Ang Dapit Diin Manglupad ang mga Baka

ANG mapintas nga hangin sa mga Isla sa Shetland nakaabot sa pagtagad sa kalibotan sa Enero 5, 1993. Gipadpad niini ang Braer, usa ka 243-metros nga gitas-on, 45,000 ka toneladang dakong barko sa aseite, ug gilambalamba kini diha sa batoong baybayon sa amihanang Scotland. Sulod sa usa ka semana nabungkag sa hangin ug sa mga balod ang dakong barko sa upat ka bahin.

Ang naghadyong nga unos dili na bag-o alang sa mga taga-Shetland. Ang hilit nga grupo sa mga 100 ka isla, nga walay 20 ang nagpuyo niini, mao ang unang makasugat sa bugnaw kusog nga hangin nga lahoslahos nga mihapak latas sa dagat duol sa Iceland.

Dili ikahibulong, ang mga molupyo naanad na sa katingad-anang mga talan-awon. Usa ka tawo, gikutlo diha sa The Wall Street Journal, miingon: “Tingali mas maayong butangag mga karatula ang dalan sa Shetland: Pagbantay sa nanglupad nga mga baka.” Usa sa mga baka sa iyang kaila napalid sa paghuyop sa hangin gikan sa gipastohan niini sa miaging pipila ka tuig. Ang laing molupyo, usa ka siyentipiko, mitaho nga nakakita sa iyang binuhing iring nga “gipalupad” sa gihabogong 5 metros sa hangin​—siyempre, mitugpa kanunay sa iyang mga tiil. Sagad kargahan sa mga drayber ang ilang mga sakyanan ug mabug-at nga mga butang, sama sa karbon, aron dili sila ipalid sa mga dalan. Ang mga tawo gilupad usab gikan sa yuta, ang uban namatay pa gani. Usa ka unos, nga nakapatay sa usa ka babaye, nakaabot sa dili-opisyal nga gikusgong 323 kilometros por ora​—dili-opisyal tungod kay ang opisyal nga barometro gipalid man sa mao ra gihapong unos!