Namalhin Sila sa Puerto Rico
NIADTONG Mayo 9, 1993, ang Departamento sa Kinatsila nga Paghubad, nga gilangkoban ug 20 ka membro, namalhin gikan sa hedkuwarter sa kalibotan sa mga Saksi ni Jehova sa Brooklyn, New York, ngadto sa bag-ong sangang buhatan sa Watch Tower Society sa Guaynabo, Puerto Rico. Ngano mang namalhin sila? Usa ka responsableng membro sa kawanihan sa panulat sa hedkuwarter sa mga Saksi ni Jehova misaysay: “Nadiskobrehan namong mas maayo ang trabaho sa mga maghuhubad kon magpuyo sila sa dapit nga gigamit sa matag adlaw ang pinulongan nga niana sila nagahubad. Dugang pa, natural lamang nga buot silang makasagnunot sa bag-ong mga kausaban nianang pinulongana. Ang Puerto Rico napili ingong kombenyenteng sentro alang sa tibuok nagasultig-Kinatsila nga kalibotan.”
Ang Departamento sa Kinatsila nga Paghubad nahimutang sa Brooklyn, New York, sukad sa 1928 ug nakadulag dakong bahin sa pagsabwag sa mensahe sa Gingharian pinaagi sa pagtabang sa pagtagana ug literatura sa Bibliya alang sa mga 350,000,000 ka nagsultig-Kinatsila nga katawhan sa tibuok kalibotan. Ang The Watchtower unang nahubad ngadto sa Kinatsila niadtong 1917. Karong adlawa, duolag 3,500,000 ka kopya sa The Watchtower ug duolag 3,000,000 ka kopya sa Awake! ang gipatik sa Kinatsila kada bulan. Sa di pa dugayng katuigan ang sanga sa Watch Tower Society sa Espanya nakahatag usab ug bililhong tabang niining buluhatona, ilabina sa paghubad sa magasing Awake! Adunay kapig 1,100,000 nagsultig-Kinatsilang mga Saksi ni Jehova sa kalibotan, duolag 25 porsiento sa bug-os nga gidaghanon sa mga Saksi sa tibuok kalibotan. Kining numeroha naglakip sa tinagpulo ka libong imigrante nga nag-alagad diha sa dili-Kinatsilag-pinulongang mga nasod, sama sa Australia, Alemanya, Sweden, ug Tinipong Bansa.
Ang pagbalhin ngadto sa labi pang dagko ug bag-ong mga pasilidad sa Puerto Rico adunay laing benepisyo. Kini motugot nga ang mga maghuhubad ug mga proofreader gikan sa lainlaing nasod, sama sa Colombia, Espanya, Mexico, Puerto Rico, ug Venezuela, magkausa sa usa ka sentrong dapit aron sa dugang mapausbaw ang internasyonal nga kinaiyahan sa mga basahong Kinatsila sa Sosyedad. Kini mobulig sa tin-aw ug tukma nga pagpasa sa mensahe sa Gingharian ngadto sa nagsultig-Kinatsila nga katawhan sa tibuok kalibotan. Gipanan-aw namong panalanginan ni Jehova kining bag-ong kaugmaran.