Gikan sa Lubi Ngadto sa Coir

Sinulat sa koresponsal sa Pagmata! sa India

HALOS ang tanan pamilyar sa lubi. Apan unsa ang coir? Kini maoy usa ka pakapin gikan sa matag usa ka lubi.

Naputos sa gahi nga bagol ang lami puti nga unod sa lubi. Ang ibabaw sa bagol mao ang baga nga bunot, nga isipon sa uban nga biya. Dinhi sa habagatang India, diin daghan kaayo ang lubi, ang mga lubi bunotan ug huloman ang bunot hangtod sa walo ka bulan. Unya kinamot nga palopalohon kini aron mohumok ug unya gilison sa makina hangtod nga mobuhaghag, mahimong bulaw nga mga lanot nga gitawag ug coir.

Ang coir matina sa nagkalainlaing mga kolor. Unya kinamot nga lubiron kini ug bilikon aron mahimong linubid nga coir. Himoon sa mga de-mano nga hablanan ug de-makinang mga hablanan ang coir ngadto sa maanindot nga mga pahiran sa tiil, mourzouks (bug-at nga alpombrang coir), mga karpet, hanig sa salog, ug mga panghaklap sa bungbong.

Ang mga produkto sa coir himalitan sa tibuok-kalibotan ug alang sa maayong katarongan. Ang lig-on nga coir dili-agop-opon; dili makutkot sa anunugba, dili madunot, ug dili tomtomon; walay istatik; ug dili masunog. Maayong insulasyon usab kini batok sa temperatura ug sa kagahob. Handurawa​—kanang tanan maoy gikan sa bunot nga kasagarang ilabay kay walay pulos!

[Hulagway sa panid 16]

Ang mga bunot huloman sa tubig hangtod sa walo ka bulan

[Mga hulagway sa panid 16]

Mga pahiran sa tiil nga hinimo sa tinina nga coir