Gikan sa Among mga Magbabasa
Sugal Ang inyong mga serye sa “Panugal—Mapuslanon Ba?” (Hunyo 8, 1992) maoy ekselente sa pagpakita sa mga epekto sa dili kapugngang pagpanugal, apan kadto dili timbang. Sa pag-ilustrar: Ang pagkahubog sayop, apan ang pag-inom dili sayop sa iyang kaugalingon. Sa susama, ang pagpanugal mahimong makataronganong kalihokan kon kini buhaton sa timbang nga paagi. Ang sugarol nga manugal panagsa dili kinahanglang tapolan o matinguhaon sa linimbong nga ganansiya.
J. R., Tinipong Bansa
Kami dili mouyon nga ang panalagsang pagpanugal ikatandi sa kasarangang pag-inom. Ang ulahi wala hukmi sa Bibliya. Apan, ang Bibliya dayag nga naghukom sa kadalo ug sa bisan unsang pangamuyo “sa diyos sa Maayong Suwerte.” (Isaias 65:11; 1 Corinto 6:9, 10) Ang tawo bisag panalagsa ra nga mosugal matukmod gihapon sa hakog nga tinguha nga makakuhag butang sa ikadaot sa uban. Sa pagkatinuod, ang kasinatian nagpakita nga ang dili kapugngang pagpanugal sagad magsugod ingong kaswal nga pasatiempo. Busa ang mga Kristohanon maalamon nga maglikay sa tanang matang sa pagpanugal.—ED.
Dowsing Buot nakong ipahayag ang akong pasalamat alang sa ekselenteng artikulo “Dowsing—Siyentipikanhon ba o Okulto?” (Abril 22, 1992) Ang akong amahan panalagsang nagapangitag tubig. Sa matag ulpot sa iyang tungkod mopailag usa ka tiil gikan sa bug-os nga giladmon sa tuboran sa tubig. Samtang sa Habagatang Amerika, nakita ko ang dowsing nga gihimo sa susama nga paagi. Apan, didto ang matag ulpot mopailag usa ka metro. Nganong nausab man ngadto sa metros? Dayag, ang natagong intelihensiya lagmit nagagikan sa demonyo.
W. B., Tinipong Bansa
Mga Langyaw Salamat sa inyong mga seryeng “Tabang!—Kami mga Langyaw.” (Mayo 8, 1992) Tulo ka tuig sa miagi mihukom ako sa pagbalhin sa Hapon apan wala mahinayon. Bation ko kanunay nga labing maayo unta kon mibalhin pa ako. Human nga nabasa ang inyong artikulo, hinunoa, akong naamgohan nga ako dili pa andam, kon bahin sa pagtuon sa pinulongan ug sa kultura.
D. G. A., Brazil
Ang artikulo nagpahinumdom kanako sa akong kaugalingong kasinatian. Bisag lumad ako sa Tinipong Bansa, daghang tuig sa miagi ako mibalhin sa usa ka dapit nianang yutaa nga nanginahanglag mga ebanghelisador. Nasinati ko ang pipila ka mga suliran nga naagoman sa mga langyaw sa pagpahiangay. Gitun-an ko ang pagkabukas ug hunahuna ug dili itandi ang akong bag-ong pinuy-anan ngadto sa usa nga akong gidak-an. Ako gani nakakat-on pa bahin sa kinabuhi sa lokal nga tanom ug hayop. Ang artikulo dako kaayong tabang kanako, ug tino ako nga nakatandog kini sa daghan pang uban.
K. H., Tinipong Bansa
Dili-magtutuong mga Ginikanan Ako nadasig sa artikulong “Mga Batan-on Nangutana . . . Unsa man kon Dili Mopaluyo Kanako ang Akong mga Ginikanan sa Akong Pagtuo?” (Enero 8, 1992) Ang akong mga ginikanan maoy masibotong mga magsisimba sa katigulangan ug buot nila nga ako mohunong sa pagkahimong usa sa mga Saksi ni Jehova. Sagad maluya ako, apan sa dihang nakita ko ang pangbukas nga mga pulong sa artikulo, akong naamgohan nga wala ako mag-inusara niining kahimtanga.
Y. M., Hapon
Ang akong mga ginikanan mga Katoliko ug dili ako tugotan sa pagtambong sa mga tigom sa mga Saksi ni Jehova. Gihulga pa nila akong palayason sa balay. Busa nalipay ako nga gidala sa usa ka higala ang artikulo sa eskuylahan aron akong mabasa. Kadto mihatag kanakog kalig-on sa paglahutay, ug karon ako masaligon nga ang akong mga paningkamot dili makawang.
H. W., Tinipong Bansa
Ang artikulo miabot sa tukma kaayong panahon. Ingong nag-inusarang Saksi ni Jehova sa akong pamilya, naagoman ko ang daghang mga pagsulay gikan sa akong mga ginikanan. Ang inyong artikulo nakatabang kanako sa pag-apresyar sa pagpaluyo sa akong Kristohanong mga igsoong lalaki ug babaye ug sa ilang pagtabang kanako nga maampingan ang akong espirituwalidad.
D. H., Tinipong Bansa