Gikan sa Among mga Magbabasa
Aprikanhong mga Dulaan Pagkanindot sa artikulong “Libreng Aprikanhong mga Dulaan”! (Marso 22, 1993) Ingong usa ka magtutudlo sa arte, ako nasayod unsa ka hinungdanon nga ipasiugda ang kamamugnaon diha sa mga bata niining panahon sa telebisyon ug sa mga dulang kompiyuter. Sa dihang ang mga ginikanan mogugol ug panahon nga magbuhat sa mga butang kauban sa ilang mga anak, mamugna usab nila ang malungtarong mga handumanan!
D. B., Alemanya
Ako siyete anyos. Naangayan ko ang artikulo, ug ako naghunahuna nga talagsaon nga [ang Aprikanong kabataan] makagama sa ilang kaugalingong mga dulaan! Maora ug makalingaw, ug buot kong sulayan kana.
M. S., Tinipong Bansa
Panglugos Ang inyong serye sa mga artikulo bahin sa “Panglugos—Makalilisang nga Kaagi sa Usa ka Babaye” maayo kaayo. (Marso 8, 1993) Ako 14 anyos, ug nakadungog ako bahin sa mga batan-ong babaye nga bata pa kay kanako nga gilugos. Apan sa pagkabasa ko na lang sa inyong artikulo nga mitubod ang mga luha sa akong mga mata, ug naamgohan ko nga mas seryoso kini kay sa akong gihunahuna. Salamat kaayo.
S. B., Tinipong Bansa
Panahon sa una kong tuig sa hayskul, ako gilugos sa usa ka “higala sa pamilya.” Sulod sa miaging pila ka tuig, ako naghunahuna nga nakahimo ako sa pakighilawas. Karon akong masabtan nga si Jehova nahibalo nga kadto dili akong sala! Nagbasol lang ako nga wala dayon ako magpatabang.
A. S., Tinipong Bansa
Daghang programa ang naghisgot bahin sa pagkaayo gikan sa panglugos, apan wala kana magtug-an kon unsaon paglikay niana. Seguradong mas hinungdanon ang pagsanta kay sa pagtambal! Niining bahina ang artikulo nakatabang pag-ayo kanako, ug tinong motabang kini sa kababayen-an sa bisan diin nga lagmit mahimong mga biktima.
J. A. M., Brazil
Giatake ako sa usa ka manlulugos-unta sa gawas sa akong balay. Nakigbisog ako nga walay kasama kay sukad masukad ug gisinggit ang ngalan ni Jehova nga kusog kaayo sa daghang beses nga ang mga iro namaghot. Ang nag-atake kanako sa kataposan gipul-an sa akong pagsinggit ug mikalagiw. Gisugyot ko nga ang tanan mosunod sa inyong mga sugyot. Depende sa mga sirkumstansiyang nalangkit, ang atong mga lihok mahimong mohatag ug dakong kalainan.
S. P., Tinipong Bansa
Halos 20 ka tuig kanhi, ako gilugos sa usa ka kaila. Wala ko gayod kadto itaho kay naulaw ako. Wala ko gani kana hisgoti hangtod sa tulo ka tuig nga miagi diha sa terapiya. Niadto lamang nga gibutyag nako kadto sa akong bana. Karon siya nakasabot sa akong pag-ayad sa seksuwal nga relasyon. Sa dihang nahuman nako pagbasa ang inyong mga artikulo, ako mihilak sa kalipay—dili sa kasakit—sa unang panahon sa 20 ka tuig, ug nagpasalamat kang Jehova.
T. P., Tinipong Bansa
Pagsusi sa Wanang Akong nahuman pagbasa ang ekselenteng mga artikulo mahitungod sa pagsusi sa wanang sa isyu sa Pagmata! sa Septiyembre 8, 1992. Bisan pag diyutay ra kaayo ang akong nasayran bahin niining ulohana, ang tin-awng katin-awan nga inyong gihatag nakapahingangha kanako. Nagtuo ako nga kining mga artikuloha mobulig kanato sa pagpabili sa dugang sa katuyoan ni Jehova alang sa masinugtanong tawhanong pamilya.
W. D. F., Costa Rica
Kami nagsulat sa pagpasalamat kaninyo sa inyong paningkamot sa paghugpong sa mga artikulo mahitungod sa pagsusi sa wanang. Human sa pagbasa sa kataposang artikulo, kami malipayong nagpasalamat kang Jehova, ang mahibaloon-sa-tanan nga Diyos, kinsa nag-organisar sa uniberso sa kahibulongan kaayong paagi. Kami maikagong nagpaabot sa bag-ong sistema, sa diha nga ihatag niya sa masinugtanong mga tawo nga may hingpit nga utok ang kahigayonan sa pagsabot nga mas maayo sa uniberso.
I. N. O. ug J. N. O., Nigeria