Gikan sa Among mga Magbabasa

Matinumanong mga Batan-on Natandog ako sa seryeng “Mga Batan-ong Nag-una sa Diyos.” (Mayo 22, 1994) Sa dihang ako tin-edyer pa, may tumor ako sa utok. Ingong usa sa mga Saksi ni Jehova, akong giingnan ang mga doktor: “Dili ko gustong magpaabuno ug dugo.” Bisan tuod nakuha ang mando sa korte aron ipugos ang dugo kanako, ang operasyon milampos nga wala kana. Samtang nagabasa ako bahin niining matinumanon nga batan-ong mga alagad sa Diyos, nanglugmaw ang mga luha sa akong mga mata. Nasinati nila ang akong nasinatian! Ang ilang mga sugilanon nakatandog sa akong kasingkasing ug nagpalig-on sa akong gugma sa Diyos.

M. P., Tinipong Bansa

Ako 17 anyos ug nahadlok nga mahimutang ako sa maong kahimtang sa umaabot. Dili ako mahadlok nga mamatay, apan ang pagsalikway sa mga balaod ni Jehova maoy makapahadlok. Makalilisang nga magpadala ilalom sa pagpit-os. Ang artikulo nagpalig-on pag-ayo kanako.

C. K., Alemanya

Sa dihang nabasa nako ang mga artikulo, dili nako kapugngan ang mga luha. Human niana, gibasa nako pag-ayo ang pulyeto nga Sa Unsang Paagi ang Dugo Makaluwas sa Imong Kinabuhi? (gipatik sa Watchtower Society). Karon nasayod na ako kon sa unsang paagi magagawi kon mahimutang sa samang kahimtang.

Y. G., Alemanya

Sanglit nag-antos ako gumikan sa walay-pagkaayo nga matang sa leukemia, ang mga kasinatian sa mga batan-on nga nakapamatuod sa ilang pagkamahinalaron kang Jehova nakapadasig kaayo kanako ingong usa ka hamtong. Daghang salamat.

H. K., Austria

Ako 18 anyos. Nalingaw ako pag-ayo ug natandog sa dihang nabasa nako gahapon ang mga artikulo. Dili ako makahunong sa paghilak sa dihang akong nahibaloan nga namatay kining matinumanong mga bata. Ang ilang pagtuo nakapapangutana nako sa akong kaugalingon kon ako ba, ilalom sa maong mga kahimtang, makahupot sa akong integridad.

E. A. O., Nigeria

Natandog gayod ako sa dili matarog nga kalig-on sa tanang batan-on nga nahisgotan. Human mabasa ang mga artikulo, mihilak ako pag-ayo ug nagpasalamat kang Jehova nga gihatagan niya sila ug kusog sa pag-atubang sa maong mga kalisdanan hangtod sa ilang kamatayon. Sinsero akong makaingon nga ang akong mga suliran sa pagkatin-edyer dili hinungdanon kon itandi.

R. C., Italya

Walay duhaduha nga kining makapatandog kaayong mga artikulo magadasig sa tanang batan-on nga mobasa niini. Kining tanang batan-on hugot nga midumili sa dugo; sa samang panahon, sila nakadesisyon alang sa ilang kaugalingon ug nakasaysay sa ilang kaugalingon sa tin-awng paagi. Nadasig ako sa pagkahibalo nga bisan unsang mga pagpit-os ug pagsulay ang anaa, si Jehova dili mapakyas sa paghatag kanato ug kalig-on ug gikinahanglang tabang.

R. T., Hapon

Iliterasiya Giapresyar nako ang seryeng “Pagbugto sa Talikala sa Iliterasiya.” (Pebrero 22, 1994) Sa dihang mikalagiw ako gikan sa Tsina ngadto sa Habagatang Aprika niadtong 1950, dili ako makasulti sa mga pinulongan nga gisulti didto. Bisan pa niana, ang mga Saksi ni Jehova mapailobong nagtabang kanako sa pagsabot sa Bibliya diha sa Iningles. Mitambong usab ako sa ilang mga tigom, apil na sa Tunghaan sa Teokratikanhong Ministeryo. Ang akong Iningles inanay nga miuswag, ug karon ako masaligon na diha sa pultahan-ug-pultahan nga ministeryo.

W. W., Habagatang Aprika

Reinkarnasyon Bisan tuod ako usa ka Muslim, ako regular nga tigbasa sa Pagmata! Buot kong ipahayag ang akong sinserong mga pasalamat tungod sa inyong bag-ohay pang serye nga “Nabuhi Ka ba Kanhi? Mabuhi Ka ba Pag-usab?” (Hunyo 8, 1994) Nakaplagan nako kini nga puno sa impormasyon. Dugay na akong nangitag impormasyon nga magamit sa pagtul-id sa pipila nako ka mga higala nga miinsister nga naglungtad ang reinkarnasyon. Uban sa impormasyon nga gihatag, ako nagtuo nga sila seguradong mouyon nga sanglit adunay pagkabanhaw, dili mahimong adunay reinkarnasyon.

K. S., Nigeria