Gikan sa Among mga Magbabasa

Internasyonal nga mga Kombensiyon Buot ko kamong pasalamatan tungod sa seryeng “Unsay Magpausa sa Kalibotan?” (Disyembre 22, 1993) Nalingaw gayod ako sa bahin mahitungod sa internasyonal nga mga kombensiyon sa mga Saksi ni Jehova sa Silangang Uropa. Makapadasig ang pagkadungog nga pipila ka Kristohanon sa gihasi-sa-gubat nga mga dapit makatambong niana.

E. R., Tinipong Bansa

Ang akong bana ug ako pulos bug-os-panahong mga ministro; busa, gianugonan kaayo kami, nga ang among badyet wala magtugot kanamo nga mahimong delegado sa usa ka internasyonal nga kombensiyon. Bisan pa, sa dihang nagbasa sa inyong mga artikulo, daw atua ako sa kombensiyon. Mahanduraw ko gani ang akong kaugalingon nga kinasingkasing nga miduyog pag-awit sa Kristohanong mga igsoong babaye nga gipakita sa panid 9. Ang artikulo nakadasig kanako sa paglahutay.

I. F., Pransiya

Komunikasyon Human mabasa ang seryeng “Komunikasyon Diha sa Kaminyoon” (Enero 22, 1994), naamgohan nako nga sulod sa 28 ka tuig sa akong kaminyoon, wala nako mahatag sa akong asawa ang gugma nga iyang gikinahanglan. Sa matag higayon nga mohangyo siyag bisan unsa nianang bahina, ako kanang isalikway ingong emosyonal nga pagkadili-hamtong. Kining mga artikuloha nakatabang kanako sa pagsabot kon sa unsang paagi gilalang sa Diyos ang mga babaye. Sa umaabot, paningkamotan nakong ihatag sa akong asawa ang gugma nga iyang gikinahanglan. Salamat niining tukmang kahibalo.

Y. K., Hapon

Dili ko ikasulti kaninyo kon unsa kadako ang akong kahimuot sa serye. Natandog ako sa tukmang pagsusi sa emosyonal ug sikolohikal nga kalainan tali sa mga lalaki ug babaye. Nasusi nako ang akong kaugalingon ug nasabtan ug labi pa ang akong kaugalingon. Dili ako minyo, apan ako nagtuo nga kining mga artikuloha makatabang kanako nga mas mosabot sa panglantaw sa ubang mga tawo.

D. R., Italya

Matud ninyo ang independensiya maoy usa ka butang nga bililhon sa mga lalaki. Apan may nailhan akong pipila ka babaye nga nagpabili usab sa independensiya. Nakapahasol kanako nga inyong gipakita nga ang mga panghunahuna, mga pagbati, ug mga tinguha sa mga lalaki lahi kaayo nianang sa mga babaye.

U. B., Alemanya

Ang artikulo miangkon nga “imposibleng markahan ang bisan unsang kinaiya nga iya lang sa lalaki o iya lamang sa babaye” ug nga “ang dili-masabtan nga ‘kasagarang lalaki’ o ‘kasagarang babaye’ tingali naglungtad lamang diha sa mga panid sa mga libro sa sikolohiya.” Ang mga kinaiya nga ila sa magtiayong “Jerry” ug “Pam” nag-ilustrar lamang kon sa unsang paagi ang indibiduwal nga mga bana ug mga asawa magkalahi sa mga paagi sa komunikasyon.​—ED.

Aprikanhong mga Dulaan Ang artikulong “Libreng Aprikanhong mga Dulaan” (Marso 22, 1993) maoy sama sa usa ka kahibulongang handumanan sa akong pagkabata. Sa among Aprikanhong mga lungsod ug mga balangay, ang mga dulaan dili mabatonan sa tanang bata. Busa migugol kamig panahon sa paghimo sa among kaugalingong mga dulaan aron mahisama sa mas adunahang puti nga mga bata. Hinuon, wala nila pabilhi ang among hinimo-sa-balayng mga dulaan. Bisan unsa pa, nalipay kaayo ako sa artikulo.

A. A., Cameroon

Pagsulbad sa mga Suliran Ako nagsulat aron sa pagpahayag sa akong pasalamat sa daghang maayong mga artikulo sa “Mga Batan-on Nangutana . . .” nga inyong gitagana kanamo. Ang serye mao ang una nakong basahon sa dihang madawat nako ang kinaulahiang isyu sa Pagmata! Ilabina nakong gipabilhan ang artikulong “Kinsay Makatabang Kanako sa Pagsulbad sa Akong mga Suliran?” (Disyembre 8, 1993) Ako kuwarto-anyo sa hayskul, ug nalisdan kaayo ako sa paghimog mga desisyon nga nag-apektar sa akong umaabot. Ang akong mga ginikanan ug ako kanunayng adunay bukas nga linya sa komunikasyon, apan usahay gibati nakong wala sila makasabot. Kining artikuloha nakatabang kanako sa pagsabot kon unsa ka hinungdanon ang pagpangayo sa ilang tambag ug sa pagsulti kanila bahin sa akong mga pagbati ug mga kabalaka.

H. L., Tinipong Bansa