“Karong Gabii Ka Mamatay”

Sinulat sa koresponsal sa Pagmata! sa South Africa

“NAHIBALO ka ba nga ikaw hilimatyon ug nga karong gabii ka mamatay?” miingon ang doktor.

Naluya tungod sa pagkakulang ug dugo, ang 15-anyos nga Wyndham Cook mitubag nga bisag mawala pa ang iyang kinabuhi, siya desidido sa pagbantay sa sugo sa Diyos sa ‘paglikay sa dugo.’​—Buhat 15:20.

“Tionan ba nimog posil ang imong ulo ug posilon nimo ang imong kaugalingon?” mitubag ang doktor.

“Dili gayod,” mitubag si Wyndham. “Apan ang pagdumili sa pagpadugang ug dugo dili pagkihog. Kini maoy yanong pagsunod sa sugo sa Diyos.” Si Wyndham dunay varicose veins sa tutunlan, nga usahay magdugo sa ilalom. Labi pang nakapasamot, si Wyndham may pagka-hemophiliac o dili mobagtok ang iyang dugo kon masamad.

Migim-aw ang Krisis

Masabot, ang mga ginikanan ni Wyndham nabalaka sa dinha, sa Martes, Nobyembre 28, 1989, nagsugod na usab siya sa pagdugo human sa pito ka tuig nga walay suliran. Si Wyndham gidala dayon sa ospital. Human gitan-aw ang ilalom sa tutunlan, ang ihap sa iyang hemoglobin mius-os sa 6.6 gramos matag disilitro. (Ang normal nga ihap sa hemoglobin maoy gikan 14 ngadto sa 15 gramos matag disiletro.) Niadtong gabhiona ang tanan nabalaka samtang si Wyndham matulog ug momata.

Sa pagkaudto sa Miyerkoles ang ihap sa iyang dugo mius-os sa 4.3 gramos, ug siya nagdugo gihapon sa ilalom. Dinhi nagsugod ang una sa daghang pagpakigsulti sa mga empliyado sa ospital kon nganong dili modawat ug pagdugang ug dugo si Wyndham. Ang amahan ni Wyndham, si Chris, mibatbat: “Detalyado kaming nangatarongan ginamit ang Kasulatan. Among gipatin-aw usab nga wala kami magsalikway sa ilang medikal nga tabang, o sa kinabuhi mismo. Sa mga krisis nga sama niini, gikinahanglan gayod namo ang ilang medikal nga kahibalo. Dili lang kami modawat sa dugo ingong tambal.”

Sa alas 2:00 s.h. usa ka mobukad nga tubo ang gipasulod sa tilaokan ni Wyndham, nga mahimong bombahan aron may presyor ang nanghubag nga kaugatan ug busa mapugngan ang pagdugo. Ang tubo gipaabot usab hangtod sa tiyan aron makuha ang dugo nga natigom didto tungod sa pagdugo sa ilalom. Niining higayona, samtang wala diha ang mga ginikanan ni Wyndham, usa ka nars miingon kaniya: “Diyutayng yunit lang sa dugo ug ang imong kinabuhi maluwas. Ang imong ginikanan ug ministro dili kinahanglan mahibalo.”

“Gipainom ni Jesus ug dugo ang iyang 12 ka apostoles,” nangatarongan ang doktor. “Si Kristo miingon, ‘Kini mao ang akong dugo . . . uminom kamo niana.’ Nangangkon ka nga Kristohanon ug nagtinguha sa pagsunod sa panig-ingnan ni Kristo, busa nganong dili ka man magpadugang ug dugo?”

Si Wyndham misaysay nga sa dihang miinom ang mga apostoles sa kopa nga gitanyag ni Jesus, bino kadto nga simboliko lamang ug dili aktuwal nga dugo ni Jesus. Ang malig-ong baroganan ni Wyndham nakahatag sa maong impresyon nga tungod niadto usa ka nota ang gibutang sa iyang file mahitungod niana, sa edad 15, bug-os nga may panimuot ug maayo ang panghunahuna, siya midumili nga magpadugang ug dugo. Kining malig-ong baroganan nabaslan ug dako sa pagkasunod adlaw.

Sa misilang ang adlaw sa Huwebes, daw milig-on si Wyndham. Apan ang kahupayan wala ra magdugay. Nagdugo na usab siya. Sa pagka alas 9:00 s.b. ang ihap sa iyang dugo mius-os sa 3.0. Ang iyang kahimtang kritikal. Ang senyor nga doktor nga maoy tagdumala sa seksiyon sa pag-opera mihangyo sa pamilya ni Wyndham sa paggawas sa lawak kay gusto siyang makigsulti kang Wyndham nga sila lamang duha.

“Dili masayon nga biyaan siya nga mag-inusara,” miingon ang iyang inahan, si Judy. “Nahadlok kami nga sa iyang maluyang kondisyon madaog ang iyang pagbarog. Apan nabawtismohan na siya sa miaging upat ka bulan, ug busa may katungod siya sa pagpanalipod sa iyang kaugalingon.”

“Ang mahimo lamang nato,” nahinumdom ang iyang amahan, “mao ang pagpangamuyo kang Jehova nga tabangan si Wyndham nga maampingan ang iyang integridad. Among nahibaloan ang tinuod nga kahulogan sa pulong ‘pangaliyopo.’” Ang batan-ong Wyndham miingon nga ang nakatabang kaniya mao ang paghinumdom sa Pinadayag 2:10: “Ang mga pulong, ‘Pabilin nga matinumanon bisan pa sa kamatayon, ug hatagan ko ikaw sa purongpurong sa kinabuhi,’ maoy mobalikbalik sa akong hunahuna,” siya miingon.

Sugo ba sa Korte?

Sa kataposan ang doktor miingon nga moaplay siya ug usa ka court order o sugo sa korte sa pagtugot sa pagdugang ug dugo. Sanglit minor de edad si Wyndham, ang tanan naglaom nga ang aplikasyon itugot. Ang mga pag-ampo alang kang Wyndham hilabihan. “Halos ang tibuok kongregasyon nakasinati sa pag-antos uban sa pamilyang Cook,” matud pa ni Neville, ang magdudumalang magtatan-aw sa kongregasyon. “Sa dihang miarang-arang si Wyndham, ang tibuok kongregasyon nahupayan sa kabalaka. Sa mograbe ang iyang kondisyon, ang tanan sa kongregasyon mabalak-ong naghulat sa resulta ug nag-ampo alang sa mas malipayong sangpotanan.”

“Samtang naghulat kami sa resulta gikan sa korte,” nahinumdom si Judy, “ang kadaghanan sa among lawas sa mga ansiano miabot ug naghulat diha sa lawak-urarayan sa pasyente. Pagkadako nila nga panalangin! Samtang nagpadayon ang pagdugo ug sa ihap sa dugo nga 2.9, daw walay posibilidad nga mabuhi si Wyndham.”

Wala pay oras, miabot ang tubag nga nag-ingon nga ang sugo sa korte sa pagpugos kang Wyndham sa pagpadugang ug dugo gidumilian. “Kami gisultihan,” misaysay si Chris, “nga ang rason sa pagdumili mao nga bug-os may panimuot si Wyndham ug may maayong panghunahuna. Siya nahibalo sa sangpotanan sa iyang desisyon, ug siya nakahimog maayong pagkapalandong nga desisyon nga nahiuyon sa iyang pinasukad-sa-Bibliya nga mga pagtulon-an.”

Nag-ungaw sa Kamatayon

Apan wala moarang-arang ang kondisyon ni Wyndham. Gani, sa pagkaudto sa Huwebes, si Chris ug Judy gipahibalo: “Pipila na lang ka oras ang kinabuhi sa inyong anak. Kon gusto ninyong makakita ang inyong ministro ug paryente kaniya sa dili pa siya mamatay, mas maayong inyo na silang tawgon karon dayon.” Ang igsoon ni Wyndham, ang 9 anyos nga Jonathan, gidala aron makita siya.

Sa pagka ala 1:30 s.h., gitangtang sa empliyado ang tubo nga diha sa sulod sa tutunlan ni Wyndham aron mamatay siya nga may dignidad. Sa misunod nga mga oras, nag-ungaw ang kinabuhi ni Wyndham. Bisan pa nga kritikal, ang iyang kondisyon daw walay-kausaban samtang taas kaayo ang iyang hilanat. Kritikal ang iyang kahimtang sa tibuok gabii.

Unya, sa hinapos sa semana, siya miarang-arang. Nadesisyonan nga papaulion siya sa Lunes, sanglit wala may mahimo alang kaniya sa ospital. Sa iyang pag-abot sa balay, migrabe ang kahimtang. Si Chris nahinumdom: “Among gialsa si Wyndham pasulod sa balay ug gipahigda siya sa kama. Wala pay 45 minutos siya nakamata ug misugod na usab sa kusog nga pagdugo. Hilabihan namong guola! Nag-ampo kami sa Diyos nga tabangan niya kami sa pagsagubang sa kahimtang dihadiha.”

Sulod sa 30 minutos nahibalik si Wyndham sa mao gihapong ospital, sa mao gihapong lawak, sa mao gihapong doktor nga nagtan-aw kaniya. Ang ihap sa iyang hemoglobin mius-os sa 2.5. Niadtong gabhiona gibutangag oksihina si Wyndham, kay naglisod man siya sa pagginhawa. Ang pakigbisog alang sa kinabuhi nagpadayon hangtod sa pagkasunod adlaw sa dihang dihay makapadasig kaayong pagduaw nga nahitabo. “Ang among magtatan-aw sa distrito, si Sarel, ug ang iyang asawa, si Maryann, miduaw sa pakigkita kang Wyndham,” miasoy si Judy. “Si Sarel nagtindog tapad sa kama ni Wyndham, gigunitan ang iyang kamot, mitanyag ug kinasingkasing nga pag-ampo kang Jehova. Napalig-on kami human sa iyang pagduaw.”

Sa tibuok panahon sa krisis ang Kristohanong kongregasyon mihatag ug praktikal nga tabang. Dihay listahan sa kongregasyon alang niadtong mohatod ug pagkaon dili lamang alang sa pamilyang Cook kondili sa ubang mga Saksi ni Jehova nga mopuli sa pagbantay uban kanila. Gihinloan sa mga batan-on ang balay, gipakaon ang iro, nagpasiga sa suga, ug uban pa. Ilang gihimo ang tanang gagmayng butang nga walay panahon ang pamilya sa paghunahuna. Ang pagpaluyo ug pagpalig-on gikan sa isigka-Kristohanon sa panahong sama niini dili angay pakamenoson.

Ang mga doktor midesider na usab nga, gawas sa paghatag ug dugo, wala na silay mahimo pa alang kang Wyndham. Busa, samtang nagdawat pa sa oksihena ug may ihap sa dugo nga ubos sa 2, siya gipapauli sa balay.

Pagkaayo

Ang tambal nga erythropoietin, usa ka sintitikong porma sa hormone nga mopadasig sa utok sa bukog sa paggamag pulang mga selula sa dugo sa makusog, girekomendar aron mataas ang ihap sa dugo ni Wyndham.a Kining tambala wala marehistro sa South Africa, apan gipirmahan ang usa ka waiver ug gipadapat ang tambal sa doktor sa pamilya. Kapin sa tulo ka semana, ang ihap sa dugo ni Wyndham misaka sa 6.2, ug sulod sa unom ka semana kini misaka sa 11.5. Sa milabay ang duha ka bulan, may igo nang kusog si Wyndham sa paggugol ug usa ka bulan uban sa iyang pamilya sa pakigbahin sa pagsangyaw sa katilingban ingong usa ka auxiliary payunir.

Ang usa sa maayong mga resulta sa duol nga engkuwentro sa kamatayon mao ang epekto diha niini sa ubang mga batan-on sa kongregasyon. Si Judy miingon: “Sa akong hunahuna kini nakapaamgo kanila nga sila may posibilidad nga makaatubang ug samang baroganan nga walay pahibalo. Sila didto sa ospital, nalangkit sa tibuok nga masakit nga kasinatian, ug nagtuo ako nga ang mensahe nasabtan nila, ‘Seryoso ba natong gitagad ang kamatuoran?’”

Sukad niining yugtoa, si Wyndham malamposong nakalahutay ug laing duha ka hitabo sa pagdugo. Tungod sa iyang kakulian sa lawas, nakaamgo si Wyndham nga siya posibleng mag-antos na usab ug laing atake sa bisan unsang panahon. Apan kon unsa may mahitabo sa umaabot, si Wyndham Cook mahinamong nagapaabot sa panahon dihang gantihan siya ni Jehova nga Diyos sa kataposan ug hingpit nga panglawas sa umaabot nga Paraiso sa yuta. Kasamtangan, si Wyndham sa malig-on matinguhaon sa pagpadayon sa pagkinabuhi sumala sa mga prinsipyo sa Bibliya.​—2 Pedro 3:13, 14; Pinadayag 21:3, 4.

[Footnote]

[Hulagway sa panid 15]

Si Wyndham ug ang iyang mga ginikanan