Gikan sa Among mga Magbabasa
Dobleng Kinabuhi Buot ko kamong pasalamatan tungod sa artikulong “Mga Batan-on Nangutana . . . Dobleng Kinabuhi—Kinsay Nahibalo?” (Enero 8, 1994) Sa nag-edad ako ug 16 anyos, misugod ako sa pag-inom, pagpanigarilyo, ug pagpakigdeyt nga wala mahibaloi sa akong mga ginikanan. Kining mga artikuloha nakatabang gayod kanako sa pagsabot nga walay natago gikan sa mabinantayong mga mata sa Diyos.
T. T., Fiji
Paggukod sa Salapi Nabasa nako ang seryeng “Ang Paggukod sa Salapi—Asa Kini Mosangko?” (Marso 22, 1994) Ang mga artikulo nagkobre pag-ayo sa ulohan. Wala ako masayod nga ang maong dili-maayong mga kahimtang naglungtad gihapon alang sa nagalalin nga mga trabahante ug sa ilang mga pamilya. Naluoy kaayo ako kanila.
G. M., Tinipong Bansa
Ang paagi sa pagbatbat ninyo sa dili-maayong mga kahimtang sa trabaho ug ubos nga mga suweldo maoy tukma. Usa kini ka makapasubo nga paghubit kon sa unsang paagi giisip sa pipila kining maong mga trabahante—dili ingong mga tawo nga may mga pagbati nga sama sa atoa. Oo, “ang tawo nagmando sa tawo sa iyang kadaotan”!—Ecclesiastes 8:9.
K. V., Tinipong Bansa
Kanser sa Suso Sa inyong seryeng “Kanser sa Suso—Gikahadlokan sa Tanang Babaye” (Abril 8, 1994), wala ninyo hisgoti ang mga pagtuon nga nagpakita nga ang pagpasuso makapamenos sa purohan nga makanser sa suso.
B. J. M., Alemanya
Gikasubo namo nga wala namo mahisgoti kini. Apan, ang punto gihisgotan sa artikulong “Ang Kaso Pabor sa Gatas sa Inahan,” nga migula sa among Septiyembre 22, 1993, nga isyu.—ED.
Migugol ako ug pila ka panahon uban sa usa ka Kristohanong igsoong babaye nga gikuhaan ug suso. Siya 62 anyos ug magul-anon kaayo. Nahinumdom ako nga wala akoy nahunahunaang isulti ingong pagpaluyo. Salamat sa mga komento nga inyong gikutlo sa mga artikulo, makahatag na ako kaniya karon sa pagpaluyo nga bililhon.
D. H., Tinipong Bansa
Mga duha ka tuig kanhi, ako gioperahan gumikan sa kanser sa suso. Aron makakaplag ug impormasyon bahin sa ulohan, mipalit ako ug usa ka medikal nga ensiklopedia, apan diyutay ra ang akong nakaplagan. Apan, ang inyong artikulo nagtubag sa akong mga pangutana. Naghupay gayod kini kanako.
M. G., Italya
Siyam ka tuig kanhi ang akong inahan namatay gumikan sa kanser sa suso. Niadtong panahona nuybe anyos pa lamang ako, ug wala gayod ako makasabot kon unsay iyang naagoman. Nalisdan ako sa pagpugong sa akong mga luha samtang nagbasa ako niadtong mga artikuloha ug naghunahuna kaniya. Dili gayod igo ang akong pagpasalamat kaninyo tungod sa kahibalo nga gihatag ninyo kanako bahin sa nahibiling pila ka tuig sa iyang kinabuhi.
K. F., Tinipong Bansa
Mga Biktima sa AIDS Nabasa nako ang inyong artikulong “Pagtabang Niadtong Adunay AIDS.” (Marso 22, 1994) Positibo ako sa HIV ug nakaplagan nako nga lisod kaayong dawaton ang artikulo. Ang akong pamilya mihilak tungod sa kasakit ug sa mga pagbati nga sinalikway.
B. J., Tinipong Bansa
May simpatiya kami sa tanan nga nag-antos sa among taliwala. Ang among artikulo naningkamot sa pagbalanse sa ilang mga panginahanglan uban sa intereses sa kadaghanan. Sanglit ang Kasugoan sa Diyos sa Israel naghimog lig-ong mga lagda sa pagpanalipod sa panglawas sa tibuok nasod, gibati namo nga haom ang pagsugyot ug makataronganong mga panagana bahin sa panglawas. (Itandi ang Levitico 13:21, 33.) Among gidawat nga ang “usa dili kinahanglang sobrang mahadlokon nga makauban ang mga tawo nga adunay AIDS.” Bisan pa niana, daghan ang padayong mahadlok bisan pa sa mga pasalig sa mga doktor. Busa gidasig namo ang mga nag-antos sa AIDS nga tahoron ang mga pagbati sa uban nga dili moangay sa mga pasundayag sa pisikal nga pagbati. Kon unsay gustong buhaton sa wala matakboyi nga mga tawo niining bahina maoy personal nilang desisyon. Sa bisan unsang kahimtang, ang tanang Kristohanon kinahanglang adunay kinasingkasing nga tinguha sa pagpakita ug kalulot ug pagkamabination ngadto sa mga nag-antos.—ED.
Nadasig ako pag-ayo nga ang maong mabination ug maayong-pagkasulat nga artikulo gitagana. Ilabinang giapresyar nako ang mga sugyot nga bisan tuod himoon nato ang “mapadapat sa tanan nga mga panagana,” kinahanglang magpakita kita ug kamabination ug magtagana ug mabinationg tabang.
M. H., Tinipong Bansa