Gikan sa Among mga Magbabasa

Komunikasyon Nadawat nako karon ang Enero 22, 1994, isyu nga naundan sa seryeng “Komunikasyon Diha sa Kaminyoon.” Tingali mao kini ang kinamaayohang serye sa mga artikulo nga nabasa nako sukad masukad. Ang akong bana ug ako naminyo sulod na sa usa ka tuig ug tunga. Maayo kaayo ang among relasyon ug malipayon kaayo, bisan tuod usahay mahitabo ang dili-pagsinabtanay. Ang Pagmata! nagtagana ug pipila ka maayong mga obserbasyon kon nganong kini mahitabo. Samtang mosugod ako pagbasa sa mga artikulo sa ikatulong higayon, tugoti akong mosulting salamat kang Jehova ug kaninyo tungod sa pagpatik nianang tukma-sa-panahong impormasyon.

C. M., Tinipong Bansa

Maayo ang kahimtang sa akong bana ingong usa ka Kristohanong ansiano ug bug-os panahong magwawali. Bisan pa niana, aduna kamiy kal-ang sa komunikasyon sukad sa among pagkaminyo ug nakasinatig salikwaot nga mga kahimtang. Kining mga artikuloha prangkang nagpakita kanamo sa mga hinungdan sa suliran. Kami nakaseguro nga matabangan kami niini sa pagpauswag sa among relasyon.

C. A., Hapon

Sa pagbasa sa mga reaksiyon ni “Pam,” ako nakaamgo nga maayo kaayong pagkabatbat niana ang akong mga pagbati. Ang susama ikaingon bahin sa akong bana ug kang “Jerry.” Kining artikuloha nakatabang sa pagdumala sa hinungdan, inay sa mga epekto lamang. Nadani usab ako sa makaiikag nga paagi diin gipresentar sa mga artikulo kining hinungdanong ulohan.

E. F., Italya

Bisan tuod ako 17 anyos pa lamang karon ug dili pa gustong magminyo sulod sa daghang katuigan, gipabilhan gihapon nako pag-ayo kining lalom nga pagsusi kon nganong ang mga tawo molihok ingon sa ilang gibuhat. Nagaplano ako sa pagtipig niining artikuloha aron basahon matag karon ug unya latas sa mosunod nga pipila ka tuig. Ilabinang kinahanglanon nako kini sa dihang ako andam nang magminyo!

N. B., Tinipong Bansa

Ang akong amahan sama gayod kang “Jerry.” Apan karon ako nakasabot nga sa dihang maghilom siya ug dili makigsulti kanako, kana iyang katungod. Bisan tuod ang artikulo nagalamdag, nabalaka akong gamiton niya ang artikulo sa pagpalig-on nga maayo ra ang iyang gibuhat.

A. B., Tinipong Bansa

Ang mga artikulo naningkamot sa pagtabang sa mga magbabasa sa pagsabot kon nganong ang mga babaye mokiling sa pagbati o paglihok sa pipila ka paagi. Bisan pa niana, wala namo ipasabot nga bisan kinsa sa mga lalaki o sa mga babaye sa usa ka paagi o sa lain adunay katungod nga dili makigsulti o magagawi nga dili angay. Ang Kasulatan nag-awhag sa mga amahan nga likayan ang ‘pagpalagot sa ilang mga anak.’ (Colosas 3:21) Kini dili maglakip sa pagpatuyang diha sa dili-makataronganong tagdugay nga kahilom sa dihang ang mga anak gusto ug nagkinahanglan ug ginikananong paggiya.​—ED.

Ako segurado nga ang mga sulat nagaabot nga may positibong mga komento bahin niining mga artikuloha. Palihog idugang ang akong mga komento. Sa artikulo bahin kang “Jerry” ug “Pam,” mahimo ninyong ipuli ang mga ngalan nako ug sa akong asawa. Gusto gayod unta nakong masabtan ang mga pagbati sa akong asawa! Sama gayod ako kang “Jerry,” nga naningkamot sa pagtagana sa iyang mga panginahanglan apan nagbuhat niana sa paagi nga buot nakong matagan-an ang akong kaugalingong mga panginahanglan. Karon ang akong asawa sulod sa 20 ka tuig nakigbulag kanako. Basin matandog ang kasingkasing sa akong asawa niining mga artikuloha, ug mahimong sulayan namo pagtukod pag-usab ang among kaminyoon.

J. K., Tinipong Bansa

Eksamen sa Bibliya Nalingaw kaayo ako sa panid nga “Nahibulong Ka ba Sukad?” sa Enero 8, 1994, nga isyu. Naghimo akog mga kopya nianang panira ug gipadala kana sa akong mga higala, mga membro sa pamilya, ug ubang interesadong mga tawo. Ako silang gidasig sa pagsusi sa matag Kasulatan ug paglista sa bisan unsang mga pangutana nila. Maayo kaayo kining paagiha sa pagpakighisgot sa Bibliya uban kanila. Palihog pagpatik ug dugang pang susamang artikulo!

M. S., Tinipong Bansa