Ang Talagsaong Pasaheroang Tram sa Utah
ANG “Labing Habog nga Pasaheroang Tram sa Kalibotan.” Kana maoy panganunsiyo sa Skytram sa Busay nga Bridal Veil sa Provo Canyon, Utah, T.B.A. Ako nangutana, ‘Tinuod kaha kana?’ Nahinumdoman kong nakasakay ug habog nga tram sa Catalonia, Espanya, mga 15 ka tuig kanhi aron pagduaw sa kabukiran sa Montserrat, ug kanang maong tram daw maoy labing habog sa akong banabana. Busa nganong moingon sila nga ang labing habog ania sa Busay nga Bridal Veil? Tungod kay kini may gihabogong 374 metros sa gitas-on sa kable nga 534 metros—may aberids nga anggulong kapin sa 45 grado. Sa dihang ang sakyanan mahiduol sa abutanan sa bukid, sa gihabogong 1,900 ka metros, ang anggulo moabot ug 62 grado!
Ang tanang impormasyon maoy teknikal. Ang pagsakay mismo, diha sa unom-ug-pasaherong sakyanan, maoy matahom samtang kami mitungas sa haywey ug miagi sa Busay nga Bridal Veil sa walang bahin. Kami mitungas sa aberids nga gikusgong walo ka kilometro matag oras. Ang mga bukid naglibot kanamo—ang Bukid Timpanogos nga may gihabogong mga 3,600 metros diha sa likod namo ug ang bukid nga among gitungas, ang Bukid Cascade, diha sa atubangan. Adunay duha ka busay, sa taas ug ubos nga moambak sa kapig 180 metros sa dili pa moagos sa Subang Provo. May bahin sa tubig nga gipaagi sa tubong konektado sa planta sa idroelektriko nga unom ka kilometros ang kalay-on.
Ang hinimo sa Switzerland nga tramwey gibuksan niadtong 1962 ug nakadalag kapin sa 1.5 ka milyong tawo nga walay bisan usang seryosong aksidente. Kon mahadlok ka sa pagsakay sa usa ka habog nga tramwey, usa ka brosyur nag-ingon: “Ang mga tramwey nga sama niining Skytram, sa kasaysayan ug sa estadistika, mao ang labing luwas nga paagi sa pagbiyahe tali sa duha ka dapit.” Sa sunod panahon nga mosakay ka ug habog nga tramwey, susiha kana—kana ba mas habog kay niining ania sa Utah?
[Picture Credit Line sa panid 31]
Kortesiya sa Mountainland Travel Region