Ang Pagtuo ni Wyndham—Sa Unsang Paagi Kini Nakaapektar sa Uban
ANG magasing Pagmata! sa Agosto 22, 1991, mipatik ug usa ka artikulo bahin sa pagkamatinumanon ni Wyndham Cook sa balaod sa Diyos nga nagsugo sa mga Kristohanon sa pagpalayo gikan sa dugo. (Buhat 15:20; 21:25) Si Wyndham dunay varicose veins sa iyang tutunlan, ug siya may sakit sa dugo nga dili manibug-ok. Ang artikulo mitaho nga siya naluwas sa daghang hitabo sa pagdugo, ang usa diin ang gidaghanon sa iyang hemoglobin mius-os sa 2. Makasubo, usa ka potnot sa artikulo nag-ingon: “Samtang gipatik kining magasina, si Wyndham namatay human nag-antos sa laing pagdugo.”
Epekto sa Isigkabatan-on
Daghang batan-on sa Tinipong Bansa misulat sa Pagmata! nga nagpahayag ug apresasyon sa artikulo ug gibatbat ang epekto niini diha kanila. Ang usa nga gikan sa Clinton, Iowa, nag-ingon: “Sa nagbasa ako sa pagbarog niining 15-anyos nga bayong ngadto sa mga doktor ug mapailobong mipatin-aw kanila kon nganong dili siya modawat ug dugo, kini nagpukaw kanako sa pagsusi sa akong kaugalingong pagtuo ug nangutana sa kaugalingon kon unsay akong buhaton kon ako pa ang anaa sa iyang lugar. Ang pagtuo ug pag-antos ni Wyndham mipabati kanako nga labi pang magmadeterminado nga kon ako mahimutang sa kinabuhi-ug-kamatayon nga kahimtang, mobarog ako sama kaniya.”
Usa ka sulat nga gikan sa 15-anyos sa Maiden, North Carolina, nag-ingon: “Human nabasa ang pag-antos ni Wyndham ug ang iyang pagsalig kang Jehova bisan hangtod sa kamatayon, ako mihilak. Gisukna ko ang akong kaugalingon nianang nagatuki-sa-kasingkasing nga pangutana, ‘Ako ba ubos sa maong mga kahimtang motugyan sa akong kinabuhi diha sa mga kamot sa Diyos ug mosalig kaniya sa bug-os nga hinumdoman ako?’
“Gibalikbalik ko ug basa ang artikulo sa daghang higayon, ug maoy tinguha ko ang pagtan-aw niana sa bisan unsang panahong bation ko ang kasubo tungod niining malupigong kalibotan. Ang pagtuo ni Wyndham nagahatag ug pagdasig. Nagpaabot ako nga makakita kaniya diha sa gisaad ni Jehova nga bag-ong kalibotan.”
Laing batan-on, gikan sa New York City, misulat: “Kanunay kong gipalandong ang akong kaugalingon nga anaa sa situwasyon nga sama kang Wyndham Cook ug nahibulong kon unsay akong isulti kon sultihan ako sa akong doktor nga mamatay ako kon dili ako modawat ug abuno sa dugo. Ako napuno kanunay sa kaisog ug napalig-on sa gamhanang mga panig-ingnan, sama kang Wyndham, sa pagbuhat sa akong labing maayo diha sa pag-alagad kang Jehova.”
Usa ka batan-on gikan sa Kent, Washington, mipatin-aw: “Akong gikuha ang magasin gikan sa akong post office kagahapon ug nakatapos sa pagbasa niana sa wala pa ako makaabot sa balay. Gitawag ko ang akong mga higala gikan sa kongregasyon ug girekomendar ang artikulo. Unya nianang gabhiona among gitun-an kini alang sa among pagtuon sa pamilya.” Nakamatikod sa epekto niini diha kaniya, siya miingon: “Kini dili lamang nagpamatuod nga makapadasig ug makapalig-on sa pagtuo apan kini nakapahimo kanako, sa edad 17, sa pagpangutana sa akong kaugalingon kon ako makabarog ba sa maong pagsulay.”
Usa ka batan-on nga gikan sa North Berwick, Maine, misulat: “Ako makasabot kang Wyndham tungod kay 15 anyos usab ako. Dili ko matukib kon unsa ka dako nga ang iyang pag-antos ug kaisog nakapukaw kanako sa paghimo sa akong labing maarangan diha sa pag-alagad kang Jehova. Kon dako kaayo ang iyang nahimo sa pagpahimuot sa Diyos bisan sa iyang luya nga kahimtang, nan unsay akong katarongan sa dili paghimo sa akong labing maarangan?”
“Sa natapos ko pagbasa ang maanindot nga artikulo, ang akong mga mata napuno sa mga luha. Gibati ko nga nakaila kang Wyndham sa tibuok kong kinabuhi. Maayo untang nakaila ako. Unya mitan-aw ako sa iyang hulagway ug sa iyang mga ginikanan ug naghunahuna sa akong kahinam nga makakita sa iyang matahom nga pahiyom pag-usab human sa pagkabanhaw sa dihang siya dili na mag-antos sa kasakit.”
Laing 15-anyos buot magpahibalo sa mga ginikanan ni Wyndham sa iyang gibati bahin sa artikulo. Siya misulat: “Ang kaisog ni Wyndham nakatabang kanako sa pagkakita nga kinahanglang andam ako sa pagbarog alang sa akong mga pagtuo. Sa bisan unsang panahon ako mahimong makadangat sa samang kahimtang. Nanghinaot lamang ako nga kon moabot man ugaling ang panahon nga kinahanglan nga mobarog ako, ako mahimong sama ka maisogon ug ka determinado kang Wyndham sa pagsunod sa gipamulong sa Bibliya.”
“Pagkaanugon nga wala gayod ako makaila kang Wyndham, apan nagpaabot ako nga makaila kaniya sa dihang ang bag-ong kalibotan moabot na. Ang iyang sugilanon nakadasig kanako sa pagbuhat sa tanang maarangan diha sa pag-alagad kang Jehova ug buhaton kini hangtod sa kataposan.”
Makapalig-on sa Pagtuo Ngadto sa Tanan
Usa ka ginikanan nga gikan sa Newark, New Jersey, miingon: “Ako nahimong usa sa mga Saksi ni Jehova sa 22 ka tuig apan tigtambongan na ug mga miting una pa nianang panahona. Ako regular nga nagabasa sa tanan nakong mga magasin, apan wala pa gayod ako makabasa ug sugilanon nga mas makapatandog ug makadasig sama nianang kang Wyndham Cook.”
“Karon ako makapadayon lamang sa pagtuman sa akong hinatag-sa-Diyos nga papel ingong ginikanan pinaagi sa pagtabang sa akong diyes-anyos nga anak nga babaye sa pagbarog nga malig-on ug makapanalipod sa kamatuoran sama sa gihimo ni Wyndham. Kon may kalabotan kini sa isyu sa dugo, sa mga droga, sekso, o bisan unsang mga bisyo nga ipatungha ni Satanas diha kanatong tanan, ilabina diha sa atong mga batan-on, kita kinahanglang magpadayon sa pagpabiling malig-on pinaagi sa pagtukod sa atong pagtuo.”
Usa ka Saksi nga gikan sa Cadiz, Kentucky, mipahayag ug samang mga sentimento, nagsulat: “Kini mao ang usa sa labing makapatandog nga artikulo nga akong nabasa sukad. Si Wyndham maoy usa ka maayo kaayong pananglitan sa tanang mga batan-on nga pagasundon. Mihilak ako samtang nagbasa sa giantos niining buotang batan-ong Saksi. Akong naamgohan nga kitang tanan, batan-on ug tigulang, angay mosunod sa iyang maisog nga pagbarog. Ang panig-ingnan ni Wyndham nagpalihok kanako sa pagsusi-pag-usab sa akong kaugalingon. Nagpalihok gani kini kanako sa pagpaningkamot pa sa pagbuhat nga bug-os-kalag alang kang Jehova, kanunay maningkamot sa pagpakita ug maayong panig-ingnan, sama kang Wyndham, sa pagbalaan sa ngalan ni Jehova.”
Laing Saksi, nga gikan sa Palm Springs, California, misulat: “Kining artikuloha ilabinang nakatandog sa akong kasingkasing. Ako dunay lima ka anak, ug naglaom ug nag-ampo ako nga kon ugaling makaatubang niining matanga sa pagsulay, sila may kalig-on sa pagtuo nga sama kang Wyndham. . . . Si Wyndham maoy usa ka maayong panig-ingnan alang sa atong mga batan-on.”
Ang tinuod nga pagtuo mao ang pasalig sa mga butang nga ginapaabot bisag wala pa makita ug masinati sa usa kining mga butanga. (Hebreohanon 11:1) Si Wyndham may pagtuo sa bag-ong kalibotan sa Diyos ug sa pagkabanhaw sa mga patay tungod sa tukmang kahibalo sa mga saad sa Bibliya. (Buhat 24:15; 2 Pedro 3:13; Pinadayag 21:3, 4) Ang maong pagtuo, nga gipakita bisan atubangan sa kamatayon, sa tino makapalig-on sa tibuok-kalibotan nga panag-igsoonay.—1 Pedro 5:9.