Mga Saksi ni Jehova sa Tibuok Kalibotan—Puerto Rico
SA TUNGATUNGA sa Caribbean Sea ug sa Atlantic Ocean nahimutang ang labong, tropikanhong isla sa Puerto Rico. Si Christopher Columbus miangkon niini alang sa Espanya niadtong 1493 ug ginganlan kini ug San Juan Bawtista sa paghinumdom kang Juan Bawtista. Ang kinadak-ang siyudad niini dugay nang gitawag nga Puerto Rico, o “Datong Dunggoanan.” Sa ulahi, kining ngalana gipadapat sa tibuok isla, samtang ang siyudad gitawag nga San Juan.
Ang Puerto Rico napamatud-ang usa ka datong dunggoanan sa daghang bahin. Daghang bulawan ang gikarga gikan dinhi sa unang mga tuig sa pagmando sa Espanya. Ang isla karon nagaeksportar ug tubo, kape, mga saging, ug mga bungang sitros, bisag ang mga industriya sa panggama ug sa pagpanul-id nagalangkob ug dakong bahin sa ekonomiya karon. Ugaling, ang Puerto Rico napamatud-ang usa ka datong dunggoanan sa mas hinungdanong diwa.
Gisugdan dinhi ang pagsangyaw sa maayong balita mahitungod sa Gingharian sa Diyos sa katuigang 1930. Karon, adunay kapin sa 25,000 ka magmamantala sa maayong balita sa Puerto Rico. Sa 1993 ang mga kawani niining sangaha sa Watch Tower Society miuswag gikan sa 23 ngadto sa kapin sa 100. Kini nga pag-uswag kinahanglanon aron ang sanga makadumala sa paghubad sa literatura sa Bibliya ngadto sa Kinatsila, nga naghimo sa maong mga publikasyon nga mabatonan sa kapin sa 350,000,000 nga nagasultig-Kinatsila nga mga tawo sa tibuok yuta.
Usa ka Bag-ong Nataran
Ang sangang buhatan nagtaho usab: “Ang usa ka bag-ong nataran gibuksan sa Puerto Rico tungod kay kami naningkamot sa pagdala sa mensahe sa Gingharian ngadto sa mga bungol. Usa ka igsoong babaye nag-asoy sa mosunod nga kasinatian: ‘Ako nagsangyaw taliwala sa mga bungol ug miduaw sa usa ka babaye nga may duha ka gagmayng anak. Sa dihang naamgohan niya nga ako usa ka Saksi, gisalikway niya ako dihadiha tungod kay ang iyang bana, nga bungol usab, supak sa mga Saksi ni Jehova.
“‘Daghang bulan sa ulahi ang samang babaye miduaw sa usa ka higala nga nagatuon sa Bibliya uban sa mga Saksi. Miduyog siya sa pagtuon ug nalipay pag-ayo niana. Giduaw ko pag-usab ang babaye, ug iyang gisubli nga supak ang iyang bana sa mga Saksi. Bisan pa niana, gusto niyang masabtan ang Bibliya ug gikapoy na sa iyang iglesya tungod kay sila walay gitudlo bahin niana. Gisugdan namo ang pagtuon, nga ginamit ang tract. Usa ka adlaw gisultihan niya ako nga mobalik sa Sabado tungod kay anaa ang iyang bana. “Apan supak siya kanamo, dili ba?” ako nangutana. Siya mitubag: “Buot niyang susihon kon unsa gayod ang ginatudlo sa mga Saksi ni Jehova.”
“‘Sa pagkasunod adlaw silang duha nanuktok diha sa akong pultahan! Sanglit ang bana may daghang pangutana, gidapit ko sila sa among mga panagkatigom alang sa mga bungol. Nauna pa siya kanako didto ug sukad niadto wala nay gisipyatan nga panagkatigom. Siya nagasangyaw ngadto sa ubang mga bungol, mitambong ug asembliya, ug naghinamhinam nga nagpaabot sa bawtismo.’”
Ang taho sa sanga nagpadayon: “Sa among distritong kombensiyon niining tuiga, ang tibuok programa gitanyag pinaagig sinyas, busa daghang bungol nga mga tawo ang mitambong uban sa ilang mga banay. Usa ka emosyonal kaayong yugto ang nahitabo sa paniklop nga pakigpulong sa dihang ang mamumulong naghisgot sa buluhatong ginabuhat taliwala sa mga bungol ug miingon nga mga 70 ang mitambong. Dihay dakong palakpak, apan, sama sa giingon sa mamumulong, ang mga bungol dili makadungog niini. Busa sa paghangyo sa mga bungol nga motan-aw sa tumatambong, gisubli sa mamumulong ang pangutana, ‘Malipayon ba kamo nga uban kaninyo dinhi ang bungol nga mga igsoon?’ ug gihangyo ang tumatambong sa pagpalakpak pinaagig pagwarawara sa duha ka kamot. Usa kadto ka talagsaong talan-awon nga makita ang 11,000 ka mga igsoong lalaki ug babaye nga mipalakpak pinaagig pagwarawara sa ilang mga kamot. Ang atong bungol nga mga igsoong lalaki ug babaye nalipay pag-ayo ug mibati nga sila bahin sa dakong panag-igsoonay. Daghan ang nanghilak tungod sa kalipay.”
Samtang nakigbahin ang mga Saksi ni Jehova sa buluhatong pagpangani sa Puerto Rico, walay duhaduha kini magpadayon nga mahimong datong dunggoanan. Ang “mga karnero” sa Diyos, kinsa ginatawag niyang “ang tilinguhaong mga butang sa tanang kanasoran,” magpadayon sa pagpangabot aron ang balay ni Jehova mapuno sa himaya.—Juan 10:16; Haggeo 2:7.
[Kahon sa panid 9]
LARAWAN SA NASOD
1994 Tuig sa Pag-alagad
KINATAS-ANG GIDAGHANONG NAGSANGYAW: 25,428
PROPORSIYON: 1 ka Saksi sa 139
TUMATAMBONG SA MEMORYAL: 60,252
ABERIDS NGA PAYUNIR NGA MGA MAGMAMANTALA: 2,329
ABERIDS NGA MGA PAGTUON SA BIBLIYA: 19,012
GIDAGHANON SA NABAWTISMOHAN: 919
GIDAGHANON SA MGA KONGREGASYON: 312
SANGANG BUHATAN: GUAYNABO