sa tingga diha sa tubig ilimnon sa taas nga gidaghanon nga igong makadaot sa kaugmaran sa ilang hunahuna ug panglawas.” Ug sa Uropa dunay nagatubong kabalaka bahin sa hugawng mga tuboran sa tubig. Ang magasing New Scientist mitaho nga ang “kadaghanan sa suplay sa tubig sa Uropa nagagikan sa mga agosanag-tubig, nga delikadong mahugawan sa kemikal ug metalikong mga substansiya.”

Diha sa Pinadayag 14:7, ang Bibliya naghisgot kang Jehova ingon nga mao “ang Usa nga nagbuhat sa langit ug yuta, sa dagat ug sa mga tuboran sa tubig.” Siya usab dunay gahom sa paghimo sa pait ug hugawng mga tubig nga matam-is ug hinlong mga tubig. (Exodo 15:22-25; 2 Hari 2:19-22) Kini iyang pagahimoon sa tibuok yutang gilapdon human laglagon ang nagalaglag karon sa yuta.​—Pinadayag 11:18.