Gikan sa Among mga Magbabasa

Kanser sa Suso Daghan kaayong salamat sa pagpatik sa seryeng “Kanser sa Suso​—Gikahadlokan sa Tanang Babaye.” (Abril 8, 1994) Akong ginasusi ang akong kaugalingon matag karon ug unya ug naghunahuna lamang nga gahi ang akong mga glandula. Kay wala gayod makaseguro, wala akoy gihimo bahin niana. Apan, human mabasa ang artikulo, ako miadto sa ospital ug nasayran nga ako may kanser. Gihimo ang mga kahikayan aron ako maoperahan. Kinasingkasing ko kamong gipasalamatan.

T. Y., Hapon

Sukad sa akong operasyon, dili gayod ako makabasa ug bisan unsa bahin sa kanser. Busa sa dihang migula ang magasin, wala ako mahimuot niini. Apan kasagaran bug-os kong ginabasa ang tanang isyu sa Pagmata!, ug niadtong gabhiona mihukom ako nga mobasa ug diyutay ug mohunong kon ako mahadlok. Aw, dili ako makahunong sa pagbasa niini. Maayo kaayo kining pagkasulat, impormatibo kaayo, ug mabination kaayo.

G. K., Tinipong Bansa

Ang artikulo nakatabang kanako sa pagsabot kon sa unsang paagi nasabtan ni Jehova ang atong mga kahadlok sa pag-atubang sa nagahulga sa kinabuhi nga balatian. Gihunahuna nako kaniadto nga ang mga tawo nga mobatig ingon niini mga huyang o nakulangan sa pagtuo. Nakatabang gayod kini kanako sa pagsabot nga maluluy-on kaayo si Jehova.

K. G., Tinipong Bansa

Kon mosulti man ugaling ang magasin sa usa ka tawo, kanang isyuha misulti gayod kanako. Ang akong bana ug ako naglingkod sa sopa nga gihikyad libot kanamo ang among mga bayranan sa doktor sa operasyon sa akong kanser sa suso. Samtang nag-isyu kami ug mga tseke, ang kartero naghatod niining isyuha sa Pagmata! Gibasa nako ang artikulo niadto gayong adlawa, uban ang linaing kaikag. Nagpasalamat ako sa ngalan sa tanang babaye nga mapalig-on sa mga artikulo.

E. J., Tinipong Bansa

Mga Siyudad Ako 16 anyos ug nalipay sa pagbasa sa mga serye bahin sa mga siyudad. Sa klase sa geograpiya gihangyo kaming mohatag ug mubong pakigpulong bahin sa ulohan nga among gusto. Gibase nako ang akoa sa artikulong “Ang Siyudad nga Daghan ug Tawo.” (Enero 22, 1994) Human nako mabasa ug kusog ang akong pakigpulong sa klase, mipakpak ang tanan. Salamat sa pagtabang kanako sa pagpauswag sa akong pagsabot sa geograpiya.

T. R., Alemanya

Sa artikulong “Magtukod Kita Alang Kanato ug Usa ka Siyudad,” kamo miingon: “Niadtong 1900, ang London mao lamang ang siyudad sa tibuok kalibotan nga may populasyong usa ka milyon.” (Enero 8, 1994) Apan sa misunod nga isyu, kamo miingon: “Sa tungatunga sa katuigang 1800 kini [Edo, karon gitawag ug Tokyo] may populasyon nga mikapin na sa usa ka milyong katawhan.” Hain ang husto?

S. T., Hapon

Ang pahayag bahin sa London malagmit nga sayop. Gibase kini sa 1985 nga edisyon sa “Illustrated Atlas of the World” (Rand McNally and Company). Hinunoa, ang “The World Almanac and Book of Facts 1993” dayag nga husto sa pag-ingon nga daghang siyudad ang may molupyo nga kapin sa usa ka milyon niadtong 1900. Gikasubo namo nga nakahatag ug kalibog.​—ED.

Ang Paggukod sa Salapi Ingong batan-ong magbabasa sa Pagmata!, natandog kaayo ako sa seryeng “Ang Paggukod sa Salapi​—Asa Kini Mosangko?” (Marso 22, 1994) Sa hunahuna ko ang akong mga katalirongan aduna lamay usa ka tumong: ang pagpanapi. Apan, ang pagsunod sa kon unsay gitudlo ni Jehova labi pang dungganon kay sa pagsimba sa mga butang nga mahanaw.

K. R., Pransiya

Esports Salamat sa artikulong “Ang Diyos ba May Gidapigan Diha sa mga Esport?” (Pebrero 8, 1994) Nasayop ako sa pag-ampo nga modaog sa usa ka lumba sa dagan; nag-ampo usab ako sa kapildihan sa akong mga kaindig. Karon nasayod ako nga ang kabubut-on ni Jehova wala malangkit sa esports. Ako nagapahinungod sa akong kinabuhi kang Jehova, ug mibati akong mas komportable nga nasayod nga siya nagapamati gayod sa akong mga pag-ampo.

J. T., Tinipong Bansa