Ang Bag-ong Katekismo Makapabali ba sa Dagan sa mga Panghitabo?
Sinulat sa koresponsal sa Pagmata! sa Italya
“USA ka Katekismo Alang sa Tuig 2000,” “Ang Talaan sa Bag-ong mga Sala,” “Bag-ong Dagway Alang sa Simbahan”—kini sila maoy pipila ka bag-ong ulohan sa Italyanhong mga mantalaan bahin sa bag-ong Catechism of the Catholic Church, nga nahipatik sa pagkakaron diha sa Pranses, Aleman, Italyano, ug Kinatsila. Sa Italya ang halin sa katekismo miabot ug 110,000 ka kopya sa walay tulo ka semana. Hinuon, sa usa ka Katolikong nasod nga may duolag 58 ka milyong katawhan, kanang gidaghanona dili kaayo taas. Usa ka Italyanong magsusulat miingon nga si bisan kinsa nga mopalit niana “nga mangita lamang ug talaan sa bag-ong mga sala” makasinatig “kahiubos.”
Sa Disyembre 7, 1992, si Papa Juan Paulo II sa opisyal nagduso sa 450-panid nga libro nga gitawag niyang “mubong suma sa Katolikong pagtuo ug kagawian.” Mikabat ug kapin sa unom ka tuig ang pagbalay ug pagbalay pag-usab, duyog sa hilabihang pagsaway gikan sa Katolikong kalibotan aron mapatungha kining libroha. Natural lamang, kana nagpatunhay sa misteryo sa Kakristiyanohan sa “Santisima Trinidad . . . , ang pangunang misteryo sa pagtuo.” Kini nag-ingon usab nga “ang matag espirituwal nga kalag gilalang nga laktud sa Diyos . . . , ug kini dili mamatay.” (Itandi ang 1 Corinto 15:28; Mateo 24:36; tan-awa usab ang Ezekiel 18:4, 20.) Apan nganong nahukman nga gikinahanglan ang usa ka bag-ong katekismo?
Usa ka Katolikong eskolar misulat: “Daghang katekismo nga gipatik sa mga sentro sa katekismo sa diosesis maoy dinalidali kaayo, punog mga sayop sa doktrina ug panghingapin.” Apan kini sila gigamit na sa katuigan aron sa pagdoktrina sa matinuohong mga Katoliko. Ang Katolikong basahong La Civiltà Cattolica miingon nga ang bag-ong basahon mohatag ug “dako nga tabang aron magarantiyahan ang panaghiusa sa pagtuo,” nga nauyog sa bag-o pang mga dekada. Ang papa mismo miingon: “Dili sayon nga makita kon unsang mga panghitabo ang ipatungha sa maong katekismo. Bisan pa niana, . . . kini mahimong usa ka bililhon, mabungahong galamiton alang sa mas lalom nga kahibalo ug tinuod nga espirituwal ug moral nga pagbag-o.”
Tinuod ba nga mahitabo kana? Kini bang katekismoha moayom sa pagkabahin sa mga Katoliko? Ang maong mga pagkabahin ilabinang nadayag sa paagi sa pagsanong sa mga Katoliko sa tibuok kalibotan bahin sa mga isyu sama sa aborsiyon, kontra-pagsamkon, teolohiya sa kagawasan, ug pag-apil sa giingong makataronganong mga gubat (bisan pag kana mosangpot nga ang mga Katoliko mopatay ug mga Katoliko). Sa mga tag-as ug ranggo, ang pagdumot ug pagkabahin nagsugod tali sa karon gamhanang Opus Dei, nga gipaluyohan sa papa ug daghang impluwensiyadong mga sakop sa herarkiya, ug sa mga Heswita, nga karon wala na sa pabor sa papa.
Ang mao bang katekismo magbag-o sa mga kasingkasing ug kagawian sa libolibong Italyanong mga lider sa politika ug negosyo nga karong bag-o nalangkit sa korapsiyon ug mga eskandalo? Unsa ba gayod ka lalom moapektar kining basahona sa kagawian sa hamiling magmamandong matang sa Italya? Kon kini mapakyas sa pag-usab sa mga batasan sa magmamandong matang, nganong maimpluwensiyahan man ang kasagarang Katoliko? Sanglit ang tomo adunay 450 ka panid—ug ang pagbasa dili mao ang labing popular nga buhat sa kadaghanang tawo—madahom ba ang malungtarong epekto diha sa kagawian?