Gikan sa Among mga Magbabasa

Diborsiyo Samtang gibasa ko “Ang Hunahuna sa Bibliya . . . Unsang Matanga sa Pagdiborsiyo ang Gidumtan sa Diyos?” (Pebrero 8, 1994), ako natandog gayod. Kay nakigdiborsiyo sa dili pa dugay human sa 20 ka tuig nga kaminyoon sa usa ka dili-maunongon nga kapikas, akong nahibaloan nga wala dumti ni Jehova ang akong desisyon sa pagpakigdiborsiyo ug ako dili angayng mobati nga sad-an. Tinuod, ang mga pagbati sa kaguol, kamingaw, ug pagkasad-an “kalit nga motungha.” Apan ang panahon ug pagsalig kang Jehova maoy mga butang nga nagapaalim.

B. M., Tinipong Bansa

Sulod sa akong kaminyoon ang akong bana supak kaayo sa akong pagkahimong usa sa mga Saksi ni Jehova. Sa kataposan siya miipon sa iyang trato ug miaplay ug diborsiyo. Gibati ko gayod nga ang Diyos ‘nagtawag kanako ngadto sa kalinaw.’ (1 Corinto 7:15) Ang panagbulag nakapaguol kaayo sa akong mga anak, ug sa makadaghan sa paglabay sa katuigan, nabasa ko ang Malaquias 2:16 ug nahibulong kon nahimo ba nako ang hustong butang. Ang inyong artikulo nakatabang kanako nga makabaton ug timbang nga hunahuna niini nga kasulatan.

J. C., Tinipong Bansa

Pagbalhin Akong ikasulti kaninyo nga dako gayod ang akong pasalamat nga nakadawat sa inyong mga artikulo nga “Mga Batan-on Nangutana . . .” bahin sa pagbalhin. (Pebrero 22, 1994, ug Marso 8, 1994) Ako 16 anyos ug mobalhinay sa halayo gikan sa tanan nakong suod nga mga higala. Ako naghilak kada gabii, nga nanghinaot nga dunay pila ka paagi nga makapabilin ako. Unya gibasa ko ang inyong mga artikulo. Midesider ako sa dugang pagtan-aw sa positibong bahin sa pagbalhin. Bisag naguol gihapon ako nga mobalhin, ang akong tinamdan nausab ug dako.

A. D., Tinipong Bansa

Ang mga artikulo mao gayod ang akong gikinahanglan. Ang labing maayong tambag nga gihatag mao ang paglakaw nga mahusay sa samang naandan nga paagi kon bahin sa espirituwal nga mga butang. Angay kong mahibaloan nga bisan asa ako mobalhin, si Jehova anaa kanunay. Busa nganong dili ilhon siya nga mas suod pa pinaagi sa lalom personal nga pagtuon? Ang pagbuhat niana maoy usa ka dakong bahin sa pagpuyo diha sa akong bag-ong pinuy-anan.

T. T., Tinipong Bansa

Iliterasiya Ako kanunayng gusto nga mosulat ug magpasalamat kaninyo human mabasa ang pila ka makaiikag nga artikulo. Apan ang seryal nga “Pagbugto sa Talikala sa Iliterasiya” (Pebrero 22, 1994) sa kataposan nagpakombinsir kanako sa pagsulat. Sa sunod semana sugdan ko ang pagtuon sa Bibliya uban sa usa ka babaye nga dili makamaong mobasa ug mosulat. Wala ko mahibalo kon unsay akong himoon, apan karon ako nahibalo na, salamat niining mga artikuloha. Kini miabot sa hustong panahon!

M. A. C., Italya

Mga Siyudad Ako 17 anyos ug migugol sa unang 14 anyos sa akong kinabuhi sa Siyudad sa New York. Busa ako nalingaw kaayo sa inyong mga artikulo mahitungod sa dagkong mga siyudad. (Enero 8, 1994) Nagustohan ko ang makahagit nga mga pangutana sulod niana.

S. H., Tinipong Bansa

Balanghoy Ang artikulong “Mangaon Tag Balanghoy!” (Nobyembre 8, 1993) makaiikag kaayo. Ingong usa nga taga-Nigeria, ako usa sa milyonmilyong Aprikano nga lamian kaayog balanghoy, ilabina ang foofoo ug gari. Ngani, ako makapasalamat sa atong Maglalalang sa paghimo sa balanghoy nga mabatonan namo. Kon wala kini, milyonmilyong Aprikano ang mangamatay.

O. N. Y. I., Nigeria

Maisogong Misyonaryo Ako natandog pag-ayo sa kasinatian ni Annama Abraham diha sa iyang sugilanong “Pagbuntog sa mga Hagit sa Kinabuhi sa Habagatang Asia.” (Enero 22, 1994) Namatyan siya sa iyang hinigugmang bana apan maunongong nagpadayon sa pag-alagad kang Jehova. Buot kong sultihan siya nga ang iyang sugilanon sa kinabuhi nakadasig gayod kanako.

I. I. C. S., Brazil