Pagtungas sa Kabukiran sa Paaging Sayon
ANG among sakyanan nahisama gayod sa gamitoy nga lawalawang nagkamang ubay sa usa ka buok sidang lugas sa tanod. Sa pagkamatuod, gitungas namo ang usa ka bukid sa paaging sayon—nga nagsakay sa usa sa mga labing tag-as nga trambiya sa kahanginan sa kalibotan.
Ang 4.3-kilometros nga trambiya motungas sa Taluktok sa Sandia, nga nagbuntaog sa kahalangdon ibabaw sa desyertong siyudad sa Albuquerque, New Mexico, U.S.A. Sa sukaranan sa trambiya, sa gihabogong 1,980 metros, kami misakay sa usa ka lig-ong cabin o kamarote nga makasulod abot ug 60 ka tawo. Samtang ang kamarote misulbong paingon sa taas, kami maorag nanguyos tungod sa anindot kaayong paluyo nga mao ang gansanggansang granitong mga bakilid. Sa pila ka dapit kami nagbitay 460 metros ibabaw sa lugot sa ubos.
Walay 20 minutos sa ulahi nakaabot kami sa bantawan, 3,163 metros ibabaw sa patag sa dagat, ug ang talan-awon makapalipong. Ang luag kaayong luna sa 28,500 kilometro kuwadrado nabukhad atubangan sa among mga mata. Ang taas bang gihabogon maoy nagpakubakuba sa among dughan o ang makapaukyab nga talan-awon? Lisod ang pag-ila.
Ang pagtukod sa Sandia Peak Tramway, among nasayran sa ulahi, maoy usa ka talagsaong buhat sa inhenyeria. Ang kabukiran halos imposible nga matabok diha sa daghang bahin. Busa gipalabi sa mga magtutukod ang paggamit ug mga helikopter ingong mga kargahanang kabayo. Ilang gidala pinaagig helikopter ang tanang butang gikan sa asirong mga sagbayan ngadto sa semento. Duha ka torre gitukod alang sa mga kable, ang usa 71 metros sa gihabogon ug ang lain 24 metros. Ang pagtukod ug lig-ong mga patukoranan alang sa maong mga torre ug dayon pagpatanos kanila sa tukma nanginahanglan ug dako kaayong katukma. Ang makutihong mga sistema sa pagbrek giinstalar aron maseguro ang kaluwasan. Ang proyekto, nga mikabat ug 24 bulan, nahuman sa tingpamulak sa 1966.
Sa dihang natapos na ang among biyahe, gihangad na usab namo ang nagbuntaog nga taluktok nga bag-o pa namong gitungas ug gidulhogan. Kahibulongan gayod ang maong kabukiran! Makapaukyab ug makapaubos kaayo ang pagpalandong sa ilang Maglalalang, ang Usa nga nagatimbang sa kabukiran diha sa iyang timbangan! (Isaias 40:12)—Tinampo.